ന്യൂഡൽഹി : കേന്ദ്രത്തിൽ തുടർച്ചയായ മൂന്നാം തവണയും അധികാരം നിലനിർത്തിയ ബിജെപി, ഇപ്പോൾ രാജ്യത്തുടനീളമുള്ള നിയമസഭകളിലും തങ്ങളുടെ ആധിപത്യം ശക്തമാക്കിയിരിക്കുകയാണ്. സഖ്യകക്ഷികളുടെ പിന്തുണയോടെ പാർലമെന്റിൽ കരുത്തുകാട്ടുന്ന ബിജെപി, സംസ്ഥാന തലങ്ങളിലും പ്രതിപക്ഷത്തെ ബഹുദൂരം പിന്നിലാക്കി മുന്നേറുന്നു.(BJP Dominance And The Decline Of The India Bloc In Indian Politics)
ഏറ്റവും പുതിയ നിയമസഭാ തിരഞ്ഞെടുപ്പുകളോടെ, രാജ്യത്തെ മൊത്തം 4,123 എംഎൽഎമാരിൽ 43.97 ശതമാനവും ഇപ്പോൾ ബിജെപിയുടെ കൈവശമാണ്. 2024-ൽ ഇത് 37.16 ശതമാനം മാത്രമായിരുന്നു. ബിജെപി നയിക്കുന്ന എൻഡിഎയുടെ കരുത്താകട്ടെ 50.84 ശതമാനത്തിൽ നിന്ന് 61.36 ശതമാനമായി വർധിച്ചു. ബംഗാളിലും അസമിലും ഉൾപ്പെടെയുണ്ടായ വൻ വിജയങ്ങൾ ഈ മുന്നേറ്റത്തിന് ആക്കംകൂട്ടി. പ്രത്യേകിച്ച്, പശ്ചിമ ബംഗാളിൽ പതിറ്റാണ്ടുകൾ നീണ്ട മമത ബാനർജിയുടെ ഭരണത്തിന് അന്ത്യം കുറിച്ച് ബിജെപി ചരിത്രവിജയം കുറിച്ചത് ഇന്ത്യൻ രാഷ്ട്രീയത്തിലെ വലിയൊരു വഴിത്തിരിവായി മാറുകയാണ്.
അതേസമയം, ‘ഇന്ത്യ’ സഖ്യത്തിന്റെ നില പരുങ്ങലിലാണ്. 2024-ൽ സഖ്യത്തിന് 1,603 എംഎൽഎമാരുണ്ടായിരുന്ന സ്ഥാനത്ത്, ഇന്ന് അത് 1,011 ആയി ചുരുങ്ങി. ആം ആദ്മി പാർട്ടി സഖ്യം വിട്ടതും, ഏറ്റവും ഒടുവിലായി എം.കെ. സ്റ്റാലിന്റെ നേതൃത്വത്തിലുള്ള ഡിഎംകെ മുന്നണിയിൽ നിന്ന് പോയതും പ്രതിപക്ഷത്തിന്റെ കെട്ടുറപ്പിനെ ബാധിച്ചു. തിരഞ്ഞെടുപ്പുകളിലെ തുടർച്ചയായ പരാജയങ്ങളും ഉൾപ്പാർട്ടി ഭിന്നതകളുമാണ് പ്രതിപക്ഷത്തിന്റെ തകർച്ചയ്ക്ക് വഴിവെച്ചത്.ബിജെപി തങ്ങളുടെ എംഎൽഎമാരുടെ എണ്ണം 1,532-ൽ നിന്ന് 1,813-ലേക്ക് ഉയർത്തിയപ്പോൾ, എൻഡിഎ മൊത്തം എംഎൽഎമാരുടെ എണ്ണം 2,096-ൽ നിന്ന് 2,530-ലേക്ക് എത്തിച്ചു.
Story Summary
The BJP and its NDA allies have significantly consolidated their power across Indian state assemblies following the 2024 Lok Sabha elections, notably securing a historic victory in West Bengal. Conversely, the INDIA bloc has seen a sharp decline in strength, exacerbated by internal fractures and the departure of key allies like the DMK, leading to a major realignment in the national political landscape.
