Follow on Google News
സ്റ്റോക്ക്ഹോം: ഡിജിറ്റൽ സാങ്കേതികവിദ്യയിൽ ലോകത്തിന് തന്നെ മാതൃകയായ സ്വീഡൻ തങ്ങളുടെ വിദ്യാഭ്യാസ നയത്തിൽ വൻ മാറ്റത്തിനൊരുങ്ങുന്നു. വിദ്യാർത്ഥികളുടെ വായനാശീലവും അറിവ് ആർജ്ജിക്കാനുള്ള ശേഷിയും കുറയുന്നത് തടയാൻ ക്ലാസ് മുറികളിൽ ലാപ്ടോപ്പുകൾക്ക് പകരം ഭൗതിക പുസ്തകങ്ങൾക്കും പേനകൾക്കും പേപ്പറുകൾക്കും കൂടുതൽ പ്രാധാന്യം നൽകാനാണ് സ്വീഡിഷ് സർക്കാരിന്റെ തീരുമാനം.(Sweden’s schools cutting back on digital learning, focus on physical books)
പാഠഭാഗങ്ങൾ ഡിജിറ്റൽ പ്ലാറ്റ്ഫോമുകളിൽ നൽകുന്നതിന് പകരം അധ്യാപകർ അത് പ്രിന്റ് ചെയ്ത് നൽകാൻ തുടങ്ങിയിരിക്കുന്നു. കണക്ക് ക്ലാസുകളിൽ ഡിജിറ്റൽ ലേണിംഗ് പ്ലാറ്റ്ഫോമുകൾ ഒഴിവാക്കി പാഠപുസ്തകങ്ങൾ മാത്രമാക്കിയാണ് ഇപ്പോൾ പഠനം നടക്കുന്നത്.
ഡിജിറ്റൽ വൈദഗ്ധ്യത്തിലും ടെക് സ്റ്റാർട്ടപ്പുകളിലും യൂറോപ്പിൽ മുൻപന്തിയിലുള്ള സ്വീഡന്റെ ഈ നീക്കം വലിയ ചർച്ചകൾക്കാണ് വഴിതെളിച്ചിരിക്കുന്നത്. സർക്കാരിന്റെ ഈ ‘അനലോഗ്’ സമീപനം വിദ്യാർത്ഥികളുടെ തൊഴിൽ സാധ്യതകളെ ബാധിക്കുമെന്നും രാജ്യത്തിന്റെ സമ്പദ്വ്യവസ്ഥയ്ക്ക് തിരിച്ചടിയാകുമെന്നും ടെക് കമ്പനികളും ചില കമ്പ്യൂട്ടർ ശാസ്ത്രജ്ഞരും വാദിക്കുന്നു.
2000-കളുടെ അവസാനത്തോടെയാണ് സ്വീഡനിലെ ക്ലാസ് മുറികളിൽ ലാപ്ടോപ്പുകൾ വ്യാപകമായത്. 2015-ലെ കണക്കുകൾ പ്രകാരം സർക്കാർ വിദ്യാലയങ്ങളിലെ 80 ശതമാനം വിദ്യാർത്ഥികൾക്കും സ്വന്തമായി ഡിജിറ്റൽ ഉപകരണങ്ങൾ ലഭ്യമായിരുന്നു. 2019-ൽ അന്നത്തെ സോഷ്യൽ ഡെമോക്രാറ്റ് സർക്കാർ പ്രീ-സ്കൂളുകളിൽ പോലും ടാബ്ലെറ്റുകൾ നിർബന്ധമാക്കിയിരുന്നു. വരാനിരിക്കുന്ന ഡിജിറ്റൽ തൊഴിൽ മേഖലയിലേക്ക് കുട്ടികളെ പ്രാപ്തരാക്കുക എന്നതായിരുന്നു അന്നത്തെ ലക്ഷ്യം.
