തൃശൂർ: വാടാനപ്പള്ളിയിൽ ബിജെപി പ്രവർത്തകർ ഭക്ഷ്യകിറ്റുകൾ വിതരണം ചെയ്തുവെന്ന ആരോപണങ്ങൾ പൂർണ്ണമായും തള്ളി ബിജെപി നേതാവും നടനുമായ ദേവൻ (Actor Devan BJP Kit Controversy). കിറ്റ് വിതരണം ചെയ്ത് വോട്ട് വാങ്ങുന്ന പ്രസ്ഥാനമല്ല ബിജെപിയെന്നും പുറത്തുവരുന്ന വാർത്തകൾ നൂറുശതമാനം അടിസ്ഥാനമില്ലാത്ത പച്ചനുണയാണെന്നും അദ്ദേഹം പ്രതികരിച്ചു. തിരഞ്ഞെടുപ്പിൽ പരാജയപ്പെടുമെന്ന് ഉറപ്പായപ്പോൾ എതിരാളികൾ കെട്ടിച്ചമച്ച കഥയാണിതെന്നും അദ്ദേഹം ആരോപിച്ചു.
സംഭവം നടക്കുമ്പോൾ താൻ കടയുടമയുടെ വീട്ടിൽ ചായ കുടിച്ചിരിക്കുകയായിരുന്നുവെന്നും പുറത്ത് ബഹളം കേട്ടാണ് വിവരം അറിഞ്ഞതെന്നും ദേവൻ പറഞ്ഞു. സിസിടിവി ദൃശ്യങ്ങൾ പരിശോധിച്ചാൽ സത്യം പുറത്തുവരുമെന്നും അദ്ദേഹം വ്യക്തമാക്കി. എന്നാൽ, കിറ്റ് വിവാദത്തിൽ ദേവനെ അറസ്റ്റ് ചെയ്യണമെന്ന് ആവശ്യപ്പെട്ട് യുഡിഎഫ്, എൽഡിഎഫ് പ്രവർത്തകർ പ്രദേശത്ത് ശക്തമായ പ്രതിഷേധം തുടരുകയാണ്. ബിജെപി പ്രവർത്തകർ ഇതിനെ പ്രതിരോധിച്ചതോടെ വാടാനപ്പള്ളിയിൽ വലിയ തോതിലുള്ള സംഘർഷാവസ്ഥ നിലനിൽക്കുന്നു.
വാടാനപ്പള്ളിയിലെ ‘ചാമ്പ്യൻ സൂപ്പർ മാർക്കറ്റിൽ’ കിറ്റുകൾ സൂക്ഷിച്ചിട്ടുണ്ടെന്ന പരാതിയിൽ കടയുടമ പ്രവീൺ, കിറ്റുകൾ ഓർഡർ ചെയ്ത ബിജെപി പ്രവർത്തകൻ സുധീഷ് എന്നിവരെ പോലീസ് കസ്റ്റഡിയിലെടുത്തിട്ടുണ്ട്. പ്രതിഷേധങ്ങൾക്കിടെ ഗോഡൗണിനോട് ചേർന്ന കെട്ടിടത്തിൽ നിന്ന് പുറത്തെത്തിയ ദേവൻ ബിജെപി പ്രവർത്തകർക്കൊപ്പം മുദ്രാവാക്യം വിളിച്ചു. സംഘർഷാവസ്ഥ കണക്കിലെടുത്ത് സ്ഥലത്ത് കേന്ദ്രസേനയെ വിന്യസിച്ചിട്ടുണ്ട്. ബിജെപി പ്രവർത്തകർ എത്തിയ വാഹനങ്ങളിൽ പോലീസ് പരിശോധന നടത്തി.
Summary: BJP leader and actor Devan has dismissed the allegations of food kit distribution by BJP workers in Vadanappally, Thrissur, as “baseless lies.” He stated that the BJP does not secure votes by distributing kits and claimed the controversy was a fabricated story by opponents fearing electoral defeat.
