ആർട്ടിഫിഷ്യൽ ഇന്റലിജൻസ് സാങ്കേതികവിദ്യയുടെ ദ്രുതഗതിയിലുള്ള വളർച്ച ലോകത്ത് കടുത്ത ശുദ്ധജലക്ഷാമത്തിനും ഊർജ്ജ പ്രതിസന്ധിക്കും കാരണമാകുമെന്ന ഞെട്ടിക്കുന്ന മുന്നറിയിപ്പുമായി ഐക്യരാഷ്ട്രസഭ ( AI Data Centers Water Consumption Crisis). യുണൈറ്റഡ് നേഷൻസ് യൂണിവേഴ്സിറ്റി ഇൻസ്റ്റിറ്റ്യൂട്ട് ഫോർ വാട്ടർ, എൻവയോൺമെന്റ് ആൻഡ് ഹെൽത്ത് പുറത്തുവിട്ട ഏറ്റവും പുതിയ പഠന റിപ്പോർട്ടിലാണ് കൃത്രിമബുദ്ധിയുടെ മറഞ്ഞിരിക്കുന്ന പരിസ്ഥിതി ആഘാതങ്ങളെക്കുറിച്ച് വ്യക്തമാക്കുന്നത്. എ.ഐ സിസ്റ്റങ്ങൾ പ്രവർത്തിപ്പിക്കുന്ന ഡാറ്റാ സെന്ററുകളുടെ അനിയന്ത്രിതമായ വ്യാപനം മൂലം 2030-ഓടെ, ഏകദേശം 1.3 ബില്യൺ (130 കോടി) ജനങ്ങളുടെ വാർഷിക ഗാർഹിക ആവശ്യത്തിന് തുല്യമായ അളവിൽ ശുദ്ധജലം എ.ഐ സാങ്കേതികവിദ്യ മാത്രം ഉപയോഗിക്കുമെന്നാണ് റിപ്പോർട്ട്. ഇത് നിലവിലെ ആഫ്രിക്കൻ ഭൂഖണ്ഡത്തിലെ ആകെ ജനസംഖ്യയ്ക്ക് ആവശ്യമായ ജലത്തിന് തുല്യമാണ്.
എ.ഐയുടെ കാർബൺ പുറന്തള്ളലിനെക്കുറിച്ച് ലോകമെമ്പാടും വലിയ ചർച്ചകൾ നടക്കുമ്പോഴും, അതിന്റെ അമിതമായ ജലവിനിയോഗം ആരും ഗൗരവമായി എടുക്കുന്നില്ലെന്ന് ഗവേഷകർ ചൂണ്ടിക്കാണിക്കുന്നു. അതിശക്തമായ എ.ഐ മോഡലുകൾ നിരന്തരം പ്രവർത്തിക്കുമ്പോൾ സർവറുകൾ അമിതമായി ചൂടാകാതിരിക്കാൻ കൂളിംഗ് സിസ്റ്റങ്ങൾക്കായി കോടിക്കണക്കിന് ലിറ്റർ വെള്ളമാണ് ഡാറ്റാ സെന്ററുകൾക്ക് ആവശ്യമായി വരുന്നത്. ഇതോടൊപ്പം, 2030-ഓടെ ഈ ഡാറ്റാ സെന്ററുകൾ പ്രതിവർഷം 945 ടെരാവാട്ട്-അവർ വൈദ്യുതി ഉപയോഗിക്കുമെന്നും ഇത് ആഗോള വൈദ്യുതി ഉപയോഗത്തിന്റെ 3 ശതമാനത്തോളം വരുമെന്നും റിപ്പോർട്ടിലുണ്ട്.
പാകിസ്ഥാൻ, ബംഗ്ലാദേശ്, നൈജീരിയ എന്നീ രാജ്യങ്ങളുടെ ആകെ വാർഷിക വൈദ്യുതി ഉപഭോഗത്തിന്റെ മൂന്നിരട്ടിയാണിത്. എ.ഐ മോഡലുകളെ പരിശീലിപ്പിക്കുന്നതിനേക്കാൾ, സാധാരണ ഉപയോക്താക്കൾ ദിനംപ്രതി നടത്തുന്ന ഇമേജ്, വീഡിയോ ജനറേഷൻ പോലുള്ള ദൈനംദിന ആവശ്യങ്ങളാണ് (80 മുതൽ 90 ശതമാനം വരെ) ഈ കനത്ത ഊർജ്ജ നഷ്ടത്തിന് കാരണമാകുന്നത്. എ.ഐ വികസനം തടയാനല്ല, മറിച്ച് ജല-ഊർജ്ജ സ്രോതസ്സുകൾ സംരക്ഷിച്ചുകൊണ്ട് ഉത്തരവാദിത്തത്തോടെയുള്ള സാങ്കേതിക മുന്നേറ്റം നടത്താൻ സർക്കാരുകളും ടെക് കമ്പനികളും തയ്യാറാകണമെന്നും യുഎൻ ആവശ്യപ്പെടുന്നു.
Summary: A new United Nations University report warns that the rapid expansion of artificial intelligence could lead to an unprecedented rise in global water and energy consumption by 2030. The study estimates that AI-powered data centers could consume enough water to meet the basic domestic needs of 1.3 billion people, closely matching the population of the entire African continent. Driven by the massive cooling infrastructure required for advanced servers, daily AI interactions like generating images and videos account for 80 to 90 percent of this hidden environmental burden, prompting the UN to urge tech giants and governments toward sustainable innovation.
