അലഹബാദ്: പ്രായപൂർത്തിയായ രണ്ടുപേർ പരസ്പര സമ്മതത്തോടെ ഒന്നിച്ച് ജീവിക്കുന്നത് നിയമവിരുദ്ധമല്ലെന്ന് അലഹബാദ് ഹൈക്കോടതി ഉത്തരവിട്ടു. പുരുഷൻ വിവാഹിതനാണെങ്കിൽ പോലും, മറ്റൊരു സ്ത്രീയുമായി ഒന്നിച്ച് താമസിക്കുന്നത് ക്രിമിനൽ നിയമങ്ങളുടെ പരിധിയിൽ വരില്ലെന്ന് ജസ്റ്റിസ് ജെ.ജെ. മുനീർ, ജസ്റ്റിസ് തരുൺ സക്സേന എന്നിവരടങ്ങിയ ഡിവിഷൻ ബെഞ്ച് വ്യക്തമാക്കി.(Married Man In Consensual Live-In Relationship Isn’t A Crime, states Allahabad High Court)
കോടതിയിൽ നിയമത്തിനാണ് മുൻഗണനയെന്നും സാമൂഹികമോ കുടുംബപരമോ ആയ ധാർമ്മികതയ്ക്കല്ലെന്നും ബെഞ്ച് നിരീക്ഷിച്ചു. വ്യക്തിസ്വാതന്ത്ര്യത്തിന് മുകളിൽ സാമൂഹിക ധാർമ്മികത അടിച്ചേൽപ്പിക്കാൻ കഴിയില്ല. വിവാഹിതനായ പുരുഷനും മറ്റൊരു സ്ത്രീയും ഒന്നിച്ച് താമസിക്കുന്നത് നിലവിലെ ക്രിമിനൽ നിയമപ്രകാരം കുറ്റകരമല്ലെന്ന് കോടതി ചൂണ്ടിക്കാട്ടി.
പ്രായപൂർത്തിയായ ഒരു സ്ത്രീക്ക് താൻ ആർക്കൊപ്പം താമസിക്കണമെന്ന് തീരുമാനിക്കാനുള്ള പൂർണ്ണ അവകാശമുണ്ടെന്ന് കോടതി വ്യക്തമാക്കി. ഷാജഹാൻപൂർ സ്വദേശികളായ യുവതിയും വിവാഹിതനായ യുവാവും സമർപ്പിച്ച ഹർജിയിലാണ് ഈ നടപടി. യുവതിയെ തട്ടിക്കൊണ്ടുപോയെന്ന് ആരോപിച്ച് യുവാവിനെതിരെ വീട്ടുകാർ ബിഎൻഎസ് സെക്ഷൻ 87 പ്രകാരം കേസെടുത്തിരുന്നു. എന്നാൽ, താൻ സ്വന്തം ഇഷ്ടപ്രകാരമാണ് യുവാവിനൊപ്പം താമസിക്കുന്നതെന്ന് യുവതി കോടതിയെ ബോധ്യപ്പെടുത്തി. അറസ്റ്റ് തടഞ്ഞു: യുവാവിനെതിരെയുള്ള തട്ടിക്കൊണ്ടുപോകൽ കേസിൽ അറസ്റ്റ് നടപടികൾ കോടതി തടഞ്ഞു. ഹർജിക്കാർക്ക് ആവശ്യമായ സംരക്ഷണം നൽകാൻ ഷാജഹാൻപൂർ എസ്പിക്ക് കോടതി നിർദ്ദേശം നൽകി.
