ചെന്നൈ: തമിഴ്നാട് നിയമസഭാ തെരഞ്ഞെടുപ്പിൽ നിർണ്ണായക മണ്ഡലമായ പെരമ്പൂർ അൻപുമണി രാമദോസ് നയിക്കുന്ന പിഎംകെയ്ക്ക് അനുവദിച്ചു. തമിഴക വെട്രി കഴകം അധ്യക്ഷൻ വിജയ് ഈ മണ്ഡലത്തിൽ നിന്ന് ജനവിധി തേടിയേക്കുമെന്ന ശക്തമായ അഭ്യൂഹങ്ങൾക്കിടെയാണ് എൻഡിഎ സഖ്യത്തിലെ സീറ്റ് വിഭജനം പൂർത്തിയായിരിക്കുന്നത്.(Amidst rumors of Vijay contesting, Perambur constituency goes to PMK)
വടക്കൻ തമിഴ്നാട്ടിലും ചെന്നൈയുടെ പ്രാന്തപ്രദേശങ്ങളിലും സ്വാധീനമുള്ള വണ്ണിയാർ വോട്ടുകൾ ഏകീകരിക്കുക എന്ന ലക്ഷ്യത്തോടെയാണ് പിഎംകെ പെരമ്പൂർ ഏറ്റെടുത്തിരിക്കുന്നത്. ചെന്നൈ നഗരമേഖലയിലെ അമ്പത്തൂർ, പെരമ്പൂർ എന്നീ സീറ്റുകൾ നേടിയെടുക്കാൻ കഴിഞ്ഞത് എൻഡിഎ സഖ്യത്തിന് ആത്മവിശ്വാസം നൽകുന്നുണ്ട്.
സേലം (വെസ്റ്റ്), ധർമ്മപുരി, പെണ്ണാഗരം, വൃദ്ധാചലം എന്നീ മണ്ഡലങ്ങളിൽ ഡിഎംകെ സഖ്യത്തിന് പിഎംകെ ശക്തമായ വെല്ലുവിളി ഉയർത്തുമെന്നാണ് കരുതപ്പെടുന്നത്. പെരമ്പൂരിൽ വിജയ് മത്സരിക്കുകയാണെങ്കിൽ മണ്ഡലം സംസ്ഥാനത്തെ തന്നെ ഏറ്റവും ശ്രദ്ധേയമായ പോരാട്ടവേദിയായി മാറും. വിജയിയുടെ ‘സ്റ്റാർ ഫാക്ടർ’ നിലവിലുള്ള രാഷ്ട്രീയ കണക്കുകൂട്ടലുകളെ അട്ടിമറിക്കാൻ സാധ്യതയുള്ളതിനാൽ, ഫലം പ്രവചനാതീതമായിരിക്കും.
