തിരുവനന്തപുരം: നേമം മണ്ഡലത്തിലെ ബി.ജെ.പി. സ്ഥാനാർത്ഥി രാജീവ് ചന്ദ്രശേഖർ സമർപ്പിച്ച തെരഞ്ഞെടുപ്പ് സത്യവാങ്മൂലത്തിൽ വൻതോതിൽ സ്വത്ത് വിവരങ്ങൾ മറച്ചുവെച്ചതായി കോൺഗ്രസ് ആരോപിച്ചു (Rajeev Chandrasekhar Asset Controversy). ബെംഗളൂരുവിലെ ഏറ്റവും വിലപിടിപ്പുള്ള പ്രദേശങ്ങളിലൊന്നായ കോറമംഗലയിൽ അദ്ദേഹത്തിനുള്ള 200 കോടി രൂപ വിലമതിക്കുന്ന ബംഗ്ലാവിനെക്കുറിച്ചുള്ള വിവരങ്ങൾ സത്യവാങ്മൂലത്തിൽ ഇല്ലെന്ന് കാണിച്ച് കോൺഗ്രസ് മുഖ്യ തെരഞ്ഞെടുപ്പ് ഓഫീസർക്ക് പരാതി നൽകി.
കോറമംഗല തേർഡ് ബ്ലോക്കിൽ 49,000 ചതുരശ്ര അടി വിസ്തീർണ്ണമുള്ള (ഏകദേശം 1.07 ഏക്കർ) ആഡംബര മന്ദിരം രാജീവ് ചന്ദ്രശേഖറിനുണ്ട്. ഈ വസ്തുവിനെക്കുറിച്ച് സത്യവാങ്മൂലത്തിൽ പരാമർശിച്ചിട്ടില്ല. നിലവിലെ വിപണി വിലയനുസരിച്ച് ഈ ഭൂമിക്ക് മാത്രം ഏകദേശം 200 കോടി രൂപ വിലവരുമെന്ന് കോൺഗ്രസ് കണക്കാക്കുന്നു.
ഈ വസ്തുവിന്റെ (നമ്പർ 408) നികുതി ഈ മാസം 17-നാണ് അടച്ചിട്ടുള്ളതെന്നും, നികുതി രസീത് വിവരങ്ങൾ ആപ്ലിക്കേഷൻ നമ്പർ 1600322463 ഉപയോഗിച്ച് പരിശോധിക്കാമെന്നും പരാതിയിൽ ചൂണ്ടിക്കാട്ടുന്നു.തെറ്റായ വിവരങ്ങൾ നൽകിയ സ്ഥാനാർത്ഥിയെ അയോഗ്യനാക്കണമെന്നാണ് കോൺഗ്രസിന്റെ ആവശ്യം.
മുൻപും (2024 ലോക്സഭാ തെരഞ്ഞെടുപ്പ് സമയത്ത്) സത്യവാങ്മൂലത്തിലെ വരുമാനവും ആസ്തിയും സംബന്ധിച്ച് രാജീവ് ചന്ദ്രശേഖറിനെതിരെ സമാനമായ ആരോപണങ്ങൾ ഉയർന്നിരുന്നു. അന്ന് കേന്ദ്ര പ്രത്യക്ഷ നികുതി ബോർഡ് (CBDT) വഴി പരിശോധന നടത്താൻ തെരഞ്ഞെടുപ്പ് കമ്മീഷൻ നിർദ്ദേശിച്ചിരുന്നു. നിയമസഭാ തെരഞ്ഞെടുപ്പ് പ്രചാരണം അവസാന ഘട്ടത്തിലേക്ക് കടക്കവെ ഉയർന്ന ഈ പുതിയ ആരോപണം രാഷ്ട്രീയ വൃത്തങ്ങളിൽ വലിയ ചർച്ചയായിട്ടുണ്ട്.
Story Summary:
The Congress party has filed a complaint with the Chief Electoral Officer against BJP candidate Rajeev Chandrasekhar, alleging non-disclosure of assets in his election affidavit for the Nemom constituency. The complaint claims that Chandrasekhar omitted a luxury bungalow worth ₹200 crore located in Koramangala, Bengaluru. Congress pointed out that the 49,000 sq. ft. property had its taxes paid as recently as March 17, 2026, and demanded action for submitting a false affidavit.
