ഓഫീസുകളിൽ ജീവനക്കാർ എടുക്കാറുള്ള ‘സിക്ക് ലീവ്’ എന്ന ആശയം തന്റെ വീട്ടുജോലിക്കാരി വിചിത്രമായി പ്രയോഗിക്കുന്നതിനെക്കുറിച്ച് ഒരു യുവാവ് പങ്കുവെച്ച കുറിപ്പ് സോഷ്യൽ മീഡിയയിൽ വലിയ ചർച്ചയാകുന്നു (Domestic Help Sick Leave). തനിക്ക് സുഖമില്ലാത്തതിനാൽ ഓഫീസിൽ പോകാതെ സിക്ക് ലീവ് എടുത്തതിനെക്കുറിച്ച് അമ്മ ജോലിക്കാരിയോട് വിശദീകരിച്ചതോടെയാണ് സംഭവങ്ങളുടെ തുടക്കം. ‘സുഖമില്ലാത്തപ്പോൾ എടുക്കുന്ന അവധി’ എന്ന ആശയത്തെക്കുറിച്ച് മനസ്സിലാക്കിയ ജോലിക്കാരി, ഇപ്പോൾ താൻ എടുക്കുന്ന എല്ലാ അവധികൾക്കും ‘സിക്ക് ലീവ്’ എന്ന് പേരിടാൻ തുടങ്ങിയതായി യുവാവ് പറയുന്നു.
തനിക്ക് അടുത്ത ദിവസം സുഖമില്ലാതാകുമെന്ന് തലേദിവസം തന്നെ മെസേജ് അയച്ച് അറിയിച്ച ശേഷമാണ് ജോലിക്കാരി ഇപ്പോൾ അവധിയെടുക്കുന്നത്. “നാളെ എനിക്ക് സുഖമില്ലാതാകും, അതുകൊണ്ട് സിക്ക് ലീവ് വേണം” എന്ന രീതിയിലുള്ള മുൻകൂട്ടിയുള്ള അറിയിപ്പുകൾ തന്നെ കുഴപ്പിക്കുന്നുവെന്ന് യുവാവ് റെഡിറ്റിൽ കുറിച്ചു. കോർപ്പറേറ്റ് ഓഫീസുകളിലെ വിചിത്രമായ നിയമങ്ങൾ പോലെയാണ് ഇതെന്നും, നാളെ പനി വരുമെന്ന് എങ്ങനെയാണ് ഒരാൾക്ക് നേരത്തെ അറിയാൻ കഴിയുകയെന്നും അദ്ദേഹം പരിഹാസരൂപേണ ചോദിക്കുന്നു.
ഈ പോസ്റ്റിന് താഴെ രസകരവും ചിന്തിപ്പിക്കുന്നതുമായ നിരവധി പ്രതികരണങ്ങളാണ് വന്നുകൊണ്ടിരിക്കുന്നത്. അവർ തൊഴിലാളികളാണെന്നും അടിമകളല്ലെന്നും, മാസത്തിൽ ഒന്നോ രണ്ടോ അവധിയാണെങ്കിൽ അതിനെ ഇത്ര വലിയ കാര്യമാക്കേണ്ടതില്ലെന്നും ചിലർ അഭിപ്രായപ്പെട്ടു. നമ്മുടെ ഓഫീസുകളിൽ നമുക്ക് ലഭിക്കുന്ന മോശം അനുഭവം വീട്ടുജോലിക്കാരോട് തീർക്കരുതെന്നും അവരോട് മാന്യമായി പെരുമാറണമെന്നും ചില ഉപയോക്താക്കൾ ഓർമ്മിപ്പിച്ചു. അതേസമയം, ശമ്പളം കുറയ്ക്കുമെന്ന് പറഞ്ഞ് പേടിപ്പിക്കാനും പകരം ജോലി ചെയ്യാൻ എഐ വരുമെന്ന് പറയണമെന്നും ചിലർ തമാശരൂപേണ പ്രതികരിച്ചു.
Posts from the indianworkplace
community on Reddit
