കൊച്ചി: ഇന്ത്യയെക്കുറിച്ചുള്ള ആഗോളതലത്തിലെ ‘വൃത്തിഹീനമായ രാജ്യം’ എന്ന മുൻവിധികളെ തിരുത്തിക്കുറിച്ച് അമേരിക്കൻ വ്ലോഗർ ക്ലോയി ജേഡ് (US Vlogger Praise Kochi). കേരളത്തിലെ തന്റെ യാത്രാനുഭവങ്ങൾ പങ്കുവെച്ചുകൊണ്ട് ഇൻസ്റ്റാഗ്രാമിൽ പോസ്റ്റ് ചെയ്ത വീഡിയോയിലാണ് കൊച്ചിയുടെയും കേരളത്തിന്റെയും വൃത്തിയെയും വികസനത്തെയും അവർ വാനോളം പുകഴ്ത്തിയത്. ഇന്ത്യയെന്നാൽ വൃത്തിയില്ലാത്ത ഇടമാണെന്ന പ്രചാരണം തെറ്റാണെന്നും ഈ രാജ്യം സഞ്ചാരികളുടെ സ്വർഗ്ഗമാണെന്നും അവർ കുറിച്ചു.
ഇത് രണ്ടാം തവണയാണ് ക്ലോയി ഇന്ത്യയിലെത്തുന്നത്. എട്ട് വർഷങ്ങൾക്ക് മുമ്പുള്ള ഇന്ത്യയിൽ നിന്ന് രാജ്യം ഏറെ മാറിയതായും അവർ നിരീക്ഷിച്ചു. മാധ്യമങ്ങളിൽ കാണുന്നതല്ല യഥാർത്ഥ ഇന്ത്യയെന്നും, വിശാലമായ ഈ രാജ്യത്തിന്റെ ഓരോ ഭാഗവും വ്യത്യസ്തമായ അനുഭവങ്ങളാണ് നൽകുന്നതെന്നും അവർ വീഡിയോയിൽ പറയുന്നു. കൊച്ചിയിലെ തെരുവുകളിലും ഫുട്പാത്തുകളിലും മാലിന്യങ്ങൾ കാണാനില്ലെന്നും അത് അങ്ങേയറ്റം വൃത്തിയുള്ളതാണെന്നും ക്ലോയി സാക്ഷ്യപ്പെടുത്തുന്നു.
വെള്ളത്തിലൂടെ ഓടുന്ന മെട്രോ ട്രെയിൻ പോലെയാണ് കൊച്ചിയിലെ ഫെറി സർവീസ് എന്ന് അവർ വിശേഷിപ്പിച്ചു. പൂർണ്ണമായും വൈദ്യുതിയിൽ പ്രവർത്തിക്കുന്ന ഇതിന്റെ ഉൾഭാഗവും പരിസരവും അതീവ വൃത്തിയുള്ളതാണെന്നും പുനരുപയോഗ ഊർജ്ജത്തിന്റെ മികച്ച മാതൃകയാണിതെന്നും അവർ പറഞ്ഞു. റെസ്റ്റോറന്റുകളിൽ ഗ്ലൗസ് ധരിച്ചാണ് ഭക്ഷണം വിളമ്പുന്നതെന്നും ശുചിത്വത്തിന്റെ കാര്യത്തിൽ വിദേശ രാജ്യങ്ങൾക്ക് സമാനമായ നിലവാരമാണ് കൊച്ചിയിൽ കണ്ടതെന്നും വ്ലോഗർ വ്യക്തമാക്കി. താൻ കഴിച്ച ദോശ ഉൾപ്പെടെയുള്ള ഭക്ഷണങ്ങൾ രുചികരവും പോഷകഗുണമുള്ളതുമായിരുന്നുവെന്നും അവർ കൂട്ടിച്ചേർത്തു. കേരളത്തിലെ തന്റെ അനുഭവങ്ങൾ പങ്കുവെക്കുന്നതിലൂടെ ഇന്ത്യയെക്കുറിച്ചുള്ള പോസിറ്റീവായ ഒരു ചിത്രം ലോകത്തിന് മുന്നിലെത്തിക്കാനാണ് താൻ ശ്രമിക്കുന്നതെന്ന് ക്ലോയി ജേഡ് വ്യക്തമാക്കി.
View this post on Instagram
