ബോക്സ് ഓഫീസിൽ തരംഗം സൃഷ്ടിക്കുന്ന റൺവീർ സിംഗ് ചിത്രം ‘ധുരന്ധർ: ദി റിവഞ്ച്’ 500 കോടി ക്ലബ്ബിൽ ഇടംപിടിച്ചതിന് പിന്നാലെ പ്രശംസയുമായി കന്നഡ താരം ഋഷഭ് ഷെട്ടി രംഗത്തെത്തിയിരിക്കുകയാണ് (Rishab Shetty Praises Ranveer Singh). സിനിമയുടെ ഓരോ ഫ്രെയിമും യുദ്ധഭേരി മുഴങ്ങുന്നതുപോലെ അതിശക്തമാണെന്നും ഇതൊരു വെറും രണ്ടാം ഭാഗമല്ല മറിച്ച് വലിയൊരു പ്രസ്താവന തന്നെയാണെന്നും അദ്ദേഹം എക്സ് പ്ലാറ്റ്ഫോമിൽ കുറിച്ചു. ചിത്രത്തിലെ ഓരോ താരങ്ങളുടെയും പ്രകടനം മികച്ചതാണെന്ന് പറഞ്ഞ അദ്ദേഹം നടൻ സഞ്ജയ് ദത്തിനെ പ്രത്യേകം അഭിനന്ദിക്കുകയും ചെയ്തു. സിനിമയുടെ സാങ്കേതിക വശങ്ങളെയും സംഗീതത്തെയും വാനോളം പുകഴ്ത്തിയ താരം ആദിത്യ ധറിന്റെ സംവിധാന മികവിനെയും അഭിനന്ദിച്ചു.
നേരത്തെ കാന്താര സിനിമയുമായി ബന്ധപ്പെട്ട് റൺവീർ സിംഗും ഋഷഭ് ഷെട്ടിയും തമ്മിൽ ചില അസ്വാരസ്യങ്ങൾ ഉണ്ടായിരുന്നു എന്ന വാർത്തകൾക്കിടയിലാണ് ഈ പുതിയ നീക്കം. 2025-ലെ ഇന്റർനാഷണൽ ഫിലിം ഫെസ്റ്റിവലിൽ കാന്താരയിലെ ദൈവക്കോലത്തെ റൺവീർ അനുകരിച്ചത് ഋഷഭ് ഷെട്ടിയെ അസ്വസ്ഥനാക്കിയിരുന്നു. തങ്ങൾക്ക് വൈകാരികമായി ഏറെ ബന്ധമുള്ള പവിത്രമായ ആചാരങ്ങളെ വേദികളിൽ പരിഹസിക്കരുതെന്ന് അന്ന് അദ്ദേഹം അഭ്യർത്ഥിച്ചിരുന്നു. ഈ വിവാദങ്ങൾക്ക് ശേഷം റൺവീർ സിംഗിന്റെ മുൻ ചിത്രങ്ങളോട് പ്രതികരിക്കാതിരുന്ന ഋഷഭ് ഷെട്ടി, ധുരന്ധർ 2 കണ്ടതിന് ശേഷം മനസ്സ് തുറന്നത് സിനിമാ ലോകത്ത് ശ്രദ്ധേയമായിട്ടുണ്ട്.
ഋഷഭ് ഷെട്ടിക്ക് പുറമെ തെലുങ്ക് താരം രവി തേജയും ചിത്രത്തെ പ്രശംസിച്ച് രംഗത്തെത്തി. റൺവീർ സിംഗ് സ്ക്രീനിൽ തീപ്പൊരിയാണെന്നും ഓരോ താരങ്ങളും അണിയറ പ്രവർത്തകരും തങ്ങളുടെ ഏറ്റവും മികച്ച പ്രകടനം തന്നെയാണ് പുറത്തെടുത്തതെന്നും രവി തേജ അഭിപ്രായപ്പെട്ടു. ഇതിനോടകം ജൂനിയർ എൻടിആർ, അല്ലു അർജുൻ, മഹേഷ് ബാബു തുടങ്ങിയ ദക്ഷിണേന്ത്യൻ സൂപ്പർ താരങ്ങളും എസ്എസ് രാജമൗലി, രാം ഗോപാൽ വർമ്മ തുടങ്ങിയ പ്രമുഖ സംവിധായകരും ചിത്രത്തെ അഭിനന്ദിച്ച് രംഗത്തെത്തിയിട്ടുണ്ട്. ഡിസംബറിൽ പുറത്തിറങ്ങിയ ആദ്യ ഭാഗത്തേക്കാൾ വലിയ സ്വീകാര്യതയാണ് മാർച്ച് 19-ന് റിലീസ് ചെയ്ത രണ്ടാം ഭാഗത്തിന് ലഭിച്ചുകൊണ്ടിരിക്കുന്നത്.
