സിഡ്നി: വിദേശരാജ്യങ്ങളിൽ യാത്ര ചെയ്യുമ്പോൾ പാസ്പോർട്ടോ പേഴ്സോ നഷ്ടപ്പെടുന്നത് ഏതൊരു സഞ്ചാരിക്കും വലിയ ആശങ്കയുണ്ടാക്കുന്ന കാര്യമാണ്. എന്നാൽ ഓസ്ട്രേലിയയിൽ വെച്ച് പേഴ്സ് മറന്നുവെച്ച ഒരു ഇന്ത്യൻ യുവതിക്കുണ്ടായ അനുഭവം ഇപ്പോൾ സോഷ്യൽ മീഡിയയിൽ വൈറലായിരിക്കുകയാണ് (Indian Woman Australia Wallet). പേഴ്സ് തിരിച്ചുകിട്ടില്ലെന്ന് ഉറപ്പിച്ച യുവതിക്ക് ഓസ്ട്രേലിയയിലെ സുരക്ഷിതത്വം വലിയൊരു സർപ്രൈസാണ് നൽകിയത്.
ഇൻസ്റ്റഗ്രാമിൽ പങ്കുവെച്ച വീഡിയോയിലൂടെയാണ് യുവതി ഈ അനുഭവം വിവരിക്കുന്നത്. ട്രെയിൻ യാത്രയ്ക്കിടെയാണ് സുഹൃത്തിന്റെ പേഴ്സ് സ്റ്റേഷനിൽ മറന്നുവെച്ച കാര്യം ഇവർ തിരിച്ചറിയുന്നത്. ഉടൻ തന്നെ പരിഭ്രാന്തരായ ഇരുവരും അടുത്ത സ്റ്റേഷനിൽ ഇറങ്ങി തിരികെ പേഴ്സ് വെച്ച സ്ഥലത്തേക്ക് പാഞ്ഞെത്തി. എന്നാൽ അവിടെ എത്തിയപ്പോൾ കണ്ട കാഴ്ച ഇവരെ അമ്പരപ്പിച്ചു. പേഴ്സ് ആരും തൊടാതെ, ഇവർ വെച്ച അതേ സ്ഥലത്ത് തന്നെ സുരക്ഷിതമായി ഇരിപ്പുണ്ടായിരുന്നു.
പലപ്പോഴും തിരക്കേറിയ സ്ഥലങ്ങളിൽ സാധനങ്ങൾ നഷ്ടപ്പെട്ടാൽ തിരിച്ചുകിട്ടാൻ പ്രയാസമുള്ള സാഹചര്യത്തിൽ, ഓസ്ട്രേലിയയിലെ ഈ അനുഭവം തങ്ങൾക്ക് വലിയ ആശ്വാസമാണ് നൽകിയതെന്ന് യുവതി പറയുന്നു. വീഡിയോയ്ക്ക് താഴെ സമാനമായ അനുഭവങ്ങൾ പങ്കുവെച്ച് നിരവധി പേരാണ് കമന്റ് ചെയ്യുന്നത്. ഷോപ്പിംഗ് സെന്ററുകളിലും പാർക്കുകളിലും സാധനങ്ങൾ മറന്നുവെച്ചിട്ടും മണിക്കൂറുകൾക്ക് ശേഷം അവ സുരക്ഷിതമായി തിരികെ ലഭിച്ച അനുഭവം പലരും പങ്കുവെച്ചു. എങ്കിലും ഇത്തരം സാഹചര്യങ്ങളിൽ ഭാഗ്യം എപ്പോഴും കൂടെയുണ്ടാകില്ലെന്നും ജാഗ്രത പാലിക്കണമെന്നും സോഷ്യൽ മീഡിയ ഉപയോക്താക്കൾ ഓർമ്മിപ്പിക്കുന്നു.
View this post on Instagram
