ന്യൂഡൽഹി: അന്താരാഷ്ട്ര തലത്തിൽ സംഘർഷഭരിതമായി തുടരുന്ന ഹോർമുസ് കടലിടുക്ക് കടക്കാൻ രണ്ട് ഇന്ത്യൻ എൽപിജി ടാങ്കറുകൾ കൂടി തയ്യാറെടുക്കുന്നതായി റിപ്പോർട്ട്. ഇന്ത്യൻ പതാകയുള്ള ടാങ്കറുകൾ ഉടൻ യാത്ര പുനരാരംഭിക്കുമെന്ന് അന്താരാഷ്ട്ര വാർത്താ ഏജൻസി റിപ്പോർട്ട് ചെയ്തു.(Two more India-bound LPG tankers to cross Strait of Hormuz)
ഷാർജ തീരത്തിന് സമീപം നങ്കൂരമിട്ടിരിക്കുന്ന രണ്ട് പ്രമുഖ ടാങ്കറുകളാണ് ശനിയാഴ്ചയോടെ ഹോർമുസ് കടക്കാനൊരുങ്ങുന്നത്. പൈൻ ഗ്യാസ് ഇന്ത്യൻ ഓയിൽ കോർപ്പറേഷനായി ചാർട്ട് ചെയ്ത കപ്പലാണ്. ജഗ് വസന്ത് ഭാരത് പെട്രോളിയം കോർപ്പറേഷനായി സർവീസ് നടത്തുന്ന ടാങ്കറാണ്.
22-ഓളം ഇന്ത്യൻ കപ്പലുകളാണ് ഹോർമുസ് കടലിടുക്ക് കടക്കാനാകാതെ വിവിധയിടങ്ങളിൽ കുടുങ്ങിക്കിടക്കുന്നത്. കഴിഞ്ഞ ആഴ്ച ഇന്ത്യൻ പതാകയുള്ള രണ്ട് എൽപിജി കപ്പലുകൾക്ക് കടന്നുപോകാൻ ഇറാൻ അനുമതി നൽകിയിരുന്നു. ഇവ സുരക്ഷിതമായി ഇന്ത്യൻ തുറമുഖങ്ങളിൽ എത്തിച്ചേർന്നിട്ടുണ്ട്.
