പത്തനംതിട്ട: നിയമസഭാ തെരഞ്ഞെടുപ്പ് പ്രഖ്യാപനത്തിന് പിന്നാലെ പത്തനംതിട്ട ജില്ലയിൽ സ്ഥാനാർത്ഥികളുടെ വമ്പൻ റോഡ് ഷോ സംഘടിപ്പിക്കുമെന്ന് സി.പി.എം ജില്ലാ സെക്രട്ടറി രാജു എബ്രഹാം. വീണ ജോർജ്, ജനീഷ് കുമാർ എന്നിവരോട് മണ്ഡലങ്ങളിൽ വോട്ട് ചോദിക്കാൻ പാർട്ടി പ്രാഥമിക നിർദ്ദേശം നൽകിയതായും അദ്ദേഹം പറഞ്ഞു.(Will hold a grand road show of Candidates, says Raju Abraham)
കുട്ടികളുടെ കാര്യം ഓർത്താണ് വീണ ജോർജ് മത്സരരംഗത്ത് നിന്ന് മാറണമെന്ന് ഭർത്താവ് മുമ്പ് അഭിപ്രായപ്പെട്ടത്. എന്നാൽ ഇപ്പോൾ ആ നിലപാടിൽ മാറ്റമുണ്ടാകുമെന്നാണ് കരുതുന്നത്. പദ്ധതികൾ പൂർത്തിയാക്കാതെ ഉദ്ഘാടനം ചെയ്തു എന്ന ആരോപണത്തിൽ കഴമ്പില്ലെന്നും, സാധാരണ വീടുകളുടെ ഗൃഹപ്രവേശം പോലും എല്ലാ പണിയും തീർത്തല്ല നടത്താറുള്ളതെന്നും അദ്ദേഹം പരിഹസിച്ചു.
ശബരിമല സ്വർണ്ണക്കൊള്ള കേസുമായി ബന്ധപ്പെട്ട് ജയിൽ മോചിതനായ എ. പത്മകുമാറിനെതിരായ പാർട്ടി നടപടി സംസ്ഥാന നേതൃത്വത്തിന്റെ നിർദ്ദേശപ്രകാരം തീരുമാനിക്കും. പത്മകുമാർ നൽകിയ വിശദീകരണം പാർട്ടി പരിശോധിച്ചുവരികയാണ്.
ഇടുക്കിയിലെ ഭൂപ്രശ്നങ്ങൾ പരിഹരിക്കാൻ കഴിഞ്ഞത് തെരഞ്ഞെടുപ്പിൽ എൽ.ഡി.എഫിന് വലിയ മേൽക്കൈ നൽകുമെന്ന് മന്ത്രി റോഷി അഗസ്റ്റിൻ പറഞ്ഞു. കഴിഞ്ഞ തവണത്തേക്കാൾ വലിയ ഭൂരിപക്ഷത്തിൽ ഇടുക്കിയിൽ വിജയിക്കും. ജനങ്ങൾ ഭരണനേട്ടങ്ങളിൽ സംതൃപ്തരാണെന്നും അവരുടെ ഹൃദയത്തിലാണ് താൻ ജീവിക്കുന്നതെന്നും റോഷി അഗസ്റ്റിൻ ആത്മവിശ്വാസം പ്രകടിപ്പിച്ചു.
