മുംബൈ: 66-ാം വയസ്സിൽ ബോളിവുഡ് നടി നീന ഗുപ്ത ഗർഭിണിയാണെന്ന തരത്തിൽ സോഷ്യൽ മീഡിയയിൽ പ്രചരിക്കുന്ന വാർത്തകളോട് രസകരമായി പ്രതികരിച്ച് താരം. തന്റെ സൂപ്പർഹിറ്റ് ചിത്രമായ ‘ബദായി ഹോ’യെ പരാമർശിച്ചുകൊണ്ടായിരുന്നു താരത്തിന്റെ മറുപടി (Neena Gupta Pregnancy Rumors). ഹൈദരാബാദിൽ നടന്ന വിജയ് ദേവരകൊണ്ട – രശ്മിക മന്ദാന വിവാഹ സൽക്കാരത്തിൽ പങ്കെടുത്തതിന് പിന്നാലെയാണ് നീന ഗുപ്തയുടെ ആരോഗ്യസ്ഥിതിയെക്കുറിച്ച് അഭ്യൂഹങ്ങൾ ഉയർന്നത്.
വിവാഹ സൽക്കാരത്തിൽ നീന ഗുപ്ത സാരി ധരിച്ചെത്തിയ ചിത്രങ്ങളും വീഡിയോകളും കണ്ട ചിലർ താരം ഗർഭിണിയാണെന്ന് സോഷ്യൽ മീഡിയയിൽ കമന്റുകൾ ഇട്ടു തുടങ്ങി. ഇതിനോട് ‘ബോളിവുഡ് ഹംഗാമ’യ്ക്ക് നൽകിയ അഭിമുഖത്തിൽ നീന പ്രതികരിച്ചത് ഇങ്ങനെ:
“എന്റെ ജീവിതത്തിൽ ഇപ്പോൾ ഒരു യഥാർത്ഥ ‘ബദായി ഹോ’യുടെ കുറവേ ഉണ്ടായിരുന്നുള്ളൂ. എന്നാൽ ഇവിടെ അങ്ങനെയൊന്നുമില്ല. ഞാൻ ഗർഭിണിയല്ല. അന്ന് ഞാൻ ധരിച്ച സാരിയുടെ മെറ്റീരിയൽ അല്പം കട്ടിയുള്ളതായിരുന്നു, അതുകൊണ്ടാണ് ചില ദൃശ്യങ്ങളിൽ എനിക്ക് വണ്ണം കൂടുതലായി തോന്നിയത്.”
ഈ പ്രായത്തിലും തന്നെക്കുറിച്ചുള്ള ഇത്തരം ചർച്ചകൾ നടക്കുന്നത് രാജ്യം പുരോഗമിക്കുന്നതിന്റെ ലക്ഷണമാണെന്നും താരം തമാശരൂപേണ കൂട്ടിച്ചേർത്തു.
എപ്പോഴും തന്റെ നിലപാടുകൾ തുറന്നു പറയുന്ന വ്യക്തിയാണ് നീന ഗുപ്ത. വിഖ്യാത ക്രിക്കറ്റ് താരം വിവിയൻ റിച്ചാർഡ്സുമായുള്ള ബന്ധത്തെക്കുറിച്ചും മകൾ മസാബ ഗുപ്തയെ സിംഗിൾ മദറായി വളർത്തിയതിനെക്കുറിച്ചും താരം മുൻപ് തുറന്നു പറഞ്ഞിട്ടുണ്ട്. 2008-ൽ ചാർട്ടേഡ് അക്കൗണ്ടന്റ് വിവേക് മെഹ്റയെയാണ് നീന വിവാഹം കഴിച്ചത്.
