തിരുവനന്തപുരം: പ്രയാഗ്രാജ് കുംഭമേളയിലൂടെ സമൂഹമാധ്യമങ്ങളിൽ തരംഗമായ മൊണാലിസ ഭോസ്ലെ പോലീസ് സഹായം തേടി തിരുവനന്തപുരത്ത് (Monalisa Bhonsle Kumbh Mela). തന്റെ പിതാവിൽ നിന്ന് സംരക്ഷണം നൽകണമെന്നാവശ്യപ്പെട്ട് കാമുകനോടൊപ്പം തമ്പാനൂർ പോലീസ് സ്റ്റേഷനിലാണ് മൊണാലിസ അഭയം പ്രാപിച്ചത്. വീട്ടുകാർ പ്രണയത്തെ എതിർത്തതോടെയാണ് ഇരുവരും കേരളത്തിലെത്തിയത്.
പ്രയാഗ്രാജിലെ കുംഭമേളയിൽ രുദ്രാക്ഷ മാലകൾ വിൽക്കുന്നതിനിടെ പകർത്തിയ വീഡിയോ വൈറലായതോടെയാണ് മൊണാലിസ ലോകശ്രദ്ധ നേടിയത്. മൊണാലിസയെ കാണാൻ വലിയ ജനക്കൂട്ടം എത്തിയതോടെ കച്ചവടം തടസ്സപ്പെടുകയും, സുരക്ഷാ കാരണങ്ങളാൽ പിതാവ് അവളെ വീട്ടിലേക്ക് മടക്കി അയക്കുകയും ചെയ്തിരുന്നു. ഈ പ്രശസ്തിക്ക് പിന്നാലെ സിനിമാ ലോകത്തുനിന്നും മൊണാലിസയെ തേടി അവസരങ്ങളെത്തി.
സനോജ് മിശ്ര സംവിധാനം ചെയ്യുന്ന ‘ദ ഡയറി ഓഫ് മണിപ്പൂർ’ എന്ന ചിത്രത്തിലൂടെയാണ് മൊണാലിസ അഭിനയരംഗത്തേക്ക് കടക്കുന്നത്. പ്രമുഖ നടൻ രാജ്കുമാർ റാവുവിന്റെ സഹോദരൻ അമിത് റാവുവാണ് ഈ ചിത്രത്തിൽ നായകനായി എത്തുന്നത്. തന്റെ കരിയറിൽ പുതിയ ചുവടുവെപ്പുകൾ നടത്തുന്നതിനിടെയാണ് വ്യക്തിപരമായ കാരണങ്ങളാൽ താരം ഇപ്പോൾ കേരളത്തിൽ പോലീസിന്റെ സഹായം തേടിയിരിക്കുന്നത്.
