ദോഹ: മിഡിൽ ഈസ്റ്റിലെ സംഘർഷം രൂക്ഷമാകുന്നതിനിടെ ഇറാന് ശക്തമായ മുന്നറിയിപ്പുമായി ഖത്തർ (Qatar Minister Iran Enemy Remarks). മേഖലയിലെ രാജ്യങ്ങൾ ഇറാന്റെ ശത്രുക്കളല്ലെന്നും എന്നാൽ ആക്രമണങ്ങൾ തുടരുന്ന സാഹചര്യത്തിൽ ഇനിയും മധ്യസ്ഥ ചർച്ചകൾക്ക് ഖത്തറും ഒമാനും തയ്യാറാവില്ലെന്നും ഖത്തർ വിദേശകാര്യ സഹമന്ത്രി മുഹമ്മദ് ബിൻ അബ്ദുൽ അസീസ് അൽ ഖുലൈഫി പറഞ്ഞു. അൽ ജസീറയ്ക്ക് നൽകിയ പ്രത്യേക അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്.
കഴിഞ്ഞ രണ്ടാഴ്ചയായി തുടരുന്ന യുഎസ്-ഇസ്രായേൽ ആക്രമണങ്ങൾക്ക് തിരിച്ചടിയായി ഗൾഫ് രാജ്യങ്ങളിലെ സിവിലിയൻ കേന്ദ്രങ്ങൾക്കും അടിസ്ഥാന സൗകര്യങ്ങൾക്കും നേരെ ഇറാൻ നടത്തുന്ന മിസൈൽ, ഡ്രോൺ ആക്രമണങ്ങൾ ആർക്കും ഗുണം ചെയ്യില്ലെന്ന് അൽ ഖുലൈഫി ചൂണ്ടിക്കാട്ടി. ഖത്തറിന്റെ പരമാധികാരത്തിന് മേലുള്ള ഇത്തരം കടന്നുകയറ്റങ്ങളെ ശക്തമായ ഭാഷയിൽ അപലപിക്കുന്നതായും സ്വയം പ്രതിരോധത്തിനായി നിയമപരമായ എല്ലാ മാർഗങ്ങളും തേടുമെന്നും അദ്ദേഹം കൂട്ടിച്ചേർത്തു.
ഇറാനും പാശ്ചാത്യ രാജ്യങ്ങൾക്കുമിടയിൽ സമാധാനത്തിന്റെ പാലമായി പ്രവർത്തിച്ചിരുന്ന ഖത്തർ, ഒമാൻ തുടങ്ങിയ രാജ്യങ്ങളെപ്പോലും ഇറാൻ ലക്ഷ്യം വെക്കുന്നത് നിർഭാഗ്യകരമാണ്. “ആക്രമണത്തിനിരയാകുമ്പോൾ ആർക്കും മധ്യസ്ഥന്റെ റോളിൽ പ്രവർത്തിക്കാനാകില്ല, ഇത് ഇറാൻ മനസ്സിലാക്കണം,” മന്ത്രി പറഞ്ഞു. ഏതാനും ദിവസങ്ങൾക്ക് മുമ്പ് ഖത്തർ പ്രധാനമന്ത്രി ഷെയ്ഖ് മുഹമ്മദ് ബിൻ അബ്ദുറഹ്മാൻ ബിൻ ജാസിം അൽ താനി ഇറാനുമായി നടത്തിയ ഫോൺ സംഭാഷണത്തിലും അയൽരാജ്യങ്ങൾക്ക് നേരെയുള്ള ആക്രമണം നിർത്തണമെന്ന് ആവശ്യപ്പെട്ടിരുന്നു.
ഹോർമുസ് കടലിടുക്ക് വഴിയുള്ള ഊർജ്ജ വിതരണം തടസ്സപ്പെടുന്നത് ലോക സമ്പദ്വ്യവസ്ഥയെ ബാധിക്കുമെന്നും ഇതിന് ആഗോളതലത്തിൽ ഒരു പരിഹാരം കണ്ടെത്തണമെന്നും ഖത്തർ ആവശ്യപ്പെട്ടു. യുദ്ധം അവസാനിപ്പിച്ച് സമാധാന ചർച്ചകളിലേക്ക് മടങ്ങാൻ യുഎസ് പ്രസിഡന്റ് ഡൊണാൾഡ് ട്രംപിനോടും ഖത്തർ നിരന്തരം ആവശ്യപ്പെടുന്നുണ്ട്. ചർച്ചകളിലൂടെ മാത്രമേ സുസ്ഥിരമായ പരിഹാരം സാധ്യമാകൂ എന്നും അൽ ഖുലൈഫി ഓർമ്മിപ്പിച്ചു.
Summary: Qatar’s Minister of State for Foreign Affairs, Mohammed bin Abdulaziz al-Khulaifi, has warned that regional countries are not enemies of Iran but stated that Qatar and Oman cannot continue their roles as mediators while under attack. In an interview with Al Jazeera, he condemned Iran’s retaliatory strikes on its neighbors following the US-Israel bombardment, emphasizing that such attacks harm the region’s energy-driven economy and stability.
