കൊൽക്കത്ത: പശ്ചിമ ബംഗാളിൽ തൃണമൂൽ കോൺഗ്രസിന്റെ 15 വർഷത്തെ ഭരണത്തിന് അന്ത്യം കുറിച്ചുകൊണ്ട് ബിജെപി അധികാരം പിടിച്ചെടുത്തു. ആകെ 294 സീറ്റുകളിൽ 206 എണ്ണത്തിലും വിജയിച്ച് മൂന്നിൽ രണ്ട് ഭൂരിപക്ഷത്തോടെയാണ് ബിജെപി ബംഗാളിൽ ആദ്യമായി സർക്കാർ രൂപീകരിക്കുന്നത്. മുഖ്യമന്ത്രി മമത ബാനർജി സ്വന്തം തട്ടകമായ ഭവാനിപൂരിൽ ബിജെപിയുടെ സുവേന്ദു അധികാരിയോട് 15,000-ത്തിലധികം വോട്ടുകൾക്ക് പരാജയപ്പെട്ടത് തൃണമൂലിന് കനത്ത തിരിച്ചടിയായി.(BJP Wins West Bengal Assembly Election 2026 Mamata Banerjee Defeat)
ഭരണം ഉറപ്പിച്ചതോടെ ബംഗാളിന്റെ അടുത്ത മുഖ്യമന്ത്രി ആരാകുമെന്ന ചർച്ചകളിലാണ് രാഷ്ട്രീയ കേന്ദ്രങ്ങൾ. പ്രധാനമന്ത്രി നരേന്ദ്ര മോദി, അമിത് ഷാ, നിതിൻ നബിൻ എന്നിവർ പങ്കെടുക്കുന്ന യോഗത്തിൽ ഇക്കാര്യത്തിൽ അന്തിമ തീരുമാനമുണ്ടാകും. മേയ് 9-ന് പുതിയ മുഖ്യമന്ത്രി സത്യപ്രതിജ്ഞ ചെയ്ത് അധികാരമേൽക്കുമെന്ന് ബിജെപി സംസ്ഥാന അധ്യക്ഷൻ സമിക് ഭട്ടാചാര്യ അറിയിച്ചു.
നന്ദിഗ്രാം നിലനിർത്തുകയും ഭവാനിപൂരിൽ മമതയെ മലർത്തിയടിക്കുകയും ചെയ്ത സുവേന്ദു അധികാരിയാണ് പട്ടികയിൽ ഒന്നാമൻ. താൻ അധികാരക്കൊതിയനല്ലെന്നും പാർട്ടി പറയുന്നതനുസരിച്ച് പ്രവർത്തിക്കുമെന്നുമാണ് അദ്ദേഹത്തിന്റെ പ്രതികരണം. ഖരഗ്പൂർ സദർ മണ്ഡലത്തിൽ നിന്ന് 30,506 വോട്ടുകളുടെ ഭൂരിപക്ഷത്തിൽ വിജയിച്ച മുൻ സംസ്ഥാന അധ്യക്ഷൻ ദിലീപ് ഘോഷും ശക്തമായ പരിഗണനയിലുണ്ട്. ആർഎസ്എസ് പശ്ചാത്തലമുള്ള നേതാവായ അദ്ദേഹം പാർട്ടി പ്രവർത്തകർക്കിടയിൽ പ്രിയങ്കരനാണ്.
സമിക് ഭട്ടാചാര്യ ബൂത്ത് തലത്തിലുള്ള പ്രവർത്തനങ്ങളിലൂടെ പാർട്ടിയെ വിജയത്തിലെത്തിക്കുന്നതിൽ വലിയ പങ്ക് വഹിച്ചു. സോനാർപൂർ ദക്ഷിണിൽ നിന്ന് വൻ ഭൂരിപക്ഷത്തിൽ വിജയിച്ച മുൻ എംപിയും നടിയുമായ രൂപ ഗാംഗുലിയുടെ പേരും മുഖ്യമന്ത്രി സ്ഥാനത്തേക്ക് ഉയർന്നു കേൾക്കുന്നുണ്ട്. നഗരപ്രദേശങ്ങളിലെ വോട്ടർമാർക്കിടയിൽ ഇവർക്ക് വലിയ സ്വാധീനമുണ്ട്. അസൻസോൾ ദക്ഷിണിൽ നിന്ന് വിജയിച്ച അഗ്നിമിത്ര പോളും റാഷ്ബിഹാരിയിൽ നിന്ന് വിജയിച്ച പ്രമുഖ ചിന്തകൻ സ്വപൻ ദാസ് ഗുപ്തയും പട്ടികയിലുണ്ട്. വിജയത്തിന് പിന്നാലെ ഒരു ഉപമുഖ്യമന്ത്രിയെ കൂടി നിയമിക്കുന്നതിനെക്കുറിച്ച് ബിജെപി നേതൃത്വം ആലോചിക്കുന്നുണ്ട്. ബംഗാളിന്റെ രാഷ്ട്രീയ ചരിത്രത്തിൽ ഒരു പുതിയ യുഗത്തിന് തുടക്കം കുറിച്ചുകൊണ്ടാണ് ബിജെപി അധികാരത്തിലേക്ക് നടന്നു കയറുന്നത്.
Story Summary
The BJP secured a historic landslide victory in West Bengal with 206 seats, ending Mamata Banerjee’s 15-year TMC rule. With Mamata losing her safe seat Bhabanipur to Suvendu Adhikari, the BJP is set to swear in its first Chief Minister on May 9.
