സിയോൾ: ഹോട്ടൽ മുറിയിലുടനീളം പടർന്നുകിടക്കുന്ന ഒരു വലിയ കട്ടിൽ സങ്കൽപ്പിച്ചു നോക്കൂ. ദക്ഷിണ കൊറിയയിലെ സിയോളിലുള്ള ഒരു ഹോട്ടലിലാണ് വിനോദസഞ്ചാരികളെ അമ്പരപ്പിക്കുന്ന ഈ ‘ഭീമൻ’ കട്ടിലുള്ളത് (World’s Largest Hotel Bed Seoul). നിലവിൽ സോഷ്യൽ മീഡിയയിൽ സ്റ്റാറാണ് ഈ ഭീമൻ കട്ടിൽ. മുറിയുടെ ഒരു അറ്റത്തുനിന്ന് മറ്റേ അറ്റത്തേക്ക് കട്ടിലിലൂടെ തന്നെ നടന്നു നീങ്ങാൻ സാധിക്കും എന്നതാണ് ഇതിന്റെ പ്രത്യേകത. ഏകദേശം 20 പേർക്ക് സുഖമായി ഉറങ്ങാൻ മാത്രമുള്ള വലിപ്പം ഈ കട്ടിലിനുണ്ട്.
കട്ടിലിന്റെ വലിപ്പം കണക്കിലെടുത്ത് മുറിയുടെ ഇരുവശങ്ങളിലുമായി രണ്ട് ടെലിവിഷനുകൾ സ്ഥാപിച്ചിട്ടുണ്ട്. ഒരു വശത്ത് കിടക്കുന്നയാൾക്ക് ദൂരെയുള്ള ടിവി കാണാൻ പ്രയാസമായതിനാലാണ് ഈ സജ്ജീകരണം. ‘BED 2525’ എന്ന് പേരിട്ടിരിക്കുന്ന ഈ കട്ടിൽ ബ്രൂക്ലിൻ ആസ്ഥാനമായുള്ള ‘MSCHF’ എന്ന ആർട്ട് ഗ്രൂപ്പാണ് രൂപകൽപ്പന ചെയ്തത്. സിയോളിലെ ഹോങ്ഡെയിലുള്ള റൈസ് ഹോട്ടലിലെ ക്യുറേറ്റർ സ്യൂട്ടിലാണ് ഇത് ഒരുക്കിയിരിക്കുന്നത്. 2025 ഫെബ്രുവരിയിലാണ് ഇത് വിനോദസഞ്ചാരികൾക്കായി തുറന്നുകൊടുത്തത്. ഈ പ്രത്യേക മുറിയിൽ ഒരു രാത്രി താമസിക്കാൻ ഏകദേശം 700 ഡോളറാണ് (ഏകദേശം 58,000 രൂപ) ചെലവ് വരുന്നത്.
ദക്ഷിണ കൊറിയയിലെ ചരിത്രപ്രധാനമായ കൊട്ടാരങ്ങളും കെ-പോപ്പ് സംസ്കാരവും സ്ട്രീറ്റ് ഫുഡും ആസ്വദിക്കാൻ എത്തുന്നവർക്ക് ഈ ഹോട്ടൽ താമസം ഒരു പുതിയ അനുഭവമായിരിക്കും. ലോകത്തിലെ തന്നെ ഏറ്റവും വലിയ ഹോട്ടൽ ബെഡ് എന്ന അവകാശവാദവുമായാണ് ഈ ആർട്ട് ഇൻസ്റ്റാളേഷൻ ശ്രദ്ധ നേടുന്നത്.
Summary: Travel vlogger Drew Falchook highlighted a unique hotel experience in Seoul featuring “BED 2525,” claimed to be the world’s largest hotel bed. Located in the Curator Suite at RYSE Hotel, the bed is so massive that guests can walk across the room without leaving the mattress. Created by the art collective MSCHF, the suite costs around $700 per night and features two televisions to accommodate its vast size.
