ഹാനോയ്: വിയറ്റ്നാമിലെ ഫൂ ക്വോക്ക് ദ്വീപിന് സമീപം 15 ഇന്ത്യൻ വിനോദസഞ്ചാരികളുടെ മരണത്തിനിടയാക്കിയ ബോട്ട് അപകടത്തിൽ സ്പീഡ് ബോട്ടിന്റെ ക്യാപ്റ്റനെ വിയറ്റ്നാം പോലീസ് അറസ്റ്റ് ചെയ്തു. ആൻ ജിയാങ് പ്രവിശ്യ സ്വദേശിയായ അൻഗുയെൻ ഹോങ് ഹായ് (57) എന്നയാളാണ് ഞായറാഴ്ച പിടിയിലായത്. ഇയാൾക്കെതിരെ ക്രിമിനൽ കുറ്റത്തിന് കേസെടുത്ത് അന്വേഷണം ആരംഭിച്ചതായി വിയറ്റ്നാം മാധ്യമങ്ങൾ റിപ്പോർട്ട് ചെയ്തു.(Vietnam boat tragedy, Speedboat Captain Arrested After Boat Capsize Kills Fifteen Indian Tourists)
അപകടത്തെക്കുറിച്ച് സമഗ്രമായ അന്വേഷണം നടത്താനും കുറ്റക്കാർക്കെതിരെ കർശന നിയമനടപടി സ്വീകരിക്കാനും വിയറ്റ്നാം പ്രധാനമന്ത്രി ലെ മിൻ ഹങ് അധികൃതർക്ക് നിർദ്ദേശം നൽകി. അന്വേഷണം പൂർത്തിയാകുന്നതുവരെ ഫൂ ക്വോക്ക് ദ്വീപിന് ചുറ്റുമുള്ള എല്ലാ സ്പീഡ് ബോട്ട് സർവീസുകളും താൽക്കാലികമായി നിർത്തിവച്ചിരിക്കുകയാണ്. ശനിയാഴ്ച 32 ഇന്ത്യൻ സഞ്ചാരികളും 4 വിയറ്റ്നാം ജീവനക്കാരുമായി സഞ്ചരിച്ച ബോട്ട് ഹോൺ മേ റൂട്ട് എൻഗോയ് ദ്വീപിന് സമീപം വച്ചാണ് മറിഞ്ഞത്.
അപകടത്തിൽ മരിച്ച 15 ഇന്ത്യക്കാരുടെയും മൃതദേഹങ്ങൾ ഞായറാഴ്ചയോടെ ഹോ ചി മിൻ സിറ്റിയിലേക്ക് മാറ്റി. ഇവിടെ ഔദ്യോഗിക നടപടികൾ പൂർത്തിയാക്കിയ ശേഷം മൃതദേഹങ്ങൾ ഉടൻ തന്നെ ഇന്ത്യയിലെത്തിക്കുമെന്ന് ഹാനോയിയിലെ ഇന്ത്യൻ എംബസി അറിയിച്ചു. അപകടത്തിൽ നിന്ന് രക്ഷപ്പെടുത്തിയ 17 ഇന്ത്യൻ വിനോദസഞ്ചാരികളിൽ 16 പേരും ജന്മനാട്ടിലേക്ക് തിരിച്ചു കഴിഞ്ഞു. പരിക്കേറ്റ ഒരാൾ നിലവിൽ ഫൂ ക്വോക്കിലെ ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലാണ്. വിയറ്റ്നാം സർക്കാരും ഇന്ത്യൻ നയതന്ത്ര കാര്യാലയവും സംയുക്തമായാണ് രക്ഷപ്പെട്ടവർക്കും മരിച്ചവരുടെ കുടുംബങ്ങൾക്കുമുള്ള തുടർസഹായങ്ങൾ ഏകോപിപ്പിക്കുന്നത്.
Story Summary
The captain of the speedboat that capsized near Vietnam’s Phu Quoc Island, killing 15 Indian tourists, has been arrested following a criminal probe. Vietnam’s Prime Minister ordered a thorough investigation and suspended all speedboat tours in the area, while the Indian Embassy coordinates the repatriation of the victims’ remains.
