ധാക്ക: മുൻ പ്രധാനമന്ത്രി ഷെയ്ഖ് ഹസീനയുടെ പ്രസ്താവനകളോ അഭിമുഖങ്ങളോ പ്രസിദ്ധീകരിക്കുന്നതിൽ നിന്ന് മാധ്യമങ്ങളെ വിലക്കി ബംഗ്ലാദേശ് ഭരണകൂടം. രാജ്യത്തെ മുഴുവൻ പത്ര, ഇലക്ട്രോണിക്, ഓൺലൈൻ, സോഷ്യൽ മീഡിയ പ്ലാറ്റ്ഫോമുകൾക്കും സർക്കാർ ഇത് സംബന്ധിച്ച കർശന നിർദേശം നൽകി ( Sheikh Hasina Media ban). അടുത്തിടെ റോയിട്ടേഴ്സ് വാർത്താ ഏജൻസിക്ക് ഷെയ്ഖ് ഹസീന നൽകിയ അഭിമുഖം ബംഗ്ലാദേശിലെ ചില മാധ്യമങ്ങൾ പ്രസിദ്ധീകരിച്ചതിന് പിന്നാലെയാണ് താരിഖ് റഹ്മാൻ ഭരണകൂടത്തിന്റെ ഈ നടപടി.
2024-ൽ അന്താരാഷ്ട്ര ക്രൈംസ് ട്രൈബ്യൂണൽ പുറപ്പെടുവിച്ച ഉത്തരവ് പ്രകാരം, കോടതി ശിക്ഷ വിധിച്ചതും ഒളിവിൽ കഴിയുന്നതുമായ കുറ്റവാളികളുടെ പ്രസ്താവനകളും അഭിമുഖങ്ങളും സംപ്രേഷണം ചെയ്യുന്നത് നിരോധിച്ചിട്ടുണ്ടെന്ന് സർക്കാർ വ്യക്തമാക്കി. ഈ നിയമപരമായ നിയന്ത്രണങ്ങൾ എല്ലാ മാധ്യമങ്ങളും പാലിക്കാൻ ബാധ്യസ്ഥരാണെന്നും ഉത്തരവിൽ പറയുന്നു. സർക്കാർ വിരുദ്ധ പ്രക്ഷോഭത്തെ അടിച്ചമർത്തിയെന്ന കേസിൽ ഹസീനയ്ക്ക് ബംഗ്ലാദേശിലെ കോടതി വധശിക്ഷ വിധിച്ചിരുന്നു.
ഡിസംബറോടെ ബംഗ്ലാദേശിലേക്ക് മടങ്ങുമെന്നും, അറസ്റ്റോ മരണമോ നേരിടേണ്ടി വന്നാലും മാതൃരാജ്യത്തേക്ക് പോകാൻ തയ്യാറാണെന്നും റോയിട്ടേഴ്സിനോട് ഹസീന വെളിപ്പെടുത്തിയിരുന്നു. മറ്റ് അവാമി ലീഗ് നേതാക്കളും തനിക്കൊപ്പം തിരിച്ചെത്തുമെന്നും അവർ വ്യക്തമാക്കി. 2024 ഓഗസ്റ്റിൽ നടന്ന വിദ്യാർത്ഥി പ്രക്ഷോഭത്തെ തുടർന്നാണ് ഹസീനയുടെ ഭരണകൂടം താഴെവീണത്. തുടർന്ന് ഇന്ത്യയിൽ അഭയം തേടിയ ഹസീനയെ വിട്ടുനൽകണമെന്ന് ബംഗ്ലാദേശ് പലതവണ ആവശ്യപ്പെട്ടിരുന്നു. ഈ സാഹചര്യത്തിൽ, അവരുടെ പ്രസ്താവനകൾ പ്രസിദ്ധീകരിക്കുന്നതിനെതിരെ കൈക്കൊണ്ട വിലക്ക് ബംഗ്ലാദേശിലെ രാഷ്ട്രീയ സാഹചര്യങ്ങളെ കൂടുതൽ സങ്കീർണ്ണമാക്കുകയാണ്.
Summary: The Bangladeshi administration, led by Tarique Rahman, has ordered all media platforms to strictly adhere to a court-mandated ban on broadcasting or publishing statements and interviews from former Prime Minister Sheikh Hasina. This directive follows media outlets carrying an interview where Hasina, who was sentenced to death in absentia, declared her intention to return to Bangladesh by December despite the legal risks.
