ഇസ്ലാമാബാദ്: സാങ്കേതിക തകരാറിനെ തുടർന്ന് അറബിക്കടലിൽ കുടുങ്ങിയ ‘എം.വി ഗൗതം’ എന്ന ഇന്ത്യൻ കപ്പലിന് പാകിസ്ഥാൻ നാവികസേന സഹായമെത്തിച്ചു. കപ്പലിലുണ്ടായിരുന്ന ആറ് ഇന്ത്യക്കാരും ഒരു ഇന്തോനേഷ്യൻ പൗരനും ഉൾപ്പെടെ ഏഴ് ജീവനക്കാരെയാണ് പാക് നാവികസേന രക്ഷപ്പെടുത്തിയത്. ഒമാനിൽ നിന്ന് ഇന്ത്യയിലേക്ക് വരികയായിരുന്നു കപ്പൽ (Pakistan Navy rescues Indian ship MV Gautam).
മുംബൈയിലെ മാരിടൈം റെസ്ക്യൂ ആൻഡ് കോർഡിനേഷൻ സെന്റർ (MRCC) പാക് അധികൃതരുമായി ബന്ധപ്പെട്ടതിനെത്തുടർന്നാണ് രക്ഷാപ്രവർത്തനം ആരംഭിച്ചത്. പാകിസ്ഥാൻ മാരിടൈം സെക്യൂരിറ്റി ഏജൻസിയുടെ സഹായത്തോടെ ‘പി.എം.എസ്.എസ് കശ്മീർ’ എന്ന കപ്പലാണ് രക്ഷാപ്രവർത്തനത്തിനായി അയച്ചത്. ജീവനക്കാർക്ക് ആവശ്യമായ ഭക്ഷണവും മരുന്നും സാങ്കേതിക സഹായവും നൽകിയതായി പാക് സൈന്യം പ്രസ്താവനയിൽ അറിയിച്ചു.
യുദ്ധസമാനമായ സാഹചര്യങ്ങളും രാഷ്ട്രീയ സംഘർഷങ്ങളും മേഖലയിൽ നിലനിൽക്കുമ്പോഴും, കടലിലെ മാനുഷിക പരിഗണന മുൻനിർത്തി പാകിസ്ഥാൻ നടത്തിയ ഈ നീക്കം ശ്രദ്ധേയമായി. കഴിഞ്ഞ മാസം മറ്റൊരു ചരക്കുകപ്പലിലെ 18 ജീവനക്കാരെയും പാക് നാവികസേന സമാനമായ രീതിയിൽ രക്ഷപ്പെടുത്തിയിരുന്നു.
Summary: The Pakistan Navy rescued seven crew members, including six Indians, from the stranded Indian vessel MV Gautam in the Arabian Sea. After a technical failure left the ship drifting, the Pakistan Navy responded to a distress call coordinated by Mumbai’s Maritime Rescue and Coordination Centre. Emergency aid, including food and medical support, was provided by the Pakistani vessel PMSS Kashmir.
