ഡബ്ലിൻ: അധിനിവിഷ്ട വെസ്റ്റ് ബാങ്കിലെ ഹമ്മമത്ത് അൽ-മാലിഹ് എന്ന ഗ്രാമത്തിൽ അയർലൻഡ് ഉൾപ്പെടെയുള്ള രാജ്യങ്ങളുടെ സാമ്പത്തിക സഹായത്തോടെ നിർമ്മിച്ച സ്കൂൾ ഇസ്രായേലി കുടിയേറ്റക്കാർ തകർത്തു ( Irish Aid Funded School Destroyed Israel). സംഭവത്തിൽ ഇസ്രായേൽ അധികൃതരിൽ നിന്ന് ഔദ്യോഗികമായി നഷ്ടപരിഹാരം ആവശ്യപ്പെടുമെന്ന് അയർലൻഡ് വിദേശകാര്യ മന്ത്രാലയം അറിയിച്ചു.
ഏകദേശം 60 കുട്ടികൾ പഠിച്ചിരുന്ന ഈ കമ്മ്യൂണിറ്റി സ്കൂൾ കഴിഞ്ഞ ചൊവ്വാഴ്ച വൈകുന്നേരമാണ് ബുൾഡോസറുകൾ ഉപയോഗിച്ച് തകർത്തത്. അയർലൻഡിന് പുറമെ യൂറോപ്യൻ യൂണിയനിലെ 11 രാജ്യങ്ങളും കാനഡയും യുകെയും ചേർന്നാണ് ഈ സ്കൂളിന്റെ നവീകരണത്തിനും പ്രവർത്തനത്തിനുമായി ഫണ്ട് നൽകിയിരുന്നത്.
ഈ പ്രദേശത്തെ ബെഡൂയിൻ സമൂഹത്തെ നേരത്തെ തന്നെ അവിടെ നിന്നും നിർബന്ധപൂർവ്വം കുടിയൊഴിപ്പിച്ചിരുന്നു. അതിന് പിന്നാലെയാണ് വിദ്യാഭ്യാസ സ്ഥാപനങ്ങളും വീടുകളും തകർത്തിരിക്കുന്നത്. അയർലൻഡിന്റെ പ്രതിക സ്കൂൾ തകർത്ത നടപടി അങ്ങേയറ്റം പ്രതിഷേധാർഹവും അന്താരാഷ്ട്ര നിയമങ്ങളുടെ ലംഘനവുമാണെന്ന് അയർലൻഡ് വിദേശകാര്യ മന്ത്രി ഹെലൻ മക്ഇന്റി പ്രസ്താവനയിൽ പറഞ്ഞു. ഇതിന്റെ മുഴുവൻ ചിലവും ഇസ്രായേൽ തിരിച്ചുനൽകണമെന്ന് അവർ ആവശ്യപ്പെട്ടു. 2015 മുതൽ ഇസ്രായേൽ സേന തകർക്കുകയോ പിടിച്ചെടുക്കുകയോ ചെയ്ത ആസ്തികൾക്കായി 1.7 മില്യൺ യൂറോ (ഏകദേശം 15 കോടി രൂപ) നഷ്ടപരിഹാരം ആവശ്യപ്പെട്ട് അയർലൻഡും പങ്കാളിത്ത രാജ്യങ്ങളും നേരത്തെ അപേക്ഷ നൽകിയിരുന്നു. എന്നാൽ ഇതുവരെ ഇസ്രായേൽ പണം നൽകിയിട്ടില്ല.
കഴിഞ്ഞ കുറച്ചു മാസങ്ങളായി വെസ്റ്റ് ബാങ്കിൽ ഇസ്രായേലി കുടിയേറ്റക്കാരുടെ അക്രമം വർദ്ധിച്ചുവരികയാണെന്ന് മനുഷ്യാവകാശ സംഘടനകൾ ചൂണ്ടിക്കാട്ടുന്നു. സോളാർ പാനലുകൾ നശിപ്പിക്കുക, വെള്ളം തടയുക തുടങ്ങിയ രീതികളിലൂടെ പലസ്തീൻ ജനതയെ അവിടെ നിന്നും തുരത്താനാണ് നീക്കം നടക്കുന്നത്. അന്താരാഷ്ട്ര നിയമപ്രകാരം വെസ്റ്റ് ബാങ്കിലെ എല്ലാ ഇസ്രായേലി കുടിയേറ്റ കേന്ദ്രങ്ങളും അനധികൃതമാണ്. വിദ്യാഭ്യാസ സ്ഥാപനങ്ങൾക്ക് നേരെയുള്ള ഇത്തരം ആക്രമണങ്ങൾ ആഗോളതലത്തിൽ വലിയ വിമർശനങ്ങൾക്കിടയാക്കിയിട്ടുണ്ട്.
Summary: Ireland and several EU partner nations will seek compensation from Israel after settlers demolished a school co-funded by Irish Aid in the occupied West Bank. The school in Hammamat al-Maleh served about 60 children and was destroyed earlier this week using bulldozers. Foreign Minister Helen McEntee condemned the act as a grave violation of international law. This follows a previous outstanding demand for €1.7 million in compensation for assets seized or destroyed by Israel since 2015.
