ടെഹ്റാൻ: പേർഷ്യൻ ഗൾഫിലെ സംഘർഷം പുതിയ തലങ്ങളിലേക്ക്. ഹോർമുസ് കടലിടുക്കിൽ അമേരിക്ക ഏർപ്പെടുത്തിയ നാവിക ഉപരോധം തുടർന്നാൽ അമേരിക്കൻ യുദ്ധക്കപ്പലുകൾ മുക്കുമെന്ന് ഇറാൻ മുന്നറിയിപ്പ് നൽകി (Iran Threatens US Ships). ഇറാന്റെ പത്ത് എണ്ണക്കപ്പലുകൾ ഇതിനോടകം തടഞ്ഞുവെച്ചിട്ടുണ്ടെന്ന അമേരിക്കയുടെ അവകാശവാദത്തിന് പിന്നാലെയാണ് ഇറാന്റെ ഈ കടുത്ത ഭീഷണി. ഉപരോധം തുടരുകയാണെങ്കിൽ പേർഷ്യൻ ഗൾഫിന് പുറമെ ഒമാൻ കടലിലും ചെങ്കടലിലും അമേരിക്കൻ കപ്പലുകൾ തടയുമെന്നും ഇറാൻ വ്യക്തമാക്കി.
റഷ്യയിൽ നിന്നും ഇറാനിൽ നിന്നും എണ്ണ വാങ്ങുന്നതിന് നൽകിയിരുന്ന ഇളവുകൾ നീട്ടില്ലെന്ന് അമേരിക്കൻ ട്രഷറി സെക്രട്ടറി സ്കോട്ട് ബെസന്റ് അറിയിച്ചു. റഷ്യൻ എണ്ണയ്ക്കുള്ള ഇളവ് ഏപ്രിൽ 11-ന് അവസാനിച്ചിരുന്നു. ഇറാന്റെ ഇളവ് ഏപ്രിൽ 19-ഓടെ അവസാനിക്കും. ആഗോള എണ്ണവില നിയന്ത്രിക്കുന്നതിനായി ഇന്ത്യൻ റിഫൈനറികൾക്ക് റഷ്യൻ എണ്ണ വാങ്ങാൻ നൽകിയ 30 ദിവസത്തെ ഇളവ് നീട്ടണമെന്ന് ഇന്ത്യ ഉൾപ്പെടെയുള്ള രാജ്യങ്ങൾ ആവശ്യപ്പെട്ടിരുന്നുവെങ്കിലും അമേരിക്ക ഇത് നിരാകരിക്കുകയായിരുന്നു.
സംഘർഷം ലഘൂകരിക്കുന്നതിനായി അമേരിക്ക-ഇറാൻ രണ്ടാംവട്ട ചർച്ചകൾക്കായി പാകിസ്ഥാൻ സൈനിക മേധാവിയുടെ നേതൃത്വത്തിലുള്ള സംഘം ഇറാനിലെത്തിയിട്ടുണ്ട്. ഇതിനിടയിലാണ് യുദ്ധഭീഷണി മുഴക്കി ഇറാൻ രംഗത്തെത്തിയത്.
അമേരിക്കയുടെ ഉപരോധം ആഗോള എണ്ണ വിപണിയെയും ഊർജ്ജ വിതരണത്തെയും സാരമായി ബാധിച്ചിരിക്കുകയാണ്. ഹോർമുസ് കടലിടുക്ക് പോലുള്ള തന്ത്രപ്രധാനമായ മേഖലകളിൽ ഇറാൻ കപ്പലുകൾ തടയാൻ തുടങ്ങിയാൽ അത് വലിയൊരു സൈനിക നീക്കത്തിന് വഴിവെച്ചേക്കാം എന്ന ആശങ്കയിലാണ് ലോകരാജ്യങ്ങൾ.
Summary: Iran has threatened to sink US warships if the naval blockade in the Strait of Hormuz continues. This comes after the US claimed to have intercepted ten Iranian oil tankers. US Treasury Secretary Scott Bessent clarified that sanctions waivers for purchasing oil from Russia and Iran will not be extended. While Russia’s waiver expired on April 11, Iran’s is set to end on April 19. Despite requests from countries like India to extend the relief, the US remains firm. Meanwhile, a Pakistani military delegation has arrived in Tehran to mediate peace talks between Washington and Tehran.
