ടെഹ്റാൻ: അമേരിക്കയുമായി പുതിയ ഘട്ട ചർച്ചകൾക്ക് നിലവിൽ താല്പര്യമില്ലെന്ന് ഇറാൻ വിദേശകാര്യ മന്ത്രാലയം അറിയിച്ചു (Iran US Conflict). ഇസ്ലാമാബാദിൽ നടക്കാനിരിക്കുന്ന സമാധാന ചർച്ചകളിൽ ഇറാൻ പങ്കെടുക്കുമോ എന്ന കാര്യത്തിൽ അനിശ്ചിതത്വം തുടരുകയാണ്.
നിലവിലെ വെടിനിർത്തൽ കരാർ അമേരിക്ക ലംഘിച്ചതായി ഇറാൻ വിദേശകാര്യ വക്താവ് എസ്മായിൽ ബഖാഇ ആരോപിച്ചു. ഇറാന്റെ ചരക്കുകപ്പൽ പിടിച്ചെടുത്തതും നാവിക ഉപരോധം തുടരുന്നതും ഇതിന്റെ തെളിവാണെന്ന് അദ്ദേഹം ചൂണ്ടിക്കാട്ടി. അമേരിക്കയുടെ ഭാഗത്തുനിന്ന് ഗൗരവകരമായ നീക്കങ്ങൾ ഉണ്ടാകുന്നില്ലെന്നും ചർച്ചകൾക്കൊണ്ട് ഫലമില്ലെന്നുമാണ് ഇറാന്റെ നിലപാട്.
അതേസമയം , ഇറാന്റെ കടുത്ത നിലപാടിന് പിന്നാലെ, ഇറാനുമേലുള്ള നാവിക ഉപരോധം തുടരുമെന്ന് യുഎസ് സെൻട്രൽ കമാൻഡ് (CENTCOM) വ്യക്തമാക്കി. ഇത് മേഖലയിലെ എണ്ണ നീക്കത്തെ വീണ്ടും പ്രതിസന്ധിയിലാക്കും. ഇറാനെ ചർച്ചാ മേശയിലേക്ക് എത്തിക്കാൻ പാകിസ്ഥാൻ ഊർജിതമായ ശ്രമങ്ങൾ നടത്തുന്നുണ്ടെങ്കിലും ഇതുവരെ ഫലം കണ്ടിട്ടില്ല.
ഇറാൻ ഉടമ്പടിക്ക് തയ്യാറായില്ലെങ്കിൽ രാജ്യത്തെ ഊർജ്ജ നിലയങ്ങൾ ആക്രമിക്കുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് നേരത്തെ മുന്നറിയിപ്പ് നൽകിയിരുന്നു. ഇതോടെ മേഖലയിൽ വീണ്ടും യുദ്ധഭീതി ശക്തമായിരിക്കുകയാണ്. രണ്ടാംഘട്ട ചർച്ചകൾക്കായി അമേരിക്കൻ സംഘം ഇസ്ലാമാബാദിൽ എത്തുമ്പോൾ ഇറാൻ വിട്ടുനിൽക്കുകയാണെങ്കിൽ, അത് നയതന്ത്ര തലത്തിൽ വലിയ തിരിച്ചടിയാകും.
Story Summary: Iran has reiterated its refusal to engage in the second round of peace talks with the US in Islamabad. Spokesperson Esmaeil Baghaei accused the US of violating ceasefire terms by seizing cargo ships and maintaining the naval blockade. Meanwhile, the US Central Command confirmed that the blockade will persist, as President Trump previously threatened to strike Iran’s energy plants if no agreement is reached.
