ലോസ് ആഞ്ചലസ്: ദക്ഷിണ കാലിഫോർണിയയിലെ ഗാർഡൻ ഗ്രോവിലുള്ള കെമിക്കൽ ഫാക്ടറിയിൽ വൻ സ്ഫോടനമുണ്ടാകുമെന്ന ഭീതി ഒഴിഞ്ഞതോടെ പ്രദേശവാസികൾക്കായി പുറപ്പെടുവിച്ചിരുന്ന കൂട്ട ഒഴിപ്പിക്കൽ ഉത്തരവ് ഭാഗികമായി പിൻവലിച്ചു. ഫാക്ടറിയിലെ തകരാറിലായ ടാങ്കിനുള്ളിലെ താപനില കുറഞ്ഞതോടെയാണ് വൻ ദുരന്തസാധ്യത ഒഴിവായതെന്ന് അടിയന്തര വിഭാഗം ഉദ്യോഗസ്ഥർ അറിയിച്ചു.(California Chemical Tank Explosion Threat Averted Residents Return Home In Garden Grove)
‘ജികെഎൻ എയറോസ്പേസ് ട്രാൻസ്പെരൻസി സിസ്റ്റംസ്’ പ്ലാന്റിലെ ടാങ്കിൽ സൂക്ഷിച്ചിരുന്ന രാസവസ്തുക്കൾ അമിതമായി ചൂടായതിനെ തുടർന്നാണ് വ്യാഴാഴ്ച മുതൽ അധികൃതർ ജനങ്ങളോട് ഒഴിഞ്ഞുപോകാൻ ആവശ്യപ്പെട്ടത്. വാരാന്ത്യത്തോടെ ഏകദേശം 50,000-ത്തോളം താമസക്കാരെ ഇവിടെ നിന്നും മാറ്റിപ്പാർപ്പിച്ചിരുന്നു. പ്ലാന്റിലെ ടാങ്കിൽ അതീവ ജ്വലനശേഷിയുള്ള 6,000 മുതൽ 7,000 ഗാലൻ വരെ ‘മെഥൈൽ മെതാക്രിലേറ്റ്’ എന്ന രാസവസ്തുവാണ് ഉണ്ടായിരുന്നത്.
ടാങ്കിന് ചെറിയൊരു വിള്ളൽ സംഭവിച്ചതിനെത്തുടർന്ന് ഉള്ളിലെ അമിത സമ്മർദ്ദം കുറഞ്ഞതായും വലിയൊരു ദുരന്തസാധ്യത പൂർണ്ണമായും ഒഴിവായതായും ഓറഞ്ച് കൗണ്ടി ഫയർ അതോറിറ്റി ഡിവിഷൻ ചീഫ് ക്രെയ്ഗ് കോവി വാർത്താസമ്മേളനത്തിൽ വ്യക്തമാക്കി. ഇതോടെ ഒഴിപ്പിക്കപ്പെട്ടവരിൽ മൂന്നിൽ രണ്ട് ഭാഗത്തോളം വരുന്ന (ഏകദേശം 34,000 പേർ) ജനങ്ങൾക്ക് വീടുകളിലേക്ക് മടങ്ങാൻ അനുമതി നൽകി. എന്നാൽ അപകടസാധ്യത പൂർണ്ണമായും മാറിയിട്ടില്ലെന്നും ചെറിയ തോതിലുള്ള തീപിടുത്തത്തിനോ ചോർച്ചയ്ക്കോ ഇനിയും സാധ്യതയുള്ളതിനാൽ ജാഗ്രത തുടരുമെന്നും അദ്ദേഹം കൂട്ടിച്ചേർത്തു.
പ്ലാന്റിൽ നിന്ന് രാസവസ്തുക്കളുടെ ചോർച്ചയോ വിഷവാതക വ്യാപനമോ ഉണ്ടായിട്ടില്ലെന്നും മടങ്ങിയെത്തുന്ന ജനങ്ങൾ ഭയപ്പെടേണ്ട സാഹചര്യമില്ലെന്നും ഓറഞ്ച് കൗണ്ടി ഹെൽത്ത് ഡയറക്ടർ റെജീന ചിൻസിയോ-ക്വോങ് ഉറപ്പുനൽകി. പ്ലാസ്റ്റിക്കുകൾ നിർമ്മിക്കാൻ ഉപയോഗിക്കുന്ന ഈ രാസവസ്തു ശ്വസിക്കുന്നത് ഗുരുതരമായ ശ്വാസകോശ, നാഡീവ്യൂഹ പ്രശ്നങ്ങൾക്ക് കാരണമാകാറുണ്ട്. ബ്രിട്ടീഷ് കമ്പനിയായ ജികെഎൻ എയറോസ്പേസ് സൈനിക-വാണിജ്യ വിമാനങ്ങൾക്കായുള്ള കോക്ക്പിറ്റ് വിൻഡോകളും വിൻഡ്ഷീൽഡുകളുമാണ് ഈ ഫാക്ടറിയിൽ നിർമ്മിക്കുന്നത്.
Story Summary
Emergency officials in Southern California have partially lifted the evacuation order for Garden Grove residents after temperatures inside a chemical tank at GKN Aerospace stabilized, neutralizing the risk of a catastrophic explosion. Around 34,000 residents have been permitted to return home as emergency crews continue to monitor the highly flammable methyl methacrylate tank.
