മഷാദ്: യുഎസ്-ഇസ്രായേൽ വ്യോമാക്രമണത്തിൽ കൊല്ലപ്പെട്ട ഇറാന്റെ മുൻ പരമോന്നത നേതാവ് ആയത്തുള്ള അലി ഖമേനിയുടെ മൃതദേഹം മഷാദിലെ ഇമാം റെസ തീർത്ഥാടന കേന്ദ്രത്തിൽ സംസ്കരിച്ചു. ഒരാഴ്ച നീണ്ടുനിന്ന വിലാപയാത്രകൾക്കും ഔദ്യോഗിക ചടങ്ങുകൾക്കും ശേഷമാണ് പുലർച്ചെയോടെ സംസ്കാര ചടങ്ങുകൾ പൂർത്തിയായത്. എന്നാൽ, പിതാവിന്റെ മരണത്തെത്തുടർന്ന് പുതിയ പരമോന്നത നേതാവായി പ്രഖ്യാപിക്കപ്പെട്ട മകൻ മുജ്തബ ഖമേനി ചടങ്ങുകളിലുടനീളം പരസ്യമായി പ്രത്യക്ഷപ്പെടാതിരുന്നത് വലിയ രീതിയിൽ ശ്രദ്ധിക്കപ്പെട്ടു.(Ayatollah Ali Khamenei Funeral, Former Iran Supreme Leader Ayatollah Ali Khamenei Buried In Mashhad)
ഫെബ്രുവരി 28-നാണ് അമേരിക്കയും ഇസ്രായേലും നടത്തിയ ആക്രമണത്തിൽ ഖമേനി കൊല്ലപ്പെടുന്നത്. തുടർന്ന് മാർച്ചിലാണ് മുജ്തബയെ പുതിയ നേതാവായി പ്രഖ്യാപിച്ചത്. പിതാവ് കൊല്ലപ്പെട്ട അതേ ആക്രമണത്തിൽ മുജ്തബയ്ക്ക് ഗുരുതരമായി പരിക്കേറ്റിരുന്നുവെന്നും, മുഖത്തും അവയവങ്ങൾക്കും സംഭവിച്ച പരിക്കുകളിൽ നിന്ന് അദ്ദേഹം പൂർണ്ണമായി മുക്തനായിട്ടില്ലെന്നുമാണ് ടെഹ്റാനിൽ നിന്നുള്ള ഔദ്യോഗിക വൃത്തങ്ങൾ നൽകുന്ന സൂചന. സുരക്ഷാ കാരണങ്ങളാലും അദ്ദേഹം പൊതുവേദികളിൽ നിന്ന് വിട്ടുനിൽക്കുകയാണ്. ഖമേനിയുടെ മൂത്തമകൻ മുസ്തഫയാണ് മഷാദിൽ നടന്ന വിലാപ ചടങ്ങുകൾക്ക് നേതൃത്വം നൽകിയത്.
വിലപയാത്രയിലുടനീളം അമേരിക്കക്കെതിരെയും യുഎസ് പ്രസിഡന്റ് ഡൊണാൾഡ് ട്രംപിനെതിരെയും ശക്തമായ പ്രതിഷേധ മുദ്രാവാക്യങ്ങളാണ് ഉയർന്നത്. ഖമേനിയുടെ മരണത്തിന് പ്രതികാരം ചെയ്യുമെന്ന് ജനക്കൂട്ടം വിളിച്ചുപറഞ്ഞു. ഇറാന്റെയും ഇറാഖിന്റെയും വിവിധ നഗരങ്ങളിൽ പൊതുദർശനത്തിന് വെച്ച ശേഷമാണ് ഭൗതികശരീരം മഷാദിൽ എത്തിച്ചത്. ഖമേനിയുടെ അന്ത്യത്തോടെ രാജ്യത്ത് ഒരു യുഗത്തിനാണ് വിരാമമാകുന്നത്.
Story Summary
Former Iranian Supreme Leader Ayatollah Ali Khamenei was buried at the Imam Reza Shrine in Mashhad after a week of nationwide mourning. His son and successor, Mojtaba Khamenei, remained absent from the public eye during the funeral due to injuries sustained in the same attack that killed his father.
