തിരുവനന്തപുരം: കേരള ക്രിക്കറ്റ് ലീഗിന്റെ (Kerala cricket league season 3) മൂന്നാം സീസണിന് കളമൊരുങ്ങുമ്പോൾ വീണ്ടുമൊരു തവണ കൂടി ശ്രദ്ധാകേന്ദ്രമാവുകയാണ് തിരുവനന്തപുരത്തിന്റെ ക്രിക്കറ്റ് കരുത്ത്. ഇത്തവണ തിരുവനന്തപുരത്തുനിന്നുള്ള 17 താരങ്ങളാണ് വിവിധ ടീമുകളിലായി അണിനിരക്കുന്നത്. കെസിഎല്ലിന് മുന്നോടിയായി നടന്ന എൻഎസ്കെ ട്രോഫിയിലും തിരുവനന്തപുരം ഫൈനലിലെത്തിയിരുന്നു. നേരിയ വ്യത്യാസത്തിലായിരുന്നു എറണാകുളത്തോട് തിരുവനന്തപുരത്തിന് കിരീടം നഷ്ടപ്പെട്ടത്.
ടൂർണമെന്റിൽ കിരീടം ലക്ഷ്യമിട്ട് ഇറങ്ങുന്ന പ്രമുഖ ടീമുകളിൽ ഒന്നായ ‘ട്രിവാൻഡ്രം റോയൽസ്’ വളരെ ശക്തമായ നിരയുമായാണ് ഇത്തവണ ഒരുങ്ങുന്നത്. തലസ്ഥാന നഗരിയുടെ ക്രിക്കറ്റ് പെരുമ കാക്കാൻ തിരുവനന്തപുരത്തുനിന്നുള്ള അഞ്ച് താരങ്ങളാണ് ഇത്തവണ റോയൽസ് ജേഴ്സിയിൽ അണിനിരക്കുന്നത്. കൃഷ്ണ പ്രസാദ്, അഭിഷേക് പി. നായർ, ഭരത് സൂര്യ, അജീഷ് കെ., രാഹുൽ ചന്ദ്രൻ എന്നിവരടങ്ങുന്ന ഈ അഞ്ചംഗ സംഘം ടീമിന്റെ നട്ടെല്ലാകുമെന്നാണ് വിലയിരുത്തൽ. കഴിഞ്ഞ സീസണിൽ റൺവേട്ടയിൽ മുന്നിലെത്തിയ ആദ്യ രണ്ട് പേരും തിരുവനന്തപുരത്തുനിന്നുള്ള താരങ്ങളായിരുന്നു. 479 റൺസുമായി കൃഷ്ണപ്രസാദും 437 റൺസുമായി അഹ്മദ് ഇമ്രാനും ലീഗിൽ തിളങ്ങി. കൃഷ്ണപ്രസാദിനെ ട്രിവാൻഡ്രം റോയൽസും അഹ്മദ് ഇമ്രാനെ തൃശൂർ ടൈറ്റൻസും ലേലത്തിൽ നിലനിർത്തിയിട്ടുണ്ട്. ഇരുവർക്കും ഏഴര ലക്ഷം രൂപ വീതമാണ് ലേലത്തിൽ ലഭിച്ചത്.
കൂടാതെ ഷോൺ റോജർ, അഭിഷേക് ജെ. നായർ, മാനവ് കൃഷ്ണ, കൃഷ്ണദേവൻ തുടങ്ങി ബാറ്റർമാരുടെ നീണ്ടൊരു നിര തന്നെ തിരുവനന്തപുരത്തിന്റെ അഭിമാനമായി കളത്തിലിറങ്ങുന്നുണ്ട്. കഴിഞ്ഞ രണ്ട് സീസണിലും ബാറ്റിങ്ങിൽ സ്ഥിരത പുലർത്തിയ അഭിഷേക് ജെ. നായർ ഇക്കുറിയും കൊല്ലം സെയിലേഴ്സിനൊപ്പം തന്നെയാണ്. യുവതാരങ്ങളായ ഷോൺ റോജറും മാനവ് കൃഷ്ണയും തൃശൂരിനായാണ് പാഡുകെട്ടുന്നത്. ദേശീയ അണ്ടർ-19 താരമായ മാനവ് കൃഷ്ണയുടെ ആദ്യ കെസിഎൽ സീസൺ കൂടിയാണിത്. വെടിക്കെട്ട് ഇന്നിങ്സുകളിലൂടെ കഴിഞ്ഞ സീസണിൽ ശ്രദ്ധിക്കപ്പെട്ട കൃഷ്ണദേവനും എ.കെ. അർജുനും ഏറെ പ്രതീക്ഷ നൽകുന്ന താരങ്ങളാണ്.
ബാറ്റിങ്ങിലെപ്പോലെ ബൗളിങ്ങിലും ഓൾറൗണ്ട് മികവിലും വിവിധ ടീമുകൾക്ക് കരുത്തായി തിരുവനന്തപുരത്തിന്റെ താരങ്ങൾ രംഗത്തുണ്ട്. കഴിഞ്ഞ സീസണിൽ ഏറ്റവും കൂടുതൽ വിക്കറ്റ് നേടിയ താരങ്ങളിലൊരാളായ അഭിജിത്ത് പ്രവീൺ ആറ് ലക്ഷം രൂപയ്ക്ക് ആലപ്പി റിപ്പിൾസിലാണ് ഇത്തവണ കളിക്കുന്നത്. ബിജു നാരായണൻ, വിജയ് വിശ്വനാഥ്, ശരത്ചന്ദ്രപ്രസാദ്, ഏദൻ ആപ്പിൾ ടോം, രാഹുൽ ചന്ദ്രൻ, മുഹമ്മദ് ഷാനു എന്നിവരും ഇത്തവണ തിരുവനന്തപുരത്തിന്റെ പ്രാദേശിക പ്രതിനിധികളായി കെസിഎൽ കളത്തിലിറങ്ങും.
Story Summary:
Thiruvananthapuram continues to showcase its cricket dominance in the 3rd season of the Kerala Cricket League (KCL) with 17 players selected across various franchises. Key players like Krishna Prasad and Ahmad Imran were retained for ₹7.5 lakh each, while Abhijith Praveen joins Alleppey Ripples for ₹6 lakh.
