ഡെറാഡൂൺ: ഉത്തരാഖണ്ഡ് ഗോൾഡ് കപ്പ് അഖിലേന്ത്യാ ക്രിക്കറ്റ് ടൂർണമെന്റിൽ (Uttarakhand Gold Cup) കേരളത്തിന് കനത്ത തോൽവി (Uttarakhand Gold Cup cricket tournament). കരുത്തരായ എൽ.ബി. ശാസ്ത്രി ക്രിക്കറ്റ് ക്ലബ്ബാണ് (LB Shastri CC) 54 റൺസിന് കേരളത്തെ തകർത്തത്. കനത്ത മഴ മൂലം ഇരുവിഭാഗത്തിനും 20 ഓവർ വീതമാക്കി ചുരുക്കിയ ട്വന്റി-20 മത്സരത്തിൽ ആദ്യം ബാറ്റ് ചെയ്ത എൽ.ബി. ശാസ്ത്രി ടീം നിശ്ചിത ഓവറിൽ അഞ്ച് വിക്കറ്റ് നഷ്ടത്തിൽ 212 റൺസെന്ന കൂറ്റൻ സ്കോർ പടുത്തുയർത്തി. മറുപടി ബാറ്റിങ്ങിന് ഇറങ്ങിയ കേരളത്തിന് എൽ.ബി. ശാസ്ത്രി ക്ലബ്ബിന്റെ കൃത്യതയാർന്ന ബൗളിങ്ങിന് മുന്നിൽ അടിപതറുകയായിരുന്നു. 17.3 ഓവറിൽ വെറും 158 റൺസിന് കേരളത്തിന്റെ എല്ലാ വിക്കറ്റുകളും നഷ്ടമായി.
സ്കോർ ചുരുക്കത്തിൽ:
എൽ.ബി. ശാസ്ത്രി ക്ലബ്ബ്: 20 ഓവറിൽ 212/5
കേരളം: 17.3 ഓവറിൽ 158/10
മത്സരത്തിൽ ടോസ് നഷ്ടപ്പെട്ട് ആദ്യം ബാറ്റിങ്ങിന് ഇറങ്ങേണ്ടി വന്ന എൽ.ബി. ശാസ്ത്രി ക്ലബ്ബിന് ക്യാപ്റ്റൻ ആര്യൻ ജൂയലിന്റെ തകർപ്പൻ വെടിക്കെട്ട് ഇന്നിങ്സ് മികച്ച അടിത്തറയാണ് നൽകിയത്. ഓപ്പണറായി ഇറങ്ങിയ ആര്യൻ വെറും 25 പന്തുകളിൽ നിന്നും 58 റൺസ് വാരിക്കൂട്ടി. ആര്യനും സഹ ഓപ്പണർ സൂരജ് വസിഷ്ഠും ചേർന്ന് ഒന്നാം വിക്കറ്റിൽ 77 റൺസിന്റെ മികച്ച കൂട്ടുകെട്ടാണ് ഉണ്ടാക്കിയത്. സൂരജ് വസിഷ്ഠ് 28 റൺസ് നേടി പുറത്തായി. തുടർന്ന് മധ്യനിരയിൽ എത്തിയ ബാറ്റ്സ്മാൻമാരും കൂറ്റൻ ഷോട്ടുകളുമായി കളം നിറഞ്ഞതോടെ ഡൽഹി ടീമിന്റെ സ്കോർ അതിവേഗം 200 കടന്ന് മുന്നേറുകയായിരുന്നു. തേജസ്വി 20 പന്തുകളിൽ 39 റൺസും, ജോണ്ടി സിദ്ധു 15 പന്തുകളിൽ 26 റൺസും, ശിവ സിങ് 11 പന്തുകളിൽ 23 റൺസും നേടി സ്കോർ ഉയർത്തി. കേരളത്തിന് വേണ്ടി സിജോമോൻ ജോസഫും അഭിഷേകും രണ്ട് വിക്കറ്റ് വീതം വീഴ്ത്തി തിളങ്ങി.
തുടർന്ന് 213 റൺസ് എന്ന കൂറ്റൻ വിജയലക്ഷ്യം പിന്തുടർന്ന് മറുപടി ബാറ്റിങ്ങിന് ഇറങ്ങിയ കേരളത്തിന് തുടക്കത്തിൽ തന്നെ വിക്കറ്റുകൾ നഷ്ടമായി. മധ്യനിരയിൽ അഹമ്മദ് ഇമ്രാനും ക്യാപ്റ്റൻ സൽമാൻ നിസാറും മാത്രമാണ് എൽ.ബി. ശാസ്ത്രി ബൗളർമാർക്കെതിരെ അല്പമെങ്കിലും ചെറുത്തുനിൽപ്പ് നടത്തിയത്. അഹമ്മദ് ഇമ്രാൻ 14 പന്തുകളിൽ 31 റൺസും, നായകൻ സൽമാൻ നിസാർ 24 പന്തുകളിൽ 37 റൺസും നേടി. എന്നാൽ മറ്റു മുൻനിര താരങ്ങൾ റൺസ് കണ്ടെത്താനാകാതെ പരാജയപ്പെട്ടതോടെ 17.3 ഓവറിൽ 158 റൺസിന് കേരളം കളം വിടുകയായിരുന്നു. എൽ.ബി. ശാസ്ത്രി ടീമിന് വേണ്ടി നിഖിൽ കുമാർ മൂന്ന് വിക്കറ്റുകൾ വീഴ്ത്തി. ശിവ സിങ്, അമിത് ശുക്ല എന്നിവർ രണ്ട് വിക്കറ്റ് വീതവും സ്വന്തമാക്കി ടീമിന്റെ വിജയം ഉറപ്പിച്ചു.
Story Summary: Kerala suffered a 54-run defeat against LB Shastri Cricket Club in the rain-shortened 20-over match of the Uttarakhand Gold Cup in Dehradun. Driven by captain Aryan Juyal’s explosive 58 runs, LB Shastri CC set a target of 212, while Kerala collapsed for 158 runs despite Salman Nizar’s 37.
