മുംബൈ: ഐ.പി.എൽ 2026-ൽ ലഖ്നൗ സൂപ്പർ ജയന്റ്സിന് എതിരായ നിർണ്ണായക മത്സരത്തിൽ മുംബൈ ഇന്ത്യൻസ് ക്യാപ്റ്റൻ ഹാർദിക് പാണ്ഡ്യ കളിക്കാതിരുന്നത് ആരാധകർക്കിടയിൽ വലിയ ചർച്ചയായിരുന്നു. ഹാർദിക്കിന് പകരം സൂര്യകുമാർ യാദവാണ് ടീമിനെ നയിച്ചത് (Hardik Pandya IPL injury). ഹാർദിക്കിന് സുഖമില്ലാത്തതിനാലാണ് മാറിനിൽക്കുന്നതെന്നായിരുന്നു ടോസ് വേളയിൽ സൂര്യകുമാർ പറഞ്ഞതെങ്കിലും, താരത്തിന് ബാക്ക് സ്പാസം അഥവാ കഠിനമായ നടുവേദന അനുഭവപ്പെട്ടതാണ് യഥാർത്ഥ കാരണമെന്ന് സഹതാരം റയാൻ റിക്കൽട്ടൺ വെളിപ്പെടുത്തി.
മത്സരത്തിന് ശേഷമുള്ള വാർത്താ സമ്മേളനത്തിലാണ് റിക്കൽട്ടൺ ഇക്കാര്യം വ്യക്തമാക്കിയത്. തിങ്കളാഴ്ച ഉച്ചയോടെയാണ് ഹാർദിക്കിന് നടുവേദനയുണ്ടെന്ന വിവരം താനറിഞ്ഞതെന്നും പരിക്കിന്റെ വ്യാപ്തി എത്രത്തോളമുണ്ടെന്ന് വ്യക്തമല്ലെന്നും അദ്ദേഹം പറഞ്ഞു. എങ്കിലും ഈ ആഴ്ച റായ്പൂരിൽ നടക്കാനിരിക്കുന്ന അടുത്ത മത്സരങ്ങളിൽ ഹാർദിക് ടീമിനൊപ്പം ചേരുമെന്നാണ് പ്രതീക്ഷിക്കുന്നതെന്നും റിക്കൽട്ടൺ കൂട്ടിച്ചേർത്തു. മോശം ഫോമിനെത്തുടർന്ന് കടുത്ത വിമർശനങ്ങൾ നേരിടുന്നതിനിടയിലാണ് ഹാർദിക്കിന് പരിക്കേറ്റത്.
ഹാർദിക്കിന്റെ അഭാവത്തിൽ രോഹിത് ശർമ്മ ടീമിലേക്ക് തിരിച്ചെത്തുകയും മുംബൈ ഉജ്ജ്വല വിജയം സ്വന്തമാക്കുകയും ചെയ്തു. ആദ്യം ബാറ്റ് ചെയ്ത ലഖ്നൗ, നിക്കോളാസ് പൂരന്റെയും (21 പന്തിൽ 63) മിച്ചൽ മാർഷിന്റെയും കരുത്തിൽ 228 റൺസെന്ന കൂറ്റൻ സ്കോർ പടുത്തുയർത്തിയിരുന്നു. എന്നാൽ റയാൻ റിക്കൽട്ടണും (32 പന്തിൽ 83) രോഹിത് ശർമ്മയും (44 പന്തിൽ 84) ചേർന്ന് നടത്തിയ വെടിക്കെട്ട് പ്രകടനം മുംബൈയെ 18.4 ഓവറിൽ ലക്ഷ്യത്തിലെത്തിച്ചു.
നിലവിൽ പോയിന്റ് പട്ടികയിൽ ഒമ്പതാം സ്ഥാനത്താണ് മുംബൈ ഇന്ത്യൻസ്. പത്ത് മത്സരങ്ങളിൽ നിന്ന് മൂന്ന് ജയം മാത്രമാണ് ടീമിനുള്ളത്. ലഖ്നൗ സൂപ്പർ ജയന്റ്സ് പട്ടികയിൽ അവസാന സ്ഥാനത്താണ്. ഹാർദിക്കിന്റെ അഭാവത്തിൽ സൂര്യകുമാർ നയിച്ചപ്പോൾ ടീം പഴയ ഫോമിലേക്ക് തിരിച്ചെത്തിയതായി മുൻതാരങ്ങളും ആരാധകരും അഭിപ്രായപ്പെടുന്നുണ്ട്. വരും മത്സരങ്ങളിൽ ഹാർദിക് ടീമിലേക്ക് തിരിച്ചെത്തുമോ അതോ പരിക്കിനെത്തുടർന്ന് കൂടുതൽ വിശ്രമം വേണ്ടിവരുമോ എന്ന കാര്യത്തിൽ മുംബൈ ഇന്ത്യൻസ് ഔദ്യോഗിക സ്ഥിരീകരണം നൽകിയിട്ടില്ല.
Summary: Mumbai Indians captain Hardik Pandya missed the IPL 2026 clash against Lucknow Super Giants due to back spasms, teammate Ryan Rickelton revealed. While stand-in skipper Suryakumar Yadav initially mentioned Hardik was “unwell,” the extent of his back injury remains unclear. In his absence, Mumbai pulled off a spectacular chase of 229 runs, led by Rohit Sharma and Ryan Rickelton’s half-centuries, securing a much-needed win.
