തന്റെ മകളുടെ പ്രീസ്കൂളിലെ ആദ്യ ദിനത്തിൽ ജോലിക്ക് വൈകിയത്തിയ ജീവനക്കാരനോട് ബാക്കി ദിവസം മുഴുവൻ അവധിയെടുത്ത് കുട്ടിക്കൊപ്പം ചെലവഴിക്കാൻ നിർദ്ദേശിച്ച വിദേശിയായ മാനേജരുടെ നടപടി സോഷ്യൽ മീഡിയയിൽ വൈറലാകുന്നു ( Work-Life Balance). ‘ദ ചാൻ ചാൻ മാൻ’ എന്ന ഇൻസ്റ്റാഗ്രാം ഹാൻഡിലിലൂടെ സൗരവ് എന്ന പ്രൊഫഷണലാണ് തനിക്കുണ്ടായ ഈ വ്യത്യസ്ത അനുഭവം പങ്കുവെച്ചത്. കുട്ടിയുടെ സ്കൂളിലെ ആദ്യ ദിനം ഒരു വലിയ നാഴികക്കല്ലാണെന്നും, അത് മാതാപിതാക്കൾക്കും കുട്ടിക്കും ഒരുപോലെ സമ്മർദ്ദമുണ്ടാക്കുന്നതാണെന്നും തിരിച്ചറിഞ്ഞാണ് മാനേജർ ഉടൻ അവധി നൽകിയത്.
വിദേശ മാനേജർമാരുടെ പ്രവർത്തനരീതിയെയും മനോഭാവത്തെയും പുകഴ്ത്തുന്നതാണ് ഈ വീഡിയോ. മീറ്റിംഗുകളിൽ പങ്കെടുക്കുന്നതിനേക്കാൾ പ്രധാനം തന്റെ മകൾക്കൊപ്പം ഈ നിമിഷം ചെലവഴിക്കുന്നതാണെന്ന് മാനേജർ ഓർമ്മിപ്പിച്ചതായി സൗരവ് പറയുന്നു. തൊഴിലിടങ്ങളിലെ വർക്ക്-ലൈഫ് ബാലൻസിനെക്കുറിച്ച് വലിയൊരു ചർച്ചയ്ക്ക് തന്നെ ഈ സംഭവം വഴിവെച്ചിരിക്കുകയാണ്. കുടുംബാംഗങ്ങളുടെ ആശുപത്രി വാസം പോലും ഗൗനിക്കാതെ ജോലിയെക്കുറിച്ച് മാത്രം സംസാരിക്കുന്ന പല ഇന്ത്യൻ മാനേജർമാരുമുണ്ടെന്ന് ഒട്ടനവധി പേർ കമന്റുകളിൽ പങ്കുവെക്കുന്നുണ്ട്.
അവധി എടുക്കാൻ മടിക്കുന്ന ജീവനക്കാരെ നിർബന്ധപൂർവ്വം അവധിക്ക് വിടുന്ന വിദേശ കമ്പനികളുടെ രീതിയെ പലരും പ്രശംസിച്ചു. ജോലിയിൽ നിന്ന് വിട്ടുനിൽക്കുന്നത് റീചാർജ് ചെയ്യാനും കുടുംബത്തോടൊപ്പം ഗുണനിലവാരമുള്ള സമയം ചെലവഴിക്കാനും അത്യാവശ്യമാണെന്ന ബോധ്യം ഇത്തരം മാനേജർമാർക്കുണ്ടെന്ന് പലർക്കും അഭിപ്രായമുണ്ട്. ഇന്ത്യൻ തൊഴിലിടങ്ങളിൽ ഇനിയും വരാനിരിക്കുന്ന വലിയ മാറ്റമാണിതെന്നാണ് ഈ സംഭവം കാണിക്കുന്നത്.
