ന്യൂഡൽഹി: ഫോൺ നമ്പറുകൾക്ക് പകരം യൂസർനെയിമുകൾ ഉപയോഗിച്ച് വാട്സാപ്പിൽ ബന്ധപ്പെടാൻ കഴിയുന്ന പുതിയ ഫീച്ചർ ഇന്ത്യയിൽ അവതരിപ്പിക്കാനൊരുങ്ങുന്നതുമായി ബന്ധപ്പെട്ട വിവാദങ്ങൾക്ക് മറുപടിയുമായി വാട്സാപ്പ് അധികൃതർ. ഉപയോക്താക്കളുടെ സ്വകാര്യതയ്ക്കും സുരക്ഷയ്ക്കും ഉയർന്ന മുൻഗണന നൽകിയാണ് ഈ ഫീച്ചർ തയ്യാറാക്കിയിരിക്കുന്നതെന്ന് കമ്പനി വ്യക്തമാക്കി.(WhatsApp Username Feature Security Clarification In India)
ഈ ഫീച്ചർ നിലവിൽ ഇന്ത്യയിൽ പ്രവർത്തനക്ഷമമായിട്ടില്ലെന്നും, ഈ വർഷം അവസാനത്തോടെ ലഭ്യമാകുമെന്നുമാണ് വാട്സാപ്പ് അറിയിച്ചിരിക്കുന്നത്. പുതിയ ഫീച്ചർ നിലവിൽ വന്നാലും ഫോൺ നമ്പർ ഉപയോഗിച്ചുള്ള രജിസ്ട്രേഷൻ നിർബന്ധമായി തുടരും. അതായത്, ഫോൺ നമ്പറില്ലാതെ വാട്സാപ്പ് അക്കൗണ്ട് സൃഷ്ടിക്കാൻ കഴിയില്ല.
യൂസർനെയിം ഫീച്ചർ ദുരുപയോഗം ചെയ്യുന്നത് തടയാൻ ബഹുതല സുരക്ഷാ സംവിധാനങ്ങളാണ് കമ്പനി ഒരുക്കുന്നത്. യൂസർനെയിം കൃത്യമായി അറിയാത്തവർക്ക് മറ്റൊരാൾക്ക് സന്ദേശമയക്കാൻ സാധിക്കില്ല. യൂസർനെയിം സെർച്ച് ചെയ്ത് അയക്കാവുന്ന സന്ദേശങ്ങൾക്ക് പരിധി നിശ്ചയിക്കും. ഊഹിച്ച് മെസേജുകൾ അയക്കുന്നത് ഇതിലൂടെ ഒഴിവാക്കാം.
ഒരു യൂസർനെയിമിലേക്ക് ആദ്യമായി സന്ദേശം അയക്കുമ്പോൾ തന്നെ സ്വീകർത്താവിന് മുന്നറിയിപ്പ് ലഭിക്കും. അന്യരാജ്യങ്ങളിൽ നിന്നുള്ള അക്കൗണ്ടുകളിൽ നിന്ന് സന്ദേശം വന്നാലും ഇതേ മുന്നറിയിപ്പ് ലഭിക്കുമെന്ന് കമ്പനി ഉറപ്പുനൽകുന്നു. സുരക്ഷാ ഭീഷണികൾ ഒഴിവാക്കാൻ ആവശ്യമായ എല്ലാ മുൻകരുതലുകളും സ്വീകരിച്ചിട്ടുണ്ടെന്നും, സാങ്കേതികവിദ്യയുടെ സഹായത്തോടെ ആൾമാറാട്ടം തടയാൻ ശക്തമായ പ്രതിരോധ സംവിധാനങ്ങൾ ഒരുക്കിയിട്ടുണ്ടെന്നും വാട്സാപ്പ് വ്യക്തമാക്കി.
Story Summary
WhatsApp has addressed concerns regarding the upcoming “username” feature in India, clarifying that the feature will be launched later this year with robust security measures. To prevent spam and impersonation, the platform will retain phone number registration, limit username-based searches, and introduce warning notifications for first-time messages.
