ചെന്നൈ: തമിഴ്നാട് നിയമസഭാ തിരഞ്ഞെടുപ്പിൽ തമിഴക വെട്രി കഴകം ചരിത്രപരമായ മുന്നേറ്റം നടത്തുന്നതിനിടെ, പാർട്ടി അധ്യക്ഷൻ വിജയുടെ വസതിയിൽ ആവേശകരമായ വിജയാഘോഷം ( Vijay Family Celebration TVK Victory). വിജയുടെ പിതാവും പ്രശസ്ത സംവിധായകനുമായ എസ്.എ. ചന്ദ്രശേഖറും മാതാവ് ശോഭയും കുടുംബാംഗങ്ങളും ചേർന്ന് വിജയം ആഘോഷിക്കുന്ന വീഡിയോ സമൂഹമാധ്യമങ്ങളിൽ തരംഗമാവുകയാണ്.
തിരഞ്ഞെടുപ്പ് ഫലസൂചനകളിൽ ടിവികെ 100 സീറ്റുകൾ കടന്നതോടെ എസ്.എ. ചന്ദ്രശേഖറിനെ കുടുംബാംഗങ്ങൾ കെട്ടിപ്പിടിച്ച് സന്തോഷം പങ്കിടുന്ന ദൃശ്യങ്ങളാണ് പുറത്തുവന്നത്. രാഷ്ട്രീയ പ്രവേശനം മുതൽ മകന് പൂർണ്ണ പിന്തുണയുമായി അദ്ദേഹം ഒപ്പമുണ്ടായിരുന്നു. ടിവികെയുടെ ചിഹ്നമായ വിസിൽ ഊതിയാണ് കുടുംബാംഗങ്ങൾ തങ്ങളുടെ സന്തോഷം പ്രകടിപ്പിച്ചത്. സോഫയിൽ ഒന്നിച്ചിരുന്ന് അവർ വിസിൽ മുഴക്കുന്ന ദൃശ്യങ്ങൾ ടിവികെ പ്രവർത്തകർക്കിടയിൽ വലിയ ആവേശം സൃഷ്ടിച്ചിട്ടുണ്ട്.
തമിഴ്നാട് തിരഞ്ഞെടുപ്പ് ചരിത്രത്തിൽ വലിയൊരു രാഷ്ട്രീയ മാറ്റത്തിനാണ് ഈ ഫലങ്ങൾ വഴിയൊരുക്കുന്നതെന്ന് രാഷ്ട്രീയ നിരീക്ഷകർ വിലയിരുത്തുന്നു. ദ്രാവിഡ കക്ഷികളുടെ കോട്ടകളിൽ വിജയ് തരംഗം ആഞ്ഞടിക്കുന്ന കാഴ്ചയാണ് വോട്ടെണ്ണൽ കേന്ദ്രങ്ങളിൽ ദൃശ്യമാകുന്നത്. ചെന്നൈയിലെ വിജയുടെ വസതിക്ക് പുറത്തും ടിവികെ ആസ്ഥാനത്തും നൂറുകണക്കിന് പ്രവർത്തകരാണ് വിസിൽ മുഴക്കിയും മധുരം വിതരണം ചെയ്തും ആഘോഷങ്ങളിൽ പങ്കുചേരുന്നത്. തമിഴ് മണ്ണിൽ ഒരു പുതിയ രാഷ്ട്രീയ യുഗത്തിന് വിജയ് തുടക്കമിടുമ്പോൾ, കുടുംബത്തിന്റെ ഈ പിന്തുണ അദ്ദേഹത്തിന് വലിയ കരുത്താകുമെന്നാണ് വിലയിരുത്തപ്പെടുന്നത്.
Summary: As actor Vijay’s TVK marks a historic lead in the 2026 Tamil Nadu Assembly elections, his father S.A. Chandrasekhar and family were seen celebrating the victory. In a viral video, family members are seen hugging the veteran director and blowing whistles—the symbol of TVK—to express their joy. The results are expected to bring a paradigm shift in Tamil Nadu’s political history as Vijay’s debut party challenges established giants.
