ന്യൂഡൽഹി: ഇന്ത്യയുൾപ്പെടെയുള്ള രാജ്യങ്ങളെ അധിക്ഷേപിക്കുന്ന തരത്തിലുള്ള സോഷ്യൽ മീഡിയ പോസ്റ്റ് പങ്കുവെച്ച അമേരിക്കൻ പ്രസിഡന്റ് ഡൊണാൾഡ് ട്രംപിന്റെ നടപടിയിൽ ശക്തമായ വിയോജിപ്പ് രേഖപ്പെടുത്തി ഇന്ത്യ. ട്രംപിന്റെ പരാമർശങ്ങൾ അസ്ഥാനത്തുള്ളതും അനുചിതവുമാണെന്ന് ഇന്ത്യൻ വിദേശകാര്യ മന്ത്രാലയം വ്യക്തമാക്കി.(Uninformed, Inappropriate, In Poor Taste, India After Trump Hell-Hole Row)
വിവാദമായ ഒരു കുറിപ്പ് ട്രംപ് തന്റെ സോഷ്യൽ മീഡിയ പ്ലാറ്റ്ഫോമായ ‘ട്രൂത്ത് സോഷ്യലി’ൽ പങ്കുവെച്ചതാണ് വിവാദങ്ങൾക്ക് വഴിവെച്ചത്. ഇന്ത്യ, ചൈന തുടങ്ങിയ രാജ്യങ്ങളെ “നരകകുഴികൾ” എന്ന് വിശേഷിപ്പിക്കുന്നതായിരുന്നു ആ പോസ്റ്റ്. ട്രംപിന്റെ പേര് നേരിട്ട് പരാമർശിക്കാതെ തന്നെ വിദേശകാര്യ മന്ത്രാലയ വക്താവ് രൺധീർ ജയ്സ്വാൾ ഇന്ത്യയുടെ നിലപാട് വ്യക്തമാക്കി. “ആ പരാമർശങ്ങൾ തികച്ചും അവിവേകവും അനുചിതവുമാണ്. പരസ്പര ബഹുമാനത്തിലും പങ്കിട്ട താൽപ്പര്യങ്ങളിലും അധിഷ്ഠിതമായ ഇന്ത്യ-യുഎസ് ബന്ധത്തിന്റെ യഥാർത്ഥ പ്രതിഫലനമല്ല ഇത്തരം വാക്കുകൾ,” അദ്ദേഹം പറഞ്ഞു. യുഎസ് എംബസി പിന്നീട് നൽകിയ വിശദീകരണം ശ്രദ്ധയിൽപ്പെട്ടതായും അദ്ദേഹം കൂട്ടിച്ചേർത്തു.
വിവാദം കൊഴുത്തതോടെ യുഎസ് എംബസി വിശദീകരണവുമായി രംഗത്തെത്തി. ട്രംപ് ഇന്ത്യയെ ഒരു “മഹത്തായ” രാജ്യമായാണ് കാണുന്നതെന്നും ഇന്ത്യയുടെ ഭരണത്തലവൻ തന്റെ “നല്ല സുഹൃത്താണെന്ന്” അദ്ദേഹം വിശ്വസിക്കുന്നുണ്ടെന്നും എംബസി വക്താവ് അറിയിച്ചു. ഇന്ത്യയിലെ മാധ്യമങ്ങളിൽ നിന്നുള്ള കടുത്ത ചോദ്യങ്ങളെത്തുടർന്നായിരുന്നു ഈ തിരുത്തൽ. ട്രംപിന്റെ നടപടിക്കെതിരെ അമേരിക്കയിലെ ഹിന്ദു അമേരിക്കൻ ഫൗണ്ടേഷൻ രംഗത്തെത്തി. ഇന്ത്യൻ-അമേരിക്കൻ, ചൈനീസ്-അമേരിക്കൻ വംശജരെ ലക്ഷ്യം വെച്ചുള്ള വർണ്ണവെറി കലർന്ന കുറിപ്പ് പങ്കുവെച്ചതിൽ തങ്ങൾ അങ്ങേയറ്റം അസ്വസ്ഥരാണെന്ന് സംഘടന അറിയിച്ചു. ഇത്തരം വിദ്വേഷ പ്രസംഗങ്ങൾ വിദേശവിരോധം വർദ്ധിപ്പിക്കുമെന്നും ട്രംപ് പോസ്റ്റ് നീക്കം ചെയ്യണമെന്നും അവർ ആവശ്യപ്പെട്ടു.
ബിജെപി നേതാവ് പ്രിയങ്ക ചതുർവേദിയും വിഷയത്തിൽ പ്രതികരിച്ചു. ഹഡ്സൺ ഇൻസ്റ്റിറ്റ്യൂട്ടിലെ ഒരു പരിപാടിക്കിടെയാണ് ട്രംപിന്റെ പരാമർശങ്ങൾ വളരെ രൂക്ഷവും വേദനിപ്പിക്കുന്നതുമാണെന്ന് അവർ അഭിപ്രായപ്പെട്ടത്. ഇന്ത്യ-അമേരിക്ക ബന്ധത്തിൽ വലിയ വിള്ളലുകൾ വീഴ്ത്തിയേക്കാവുന്ന ഈ പരാമർശത്തിനെതിരെ സോഷ്യൽ മീഡിയയിലും പ്രതിഷേധം ശക്തമാണ്.
