ബംഗളൂരു: ആഫ്രിക്കൻ രാജ്യങ്ങളിൽ എബോള വൈറസ് ബാധ പടരുന്ന പശ്ചാത്തലത്തിൽ പ്രഖ്യാപിച്ച ആഗോള ജാഗ്രതയുടെ ഭാഗമായി ബംഗളൂരുവിൽ ഉഗാണ്ടൻ സ്വദേശിനിയായ 28-കാരിയെ നിരീക്ഷണത്തിലാക്കി. മെയ് 23-ന് കെംപെഗൗഡ അന്താരാഷ്ട്ര വിമാനത്താവളത്തിൽ എത്തിയ ഇവരെ മുൻകരുതൽ നടപടിയുടെ ഭാഗമായി ഇന്ദിരാനഗറിലെ എപ്പിഡെമിക് ഡിസീസസ് ഹോസ്പിറ്റലിലെ ഐസൊലേഷൻ വാർഡിലേക്ക് മാറ്റി. ഇവരുടെ സാമ്പിളുകൾ വിശദമായ പരിശോധനയ്ക്കായി പുണെയിലെ നാഷണൽ ഇൻസ്റ്റിറ്റ്യൂട്ട് ഓഫ് വൈറോളജിയിലേക്ക് അയച്ചിട്ടുണ്ട്.(Ugandan Woman Isolated In Bengaluru For Ebola Testing Amid WHO Global Health Emergency Alert)
വിമാനത്താവളത്തിൽ എത്തിയപ്പോൾ ഇവർക്ക് എബോളയുടെ പ്രധാന ലക്ഷണമായ കടുത്ത പനി ഉണ്ടായിരുന്നില്ലെന്ന് ആരോഗ്യ വകുപ്പ് പ്രിൻസിപ്പൽ സെക്രട്ടറി വ്യക്തമാക്കി. എന്നാൽ വിമാനത്താവള ഹെൽത്ത് ഓർഗനൈസേഷൻ നടത്തിയ പ്രാഥമിക പരിശോധനയിൽ കടുത്ത ശരീരക്ഷീണം ശ്രദ്ധയിൽപ്പെട്ടതിനെ തുടർന്നാണ് സാമ്പിളുകൾ ശേഖരിക്കാൻ തീരുമാനിച്ചത്. വിമാനത്താവളത്തിൽ നിന്നും ഇവർ ആദ്യം ഒരു ഹോട്ടലിലേക്ക് പോയിരുന്നെങ്കിലും, പിന്നീട് ശരീരവേദന ഉൾപ്പെടെയുള്ള നേരിയ ലക്ഷണങ്ങൾ പ്രകടിപ്പിച്ചതോടെയാണ് സർക്കാർ ആശുപത്രിയിലെ പ്രത്യേക വാർഡിലേക്ക് മാറ്റിയത്.
നിലവിൽ ഇവരുടെ ആരോഗ്യനില തൃപ്തികരമാണെന്നും നിരീക്ഷണം തുടരുകയാണെന്നും അധികൃതർ അറിയിച്ചു. പ്രോട്ടോക്കോൾ പ്രകാരം ആദ്യ പരിശോധനാ ഫലം വന്നതിന് ശേഷം വീണ്ടും ഒരു ടെസ്റ്റ് കൂടി നടത്തും. ഡെമോക്രാറ്റിക് റിപ്പബ്ലിക് ഓഫ് കോംഗോ, ഉഗാണ്ട എന്നീ ആഫ്രിക്കൻ രാജ്യങ്ങളിൽ എബോള രോഗവ്യാപനം രൂക്ഷമായതിനെ തുടർന്ന് മെയ് 17-ന് ലോകാരോഗ്യ സംഘടന (WHO) അന്താരാഷ്ട്ര പ്രാധാന്യമുള്ള പൊതുജനാരോഗ്യ അടിയന്തരാവസ്ഥ (PHEIC) പ്രഖ്യാപിച്ചിരുന്നു. ഇതിന് പിന്നാലെ കർണാടക ആരോഗ്യ വകുപ്പ് പ്രത്യേക ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്.
Story Summary
A 28-year-old Ugandan woman who arrived at Bengaluru airport has been isolated at the Epidemic Diseases Hospital in Indiranagar as a precaution for Ebola testing. Her samples have been sent to NIV Pune. The move comes after the WHO declared Ebola a Public Health Emergency of International Concern (PHEIC), prompting Karnataka to issue a 21-day self-monitoring advisory for travelers from affected regions.
