കൊൽക്കത്ത: പശ്ചിമ ബംഗാളിലെ തിരഞ്ഞെടുപ്പ് തിരിച്ചടിക്ക് പിന്നാലെ ഗുരുതരമായ ആഭ്യന്തര പ്രതിസന്ധിയിലൂടെ കടന്നുപോകുന്ന തൃണമൂൽ കോൺഗ്രസിൽ വിമത നീക്കങ്ങൾ ശക്തമാകുന്നു. പാർട്ടിയിലെ വിമത വിഭാഗം തങ്ങളാണ് “യഥാർത്ഥ തൃണമൂൽ കോൺഗ്രസ്” എന്ന് അവകാശപ്പെട്ട് നിയമപരവും രാഷ്ട്രീയപരവുമായ പോരാട്ടത്തിന് തയ്യാറെടുക്കുന്നതായാണ് റിപ്പോർട്ടുകൾ (Trinamool Congress Crisis). തൃണമൂൽ രാജ്യസഭാംഗമായിരുന്ന പ്രകാശ് ചിക് ബരായിക് രാജിവെച്ചതോടെയാണ് പ്രതിസന്ധി കൂടുതൽ രൂക്ഷമായത്. ഈ ആഴ്ചയ്ക്കിടെ രാജിവെക്കുന്ന മൂന്നാമത്തെ രാജ്യസഭാംഗമാണ് അദ്ദേഹം. നേരത്തെ സുഷ്മിത ദേവും മുതിർന്ന നേതാവ് സുഖേന്ദു ശേഖർ റായിയും രാജി പ്രഖ്യാപിച്ചിരുന്നു.
നിലവിൽ തൃണമൂലിന് ലോക്സഭയിൽ 28 അംഗങ്ങളും രാജ്യസഭയിൽ 12 അംഗങ്ങളുമാണുള്ളത്. ഇതിൽ ഏകദേശം 20 ലോക്സഭാ എംപിമാർ പാർട്ടിയുടെ സംഘടനാ നേതൃത്വത്തിൽ നിന്ന് അകന്ന് ബിജെപി നേതൃത്വത്തിലുള്ള എൻഡിഎയെ പാർലമെന്റിൽ പിന്തുണയ്ക്കാൻ തയ്യാറാണെന്നാണ് റിപ്പോർട്ടുകൾ. ഭരണഘടനയുടെ പത്താം ഷെഡ്യൂളായ കൂറുമാറ്റ വിരുദ്ധ നിയമപ്രകാരം, നിയമസഭാ കക്ഷിയിലെ മൂന്നിൽ രണ്ട് അംഗങ്ങളുടെ പിന്തുണ ലഭിച്ചാൽ മാത്രമേ വിഭജനം നിയമപരമായി അംഗീകരിക്കപ്പെടുകയുള്ളു. നിലവിലെ സാഹചര്യത്തിൽ കുറഞ്ഞത് 19 എംപിമാരുടെ പിന്തുണ ആവശ്യമാണ്. ഈ എണ്ണം തങ്ങൾക്ക് ലഭിച്ചിട്ടുണ്ടെന്നാണ് വിമത വിഭാഗത്തിന്റെ അവകാശവാദം. അതേസമയം, ബിജെപിയുമായി ലയിക്കുകയല്ല തങ്ങളുടെ ലക്ഷ്യമെന്ന് വിമതർ വ്യക്തമാക്കുന്നു. പകരം, സ്വതന്ത്ര പാർലമെന്ററി ഗ്രൂപ്പായി തുടരുകയും എൻഡിഎയുടെ നിയമനിർമാണ അജണ്ടയെ പിന്തുണയ്ക്കുകയും ചെയ്യുമെന്നാണ് സൂചന.
വിമത വിഭാഗം ലോക്സഭാ സ്പീക്കർക്കും പശ്ചിമ ബംഗാൾ നിയമസഭാ സ്പീക്കർക്കും മുന്നിൽ തങ്ങളാണ് യഥാർത്ഥ തൃണമൂൽ കോൺഗ്രസ് എന്ന അവകാശവാദവുമായി അപേക്ഷ നൽകാൻ ഒരുങ്ങുന്നതായും റിപ്പോർട്ടുണ്ട്. ഇതോടൊപ്പം പാർട്ടിയുടെ തിരഞ്ഞെടുപ്പ് ചിഹ്നത്തിൽ അവകാശം ഉന്നയിച്ച് തിരഞ്ഞെടുപ്പ് കമ്മീഷനെയും സമീപിക്കാനാണ് നീക്കം. മമത ബാനർജിയും അഭിഷേക് ബാനർജിയും പാർട്ടി ഭരണഘടന ലംഘിച്ചാണ് നിരവധി തീരുമാനങ്ങൾ എടുത്തതെന്ന ആരോപണവും വിമതർ ഉന്നയിക്കാനാണ് സാധ്യത. പാർട്ടി ഭരണഘടന പാലിക്കാതെയാണ് സംഘടന മുന്നോട്ട് പോകുന്നതെന്ന വാദം ഉയർത്തി നിയമപരമായ പോരാട്ടം ശക്തമാക്കാനാണ് അവരുടെ പദ്ധതി.
ശിവസേന, എൻസിപി, ലോക് ജനശക്തി പാർട്ടി (എൽജെപി) എന്നിവയിലെ വിഭജന കേസുകളിൽ തിരഞ്ഞെടുപ്പ് കമ്മീഷൻ നൽകിയ വിധികളെ മാതൃകയാക്കിയാണ് വിമതരുടെ നീക്കം. ഈ കേസുകളിലെ പോലെ തന്നെ തങ്ങളാണ് യഥാർത്ഥ പാർട്ടിയെന്ന് തെളിയിക്കാനാണ് ശ്രമം. വിമത വിഭാഗത്തിന്റെ അവകാശവാദം അംഗീകരിക്കപ്പെടുകയാണെങ്കിൽ അവരുടെ എംപി പദവികൾ നിലനിർത്താൻ കഴിയുമെന്നാണ് വിലയിരുത്തൽ. എന്നാൽ തൃണമൂൽ കോൺഗ്രസിന്റെ നിയന്ത്രണവും പാർട്ടി ചിഹ്നവും സംബന്ധിച്ച് ദീർഘമായ നിയമപോരാട്ടത്തിന് സാധ്യതയുണ്ടെന്നാണ് രാഷ്ട്രീയ നിരീക്ഷകർ ചൂണ്ടിക്കാട്ടുന്നത്.
Summary: A rebel faction within the Trinamool Congress is reportedly preparing to challenge Mamata Banerjee’s leadership by claiming it is the “real” Trinamool Congress. With around 20 Lok Sabha MPs said to be backing the move, the group plans to seek recognition from the Speaker and the Election Commission, potentially triggering a major legal and political battle over the party’s identity and election symbol.
