സംഗറെഡ്ഡി: തെലങ്കാനയിലെ മെദക് ജില്ലയിൽ ഗർഭിണിയായ ഇരുപത്തിമൂന്നുകാരി ജീവനൊടുക്കി. ഭർത്താവും ഭർതൃമാതാവും ചേർന്ന് നിരന്തരം പീഡിപ്പിക്കുകയും ഗർഭസ്ഥ ശിശുവിന്റെ പിതൃത്വത്തിൽ സംശയം പ്രകടിപ്പിച്ച് ഡിഎൻഎ പരിശോധന ആവശ്യപ്പെടുകയും ചെയ്തതിനെത്തുടർന്നാണ് യുവതി ആത്മഹത്യ ചെയ്തതെന്ന് ബന്ധുക്കൾ ആരോപിക്കുന്നു (Telangana Pregnant Woman Suicide). അല്ലദുർഗ് മണ്ഡലത്തിലെ ഗഡിപെഡ്ദാപൂർ ഗ്രാമത്തിലാണ് ദാരുണമായ സംഭവം നടന്നത്. സുഷ്മിത എന്ന യുവതിയാണ് മരിച്ചത്. പതിനെട്ട് മാസം മുൻപായിരുന്നു ഇവരുടെ വിവാഹം നടന്നത്. അഞ്ച് മാസം ഗർഭിണിയായിരുന്നു സുഷ്മിത.
യുവതിയുടെ മാതാവ് ജനാഭായ് നൽകിയ പരാതിയുടെ അടിസ്ഥാനത്തിൽ സുഷ്മിതയ്ക്ക് ഭർത്താവ് ജി. അഭിലാഷിൽ നിന്നും ഭർതൃമാതാവിൽ നിന്നും കടുത്ത ശാരീരികവും മാനസികവുമായ പീഡനങ്ങൾ നേരിടേണ്ടി വന്നിരുന്നുവെന്ന് വ്യക്തമായിട്ടുണ്ട്. തങ്ങളുടെ മകളുടെ സ്വഭാവശുദ്ധിയിൽ സംശയം പ്രകടിപ്പിച്ചാണ് ഭർത്താവ് നിരന്തരം കലഹിച്ചിരുന്നത്. ജൂൺ 23-ന് സുഷ്മിതയുടെ വളകാപ്പ് ചടങ്ങുമായി ബന്ധപ്പെട്ട കാര്യങ്ങൾ ചർച്ച ചെയ്യാൻ മാതാപിതാക്കൾ ഇവരുടെ വീട്ടിലെത്തിയ സമയത്തും അഭിലാഷ് ഡിഎൻഎ പരിശോധന ആവശ്യപ്പെട്ട് തർക്കമുണ്ടാക്കിയിരുന്നു. സമുദായത്തിലെ മുതിർന്നവർ ഇടപെട്ട് പ്രശ്നം താൽക്കാലികമായി ഒതുക്കിതീർത്തുവെങ്കിലും പീഡനം തുടരുകയായിരുന്നു. ഇതിന് രണ്ടുദിവസത്തിന് ശേഷം യുവതിയെ വീട്ടിൽ തൂങ്ങിമരിച്ച നിലയിൽ കണ്ടെത്തുകയായിരുന്നു.
സംഭവത്തിൽ സമഗ്രമായ അന്വേഷണം വേണമെന്ന് ജനാഭായ് ആവശ്യപ്പെട്ടു. പോലീസെത്തി മൃതദേഹം പോസ്റ്റ്മോർട്ടത്തിനായി സംഗറെഡ്ഡി സർക്കാർ ജനറൽ ആശുപത്രിയിലേക്ക് മാറ്റി. പ്രതികളായ ഭർത്താവ് ജി. അഭിലാഷിനെയും ഭർതൃമാതാവിനെയും അല്ലദുർഗ് പോലീസ് അറസ്റ്റ് ചെയ്തു. പ്രതികളെ കോടതിയിൽ ഹാജരാക്കി ജുഡീഷ്യൽ കസ്റ്റഡിയിൽ റിമാൻഡ് ചെയ്തതായി പോലീസ് സബ് ഇൻസ്പെക്ടർ ഡി. ശങ്കർ അറിയിച്ചു. ഭാരതീയ ന്യായ സംഹിതയിലെ വിവിധ വകുപ്പുകൾ പ്രകാരം സ്ത്രീധന പീഡനം, ആത്മഹത്യാ പ്രേരണ എന്നീ കുറ്റങ്ങൾ ചുമത്തിയാണ് ഇവർക്കെതിരെ കേസെടുത്തിരിക്കുന്നത്.
Summary: A 23-year-old pregnant woman, Sushmita, died by suicide in Medak district, Telangana, following alleged harassment by her husband and mother-in-law. The victim, who was five months pregnant, faced repeated accusations regarding her fidelity, with her husband even demanding a DNA test for the unborn child. Despite family interventions, the harassment continued, leading to her death. Local police have arrested the husband, G. Abhilash, and his mother, and have registered a case under the Bharatiya Nyaya Sanhita for cruelty and abetment of suicide.
