ചെന്നൈ: തമിഴ്നാട്ടിൽ പുതുതായി അധികാരമേറ്റ വിജയ് സർക്കാരിന്റെ രണ്ടാം ഘട്ട മന്ത്രിസഭാ വിപുലീകരണ ചടങ്ങിലും സംസ്ഥാന ഗീതമായ ‘തമിഴ് തായ് വാഴ്ത്തി’ന്റെ ക്രമീകരണത്തെച്ചൊല്ലി വൻ വിവാദം. വ്യാഴാഴ്ച രാജ്ഭവനിൽ നടന്ന ചടങ്ങിൽ 23 പുതിയ മന്ത്രിമാർ സത്യപ്രതിജ്ഞ ചെയ്തപ്പോഴാണ് തമിഴ് വിരുദ്ധത ആരോപിച്ച് പ്രതിപക്ഷമായ ഡിഎംകെയും ഭരണപക്ഷത്തെ സഖ്യകക്ഷികളും വീണ്ടും രംഗത്തെത്തിയത് (Tamil Nadu Government Oath Ceremony Controversy). ചടങ്ങിൽ ആദ്യമായി ദേശീയഗീതമായ വന്ദേമാതരവും, രണ്ടാമതായി ദേശീയഗാനമായ ജനഗണമനയും, മൂന്നാമതായി ഏറ്റവും ഒടുവിലായാണ് തമിഴ് പ്രാർത്ഥനാ ഗീതവും ആലപിച്ചത്.
കഴിഞ്ഞ ആഴ്ച മുഖ്യമന്ത്രിയായി വിജയ് സത്യപ്രതിജ്ഞ ചെയ്തപ്പോഴും ഇതേ രീതിയിലായിരുന്നു ഗാനങ്ങൾ ക്രമീകരിച്ചിരുന്നത്. ഇത് വലിയ വിവാദമായതിനെത്തുടർന്ന്, ഭാവിയിൽ തമിഴ് ഗീതം ആദ്യമേ ആലപിക്കുമെന്ന് തമിഴക വെട്രി കഴകം ഉറപ്പുനൽകിയിരുന്നു. എന്നാൽ, കേന്ദ്ര സർക്കാരിന്റെ പുതിയ സർക്കുലർ അനുസരിച്ചാണ് ഗവർണറുടെ ഓഫിസ് ചടങ്ങുകൾ ക്രമീകരിച്ചതെന്നും രാജ്ഭവൻ സംഘടിപ്പിച്ച ചടങ്ങായതിനാൽ ഇതിൽ സംസ്ഥാന സർക്കാരിന് പങ്കില്ലെന്നും ടിവികെ നേതാവ് നഞ്ചിൽ സമ്പത്ത് വ്യക്തമാക്കി. അതേസമയം, തമിഴ് ജനതയുടെ വികാരങ്ങളെയും അവകാശങ്ങളെയും സംരക്ഷിക്കുന്നതിൽ പുതിയ സർക്കാർ പരാജയപ്പെട്ടുവെന്ന് ഡിഎംകെ ആരോപിച്ചു. വന്ദേമാതരം അടിച്ചേൽപ്പിക്കാനുള്ള കേന്ദ്ര നീക്കത്തിനെതിരെ കോൺഗ്രസും ഇടതുപക്ഷ കക്ഷികളും ശക്തമായ വിയോജിപ്പ് രേഖപ്പെടുത്തിയിട്ടുണ്ട്.
Summary: A fresh political controversy has erupted in Tamil Nadu after the state anthem, “Tamil Thai Vaazhthu,” was played last during the cabinet expansion ceremony of the Chief Minister Vijay-led TVK government. For the second consecutive time at a Raj Bhavan event, national song “Vande Mataram” was played first, followed by the national anthem “Jana Gana Mana,” drawing sharp criticism from the opposition DMK and alliance partners like Congress and CPI.
