ന്യൂഡൽഹി: വിവാഹവാഗ്ദാനം നൽകി പീഡിപ്പിച്ചു എന്ന പരാതിയിൽ ലിവിംഗ് ടുഗദർ ബന്ധങ്ങളെക്കുറിച്ച് നിർണ്ണായക നിരീക്ഷണങ്ങളുമായി സുപ്രീം കോടതി. ഒരു ലിവിംഗ് ടുഗദർ ബന്ധത്തിൽ നിന്ന് പിന്മാറുന്നത് തനിയെ ഒരു ക്രിമിനൽ കുറ്റമാകില്ലെന്ന് ജസ്റ്റിസ് ബി.വി. നാഗരത്ന അധ്യക്ഷയായ ബെഞ്ച് വ്യക്തമാക്കി (Supreme Court Live-In Relationship Rape Case).
വിവാഹം കഴിക്കാതെ വർഷങ്ങളോളം ഒരാളോടൊപ്പം താമസിക്കുകയും ആ ബന്ധത്തിൽ ഒരു കുട്ടിയുണ്ടാവുകയും ചെയ്ത ശേഷം, ബന്ധം വേർപിരിയുമ്പോൾ ബലാത്സംഗം, പീഡനം എന്നീ ആരോപണങ്ങൾ ഉന്നയിക്കുന്നതിനെ കോടതി ചോദ്യം ചെയ്തു. സമ്മതത്തോടെയുള്ള ബന്ധം എങ്ങനെയാണ് പിന്നീട് ലൈംഗിക അതിക്രമമായി മാറുന്നതെന്ന് ജസ്റ്റിസ് നാഗരത്ന ചോദിച്ചു. വിവാഹമെന്ന ഔദ്യോഗിക ബന്ധമില്ലാതെ ഒരുമിച്ച് താമസിക്കാൻ തീരുമാനിക്കുമ്പോൾ അതിൽ ചില അപകടസാധ്യതകൾ ഉണ്ടെന്ന് കോടതി നിരീക്ഷിച്ചു. വിവാഹബന്ധത്തിന് പുറത്തുള്ള ഇത്തരം ബന്ധങ്ങളുടെ അനിശ്ചിതത്വമാണിതെന്നും കോടതി കൂട്ടിചേർത്തു.
തനിക്ക് 18 വയസ്സുള്ളപ്പോൾ വിവാഹവാഗ്ദാനം നൽകിയാണ് കൂടെ താമസിപ്പിച്ചതെന്നും എന്നാൽ അയാൾക്ക് നേരത്തെ തന്നെ വിവാഹം കഴിഞ്ഞ കാര്യം അറിയില്ലായിരുന്നു എന്നുമാണ് പരാതിക്കാരി കോടതിയെ അറിയിച്ചത്. അയാൾക്ക് മറ്റ് നാല് ഭാര്യമാരുണ്ടെന്നും അഭിഭാഷകൻ വാദിച്ചു. ബന്ധം നിയമവിരുദ്ധമാകാം, എന്നാൽ ആ ബന്ധത്തിൽ ജനിച്ച കുട്ടി നിയമവിരുദ്ധമല്ലെന്ന് കോടതി പറഞ്ഞു. കുട്ടിയുടെ സംരക്ഷണത്തിനായി യുവതിക്ക് കോടതിയെ സമീപിക്കാം. എന്നാൽ ലിവിംഗ് ടുഗദർ ബന്ധം തകരുന്നത് ഒരു ക്രിമിനൽ കുറ്റത്തിന് അടിസ്ഥാനമല്ല.
വിവാഹബന്ധത്തിലൂടെയായിരുന്നു ഈ ബന്ധമെങ്കിൽ യുവതിയുടെ അവകാശങ്ങൾ കൂടുതൽ സുരക്ഷിതമാകുമായിരുന്നുവെന്നും കോടതി നിരീക്ഷിച്ചു. വിഷയം മധ്യസ്ഥതയിലൂടെ തീർപ്പാക്കാനും കോടതി കക്ഷികളോട് നിർദ്ദേശിച്ചു.
Summary: The Supreme Court observed that walking out of a live-in relationship does not constitute a criminal offense. Justice BV Nagarathna questioned how a consensual long-term relationship involving a child could later be termed as rape or assault after a split. While expressing sympathy for the woman and noting her right to seek maintenance for the child, the court emphasized that criminal charges cannot be based solely on the breakdown of a non-marital relationship.
