മുംബൈ : മഹാരാഷ്ട്ര രാഷ്ട്രീയത്തിൽ വീണ്ടും വലിയ രാഷ്ട്രീയ നീക്കങ്ങൾ. ഉദ്ധവ് താക്കറെ നയിക്കുന്ന ശിവസേന (യുബിടി)യിലെ ആറ് ലോക്സഭാ എംപിമാർ പാർട്ടി വിട്ട് ഏകനാഥ് ഷിൻഡെയുടെ നേതൃത്വത്തിലുള്ള ശിവസേനയിൽ ചേരാൻ തയ്യാറെടുക്കുന്നതായി റിപ്പോർട്ടുകൾ. ‘ഓപ്പറേഷൻ ടൈഗർ’ എന്ന് വിശേഷിപ്പിക്കപ്പെടുന്ന ഈ നീക്കം ഉദ്ധവ് പക്ഷത്തിന് കനത്ത തിരിച്ചടിയാണ് നൽകുന്നത്.(Shiv Sena UBT MPs likely to join Eknath Shinde faction)
ഡൽഹിയിൽ തമ്പടിച്ചിരിക്കുന്ന വിമത എംപിമാർ ഇതിനകം ലോക്സഭാ സ്പീക്കർക്ക് കത്ത് നൽകിയതായാണ് വിവരം. പാർട്ടിയിലെ മൂന്നിൽ രണ്ട് ഭൂരിപക്ഷം ഉറപ്പാക്കി നിയമനടപടികൾ ഒഴിവാക്കാനാണ് വിമതരുടെ ശ്രമം. നിലവിൽ ശിവസേന (യുബിടി)ക്ക് ഒമ്പത് ലോക്സഭാ എംപിമാരാണുള്ളത്. ഇതിൽ ആറുപേർ കൂറുമാറിയാൽ കൂറുമാറ്റ നിരോധന നിയമത്തിൽ നിന്ന് രക്ഷനേടാൻ അവർക്ക് സാധിക്കും.
ഈ സംഭവവികാസങ്ങളെ ‘ഓപ്പറേഷൻ വഞ്ചന’ എന്നാണ് ശിവസേന (യുബിടി) വക്താവ് പ്രിയങ്ക ചതുർവേദി വിശേഷിപ്പിച്ചത്. ഉദ്ധവ് താക്കറെയുടെ മുഖം കണ്ട് വോട്ട് ചെയ്തവരാണ് ഇവർ, അതിനാൽ ധൈര്യമുണ്ടെങ്കിൽ രാജിവെച്ച് ജനവിധി തേടാൻ അവർ തയ്യാറാകണമെന്നും അവർ വെല്ലുവിളിച്ചു. അതേസമയം, എംപിമാരെ വിലയ്ക്ക് വാങ്ങാൻ 50 കോടി രൂപ വീതം വാഗ്ദാനം ചെയ്തതായി സഞ്ജയ് റാവത്ത് ആരോപിച്ചു. എന്നാൽ, ഈ വാർത്തകളെ തള്ളിക്കളഞ്ഞുകൊണ്ട് നാസിക്കിൽ നിന്നുള്ള ലോക്സഭാ അംഗം രാജഭൗ വാജെ താൻ ഉദ്ധവ് താക്കറെയ്ക്കൊപ്പം ഉറച്ചുനിൽക്കുമെന്ന് പ്രഖ്യാപിച്ചു.
Story Summary
Shiv Sena (UBT) is facing a major crisis as six of its nine Lok Sabha MPs are reportedly planning to defect to the Eknath Shinde-led faction. While the Shinde camp aims to complete this ‘Operation Tiger’ by June 19, the UBT faction has alleged massive bribery and issued a whip for a party meeting to keep its remaining members united.
