ന്യൂഡൽഹി: മിഡിൽ ഈസ്റ്റ് സംഘർഷത്തിനിടെ ഇന്ത്യൻ നാവികരുടെ സുരക്ഷയെച്ചൊല്ലി പ്രധാനമന്ത്രി നരേന്ദ്ര മോദിയുടെ നിലപാടിനെ പിന്തുണച്ച് കോൺഗ്രസ് എംപി ശശി തരൂർ. യുഎസ് പ്രസിഡന്റ് ഡൊണാൾഡ് ട്രംപുമായുള്ള കൂടിക്കാഴ്ചയിൽ പ്രധാനമന്ത്രി മൗനം പാലിച്ചുവെന്ന സ്വന്തം പാർട്ടിയുടെ ആരോപണങ്ങൾക്കിടയിലാണ് തരൂരിന്റെ ഈ പ്രസ്താവന.(Shashi Tharoor Backs PM Modi On Indian Sailors Safety)
ജി7 ഉച്ചകോടിക്കിടയിൽ നടന്ന ഉഭയകക്ഷി ചർച്ചയിൽ പ്രധാനമന്ത്രി ഇന്ത്യൻ നിലപാട് വ്യക്തമായി അറിയിച്ചുവെന്ന് തരൂർ പറഞ്ഞു. “യുദ്ധകാലത്ത് വാണിജ്യ കപ്പലുകളിലെ സാധാരണക്കാരായ നാവികർ ആക്രമിക്കപ്പെടരുത്. അവർ സൈനികരല്ല, ആ സന്ദേശം തന്നെയാണ് പ്രധാനമന്ത്രി വ്യക്തമാക്കിയത്. ഇന്ത്യൻ പതാകയുള്ള കപ്പലുകളിലെ നാവികരുടെ സുരക്ഷയിൽ നമുക്ക് വലിയ ആശങ്കയുണ്ട്. ഉപരോധം ലംഘിക്കുന്നുണ്ടെങ്കിൽ അത് തടയാൻ മറ്റ് വഴികൾ നോക്കണം, പക്ഷേ സാധാരണക്കാരെ കൊല്ലരുത്,” തരൂർ വ്യക്തമാക്കി.
ഒമാൻ ഉൾക്കടലിലെ അമേരിക്കൻ ആക്രമണത്തിൽ മൂന്ന് ഇന്ത്യൻ നാവികർ കൊല്ലപ്പെട്ട വിഷയത്തിൽ പ്രധാനമന്ത്രി മൗനം പാലിച്ചുവെന്ന് കാണിച്ച് കോൺഗ്രസ് ശക്തമായി വിമർശിച്ചിരുന്നു. എന്നാൽ, ശശി തരൂരിന്റെ പിന്തുണ ബിജെപിക്ക് വലിയ ആയുധമായിരിക്കുകയാണ്. “ശശി തരൂർ രാഹുൽ ഗാന്ധിയെ തുറന്നുകാട്ടിയിരിക്കുകയാണ്. കോൺഗ്രസ് നേതാക്കൾ തന്നെ പ്രധാനമന്ത്രിയുടെ നയതന്ത്രത്തെ പരസ്യമായി പുകഴ്ത്തുന്നു. ദേശീയ താല്പര്യങ്ങൾ സംരക്ഷിക്കുന്നതിൽ മോദി ഒന്നാമതാണെന്ന് അവർക്ക് മനസ്സിലായി,” ബിജെപി വക്താവ് പ്രദീപ് ഭണ്ഡാരി എക്സിൽ കുറിച്ചു.
Story Summary
Congress MP Shashi Tharoor has endorsed PM Narendra Modi’s efforts in raising concerns regarding the safety of Indian seafarers during his meeting with US President Donald Trump at the G7 Summit. While Tharoor emphasized that commercial sailors should not be targets in wartime, the BJP has seized on his comments to target Rahul Gandhi, claiming the Congress leadership is divided over national interest.
