ന്യൂഡൽഹി: യുക്രെയ്നിൽ സുസ്ഥിരമായ സമാധാനം പുനഃസ്ഥാപിക്കാനുള്ള ശ്രമങ്ങളുടെ ഭാഗമായി യുക്രെയ്ൻ നാഷണൽ സെക്യൂരിറ്റി ആൻഡ് ഡിഫൻസ് കൗൺസിൽ സെക്രട്ടറി റസ്റ്റം ഉമറോവ് ഇന്ത്യയിലെത്തി (Rustem Umerov India Visit). വിദേശകാര്യ മന്ത്രി എസ്. ജയശങ്കർ, ദേശീയ സുരക്ഷാ ഉപദേഷ്ടാവ് അജിത് ഡോവൽ എന്നിവരുമായി അദ്ദേഹം നിർണ്ണായക ചർച്ചകൾ നടത്തി. യുക്രെയ്ൻ പ്രസിഡന്റ് വൊളോഡിമിർ സെലൻസ്കിയുടെ വിശ്വസ്തനായാണ് റസ്റ്റം ഉമറോവ് അറിയപ്പെടുന്നത്.
നിലവിൽ റഷ്യ-യുക്രെയ്ൻ യുദ്ധമുന്നണിയിലെ സ്ഥിതിഗതികളെക്കുറിച്ച് ഉമറോവ് ഇന്ത്യൻ പ്രതിനിധികൾക്ക് വിശദീകരിച്ചു നൽകി. സമാധാന ചർച്ചകളിലെ പുരോഗതിയും സുസ്ഥിര സമാധാനത്തിനുള്ള സാധ്യതകളും അദ്ദേഹം പങ്കുവെച്ചു. ചർച്ചകളിലൂടെയും നയതന്ത്രത്തിലൂടെയും മാത്രമേ യുക്രെയ്ൻ സംഘർഷത്തിന് പരിഹാരം കാണാവൂ എന്ന ഇന്ത്യയുടെ എക്കാലത്തെയും തത്വാധിഷ്ഠിത നിലപാട് എസ്. ജയശങ്കറും അജിത് ഡോവലും കൂടിക്കാഴ്ചയിൽ ആവർത്തിച്ചു. 2024 ഓഗസ്റ്റിൽ പ്രധാനമന്ത്രി നരേന്ദ്ര മോദി കീവ് സന്ദർശിച്ച വേളയിൽ ഒപ്പിട്ട കരാറുകളുടെ നടത്തിപ്പും ഇരുരാജ്യങ്ങളും തമ്മിലുള്ള സഹകരണം ശക്തിപ്പെടുത്തുന്നതും ചർച്ചയായി.
“തുറന്നതും അർത്ഥവത്തുമായ ചർച്ചകൾക്ക് നന്ദി. ഇന്ത്യയുമായുള്ള ഉഭയകക്ഷി സഹകരണം കൂടുതൽ ശക്തിപ്പെടുത്താൻ ഞങ്ങൾ ആഗ്രഹിക്കുന്നു,” എന്ന് കൂടിക്കാഴ്ചയ്ക്ക് ശേഷം ഉമറോവ് എക്സിൽ കുറിച്ചു. വിദേശകാര്യ മന്ത്രാലയ വക്താവ് രൺധീർ ജയ്സ്വാളും കൂടിക്കാഴ്ചയിലെ വിശേഷങ്ങൾ പങ്കുവെച്ചു.
Summary: Ukraine’s National Security and Defence Council Secretary Rustem Umerov, a close aide to President Zelensky, held high-level meetings in New Delhi with External Affairs Minister S. Jaishankar and NSA Ajit Doval. The discussions focused on the current frontline situation and the prospects for achieving a just and lasting peace in Ukraine. India reaffirmed its consistent position that the conflict must be resolved through dialogue and diplomacy. The sides also reviewed bilateral cooperation and progress on agreements signed during PM Modi’s visit to Kyiv in August 2024.
