മുംബൈ: മുംബൈയിലെ സിയോൺ-പൻവേൽ ഹൈവേയിൽ നിർമ്മാണത്തിലിരിക്കുന്ന മേൽപ്പാലത്തിന്റെ പൈലിംഗ് യന്ത്രം തകർന്നു വീണ് 48 വയസ്സുകാരനായ പോലീസ് കോൺസ്റ്റബിൾ മരിച്ചു. നഗരത്തിലെ പൊതു അടിസ്ഥാന സൗകര്യ വികസന സൈറ്റുകളിലെ സുരക്ഷാ വീഴ്ചകളെക്കുറിച്ച് ഈ സംഭവം വീണ്ടും വലിയ ആശങ്കകൾ ഉയർത്തുന്നു.(Police constable was killed after piling rig machine collapsed on him)
നെരൂൾ സ്വദേശിയായ സന്തോഷ് ഗോപാൽ ചവാൻ ആണ് മരിച്ചത്. ചൊവ്വാഴ്ച രാത്രി 9.45-ഓടെ ചെമ്പൂരിലെ അഡീഷണൽ പോലീസ് കമ്മീഷണർ ഓഫീസിലെ ഡ്യൂട്ടി കഴിഞ്ഞ് ബൈക്കിൽ വീട്ടിലേക്ക് മടങ്ങുമ്പോഴായിരുന്നു അപകടം. മൻഖുർദ് ടി-ജംഗ്ഷൻ കഴിഞ്ഞ ഉടനെ ടാറ്റ പവർ ഹൗസിന് സമീപമാണ് അപകടം നടന്നത്.
മേൽപ്പാലം നിർമ്മാണത്തിനായി ഉപയോഗിച്ചിരുന്ന പൈലിംഗ് റിഗ് എന്ന ഭാരമേറിയ യന്ത്രം നിരപ്പല്ലാത്ത തറയിൽ ഉറപ്പിക്കാതെ സ്ഥാപിച്ചതാണ് അപകടത്തിന് കാരണമായത്. യന്ത്രം ഒരു വശത്തേക്ക് മറിയുകയും അതിന്റെ ഒരു ഭാഗം സന്തോഷിന്റെ ദേഹത്തേക്ക് പതിക്കുകയുമായിരുന്നു. ഉടൻ തന്നെ അദ്ദേഹത്തെ വാശിയിലെ എം.ജി.എം ആശുപത്രിയിൽ എത്തിച്ചെങ്കിലും അപ്പോഴേക്കും മരണം സംഭവിച്ചിരുന്നു.
സന്തോഷിന്റെ സഹോദരൻ നൽകിയ പരാതിയുടെ അടിസ്ഥാനത്തിൽ കരാർ കമ്പനികളായ എസ്.എഫ്.എ.ആർ ഇൻഫ്രാടെക്, ലിഫ്റ്റിംഗ് ആൻഡ് ലാഷിംഗ് സൊല്യൂഷൻ ഇന്ത്യ എന്നിവയുടെ ഉടമകൾക്കും എൻജിനീയർമാർക്കും സൈറ്റ് സൂപ്പർവൈസർമാർക്കും എതിരെ എഫ്.ഐ.ആർ രജിസ്റ്റർ ചെയ്തു. മൻഖുർദ് പോലീസ് പ്രതികൾക്കെതിരെ അന്വേഷണം ഊർജ്ജിതമാക്കിയിട്ടുണ്ട്. മൻഖുർദ് ഫ്ലൈ ഓവർ വിപുലീകരണ പ്രവർത്തനങ്ങൾ നടത്തിവരുന്ന ബൃഹൻമുംബൈ മുൻസിപ്പൽ കോർപ്പറേഷൻ (ബി.എം.സി) സംഭവത്തിൽ വിശദമായ അന്വേഷണത്തിന് ഉത്തരവിട്ടു.
