ന്യൂഡൽഹി: വനിതാ സംവരണത്തിനായുള്ള ഭരണഘടനാ ഭേദഗതി ബില്ല് ലോക്സഭയിൽ പരാജയപ്പെട്ടതിന് പിന്നാലെ പ്രധാനമന്ത്രി നരേന്ദ്ര മോദി ഇന്ന് രാത്രി രാജ്യത്തെ അഭിസംബോധന ചെയ്യും. രാത്രി 8:30-നാണ് പ്രധാനമന്ത്രി ജനങ്ങളോട് സംസാരിക്കുക.(PM Modi to address nation tonight at 8:30 PM, Important announcement likely on women’s reservation)
അഭിസംബോധനയ്ക്ക് മുന്നോടിയായി ഇന്ന് തലസ്ഥാനത്ത് നിർണ്ണായക യോഗങ്ങൾ ചേർന്നു. കേന്ദ്ര മന്ത്രിസഭയുടെ പ്രത്യേക യോഗം ഇന്ന് വിളിച്ചുചേർത്തിരുന്നു. ദേശീയ സുരക്ഷാ സമിതിയുടെ യോഗവും ഇന്ന് നടന്നു. ഇതിന് പിന്നാലെയാണ് പ്രധാനമന്ത്രി രാജ്യത്തെ അഭിസംബോധന ചെയ്യുമെന്ന വിവരം പുറത്തുവന്നത്.
വനിതാ സംവരണം നടപ്പിലാക്കുന്നതുമായി ബന്ധപ്പെട്ട് സർക്കാർ സ്വീകരിക്കാൻ പോകുന്ന പുതിയ മാർഗ്ഗങ്ങളെക്കുറിച്ച് പ്രധാനമന്ത്രി വിശദീകരിച്ചേക്കും. ബില്ല് പരാജയപ്പെടാൻ കാരണമായ പ്രതിപക്ഷ നിലപാടിനെ പ്രധാനമന്ത്രി കടുത്ത ഭാഷയിൽ വിമർശിക്കാൻ സാധ്യതയുണ്ട്. മണ്ഡല പുനർനിർണ്ണയവുമായി ബന്ധപ്പെട്ട തർക്കങ്ങൾക്കിടെ വനിതാ സംവരണം എങ്ങനെ പ്രായോഗികമാക്കാം എന്നതിനെക്കുറിച്ച് സുപ്രധാന പ്രഖ്യാപനങ്ങൾ ഉണ്ടായേക്കാമെന്ന് രാഷ്ട്രീയ നിരീക്ഷകർ കരുതുന്നു. ലോക്സഭയിൽ ഭൂരിപക്ഷം ലഭിച്ചിട്ടും മൂന്നിൽ രണ്ട് ഭൂരിപക്ഷം ഇല്ലാത്തതിനാൽ ബില്ല് തള്ളപ്പെട്ട സാഹചര്യത്തിൽ, പ്രധാനമന്ത്രിയുടെ ഈ പ്രസംഗം രാഷ്ട്രീയമായി ഏറെ പ്രാധാന്യമർഹിക്കുന്നു.
