ശ്രീനഗർ: ജമ്മു കശ്മീരിലെ ലോകപ്രശസ്ത വിനോദസഞ്ചാര കേന്ദ്രമായ പഹൽഗാമിൽ മേഘവിസ്ഫോടനത്തെ തുടർന്ന് ശക്തമായ വെള്ളപ്പൊക്കം (Pahalgam cloudburst). കനത്ത മലവെള്ളപ്പാച്ചിലിൽ പ്രദേശത്തെ പ്രമുഖ ഹോട്ടലുകളിലും നിരവധി വീടുകളിലും വെള്ളം കയറി വലിയ നാശനഷ്ടമുണ്ടായി. ശനിയാഴ്ചയായിരുന്നു നാടിനെ നടുക്കിയ ഈ പ്രകൃതിക്ഷോഭം ഉണ്ടായത്. മണിക്കൂറുകൾ നീണ്ടുനിന്ന കനത്ത മഴയെ തുടർന്ന് പ്രദേശത്തെ പ്രധാന തോട് കവിഞ്ഞൊഴുകിയതാണ് പെട്ടെന്നുള്ള വെള്ളപ്പൊക്കത്തിന് കാരണമായതെന്ന് ദുരന്തനിവാരണ വിഭാഗം അധികൃതർ അറിയിച്ചു.
ദക്ഷിണ കശ്മീരിലെ അനന്ത്നാഗ് ജില്ലയിലുൾപ്പെടുന്ന പഹൽഗാമിലെ അവൂര, ദേഹ്വത്തു എന്നീ വനമേഖലകളിലാണ് ഉച്ചയോടെ പെട്ടെന്ന് അതിശക്തമായ മഴയുണ്ടായത്. ഇത് വനത്തിനുള്ളിലുണ്ടായ മേഘവിസ്ഫോടനമാണെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ പ്രാഥമിക നിഗമനം. മേഘവിസ്ഫോടനത്തിന് തൊട്ടുപിന്നാലെ മലനിരകളിൽ നിന്ന് വൻതോതിൽ വെള്ളവും ചെളിയും ജനവാസ മേഖലയിലേക്ക് ഇരച്ചെത്തുകയായിരുന്നു. കുതിച്ചൊഴുകിയ വെള്ളം ടൂറിസം മേഖലയിലുള്ള അരഡസനിലധികം പ്രമുഖ ഹോട്ടലുകളിലേക്കാണ് ആദ്യം ഇരച്ചുകയറിയത്.
വെള്ളപ്പൊക്കത്തെ തുടർന്ന് ഹോട്ടലുകളിൽ കുടുങ്ങിപ്പോയ നിരവധി വിനോദസഞ്ചാരികളെ പോലീസും ദുരന്തനിവാരണ സേനയും ചേർന്ന് അതീവ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു. ആർക്കും പരിക്കേറ്റതായി ഇതുവരെ റിപ്പോർട്ടുകളില്ല. ഹോട്ടലുകൾക്ക് പുറമെ മേഖലയിലെ താഴ്ന്ന പ്രദേശങ്ങളിലുള്ള നിരവധി വീടുകളെയും കൃഷിയിടങ്ങളെയും വെള്ളപ്പൊക്കം സാരമായി ബാധിച്ചിട്ടുണ്ട്. വരും മണിക്കൂറുകളിലും മഴ തുടരാൻ സാധ്യതയുള്ളതിനാൽ പഹൽഗാമിലും പരിസര പ്രദേശങ്ങളിലും അധികൃതർ ജാഗ്രതാ നിർദേശം പുറപ്പെടുവിച്ചിട്ടുണ്ട്.
Story Summary: A cloudburst caused flash floods in the tourist hub of Pahalgam in Jammu and Kashmir’s Anantnag district, inundating several hotels and houses. Tourism and disaster management authorities evacuated tourists safely to secure locations after local streams overflowed due to heavy rainfall.
