ഭോപ്പാൽ: രാജ്യത്തെ മെഡിക്കൽ പ്രവേശന പരീക്ഷയായ നീറ്റിലെ ക്രമക്കേടുകളും ചോദ്യപേപ്പർ ചോർച്ചാ വാർത്തകളും കവർന്നത് പാവപ്പെട്ട ഒരു കർഷക കുടുംബത്തിന്റെ വലിയ സ്വപ്നങ്ങൾ (NEET Aspirant Suicide). മധ്യപ്രദേശിലെ മൗഗഞ്ച് ജില്ലയിലുള്ള മഗനിയ ഗ്രാമവാസിയായ ആകാൻക്ഷ ചതുർവേദി (18) എന്ന വിദ്യാർത്ഥിനിയാണ് പരീക്ഷാ വിവാദങ്ങളെത്തുടർന്നുണ്ടായ മാനസിക വിഷമത്താൽ നാഗ്പൂരിലെ താമസസ്ഥലത്ത് ജീവനൊടുക്കിയത്. പരീക്ഷ കഴിഞ്ഞ് മികച്ച വിജയം പ്രതീക്ഷിച്ചിരുന്ന ആകാൻക്ഷ, പിന്നീട് പുറത്തുവന്ന പേപ്പർ ചോർച്ചാ വാർത്തകളിൽ കടുത്ത മാനസിക ആഘാതത്തിലാവുകയായിരുന്നു. ദിവസങ്ങൾക്ക് ശേഷം വീട്ടുകാർക്ക് ലഭിച്ച കുട്ടിയുടെ ആത്മഹത്യാക്കുറിപ്പ് രാജ്യത്തെ മത്സരപ്പരീക്ഷകൾ എഴുതുന്ന വിദ്യാർത്ഥികൾ നേരിടുന്ന കടുത്ത മാനസിക സമ്മർദ്ദത്തിന്റെ നേർച്ചിത്രമായി മാറുകയാണ്.
ദാരിദ്ര്യത്തിൽ നിന്നും കുടുംബത്തെ രക്ഷിക്കാൻ ഡോക്ടറാകുക എന്ന ലക്ഷ്യത്തോടെയാണ് ആകാൻക്ഷ നാഗ്പൂരിലെ കോച്ചിംഗ് ഇൻസ്റ്റിറ്റ്യൂട്ടിൽ പഠനത്തിനായി ചേർന്നത്. മകളുടെ പഠനച്ചെലവുകൾക്കായി ചെറുകിട കർഷകനായ അച്ഛൻ കൃഷ്ണകുമാർ ചൗബെ കിസാൻ ക്രെഡിറ്റ് കാർഡ് വഴി മൂന്ന് ലക്ഷത്തോളം രൂപ വായ്പയെടുക്കുകയും ബന്ധുക്കളിൽ നിന്ന് സാമ്പത്തിക സഹായം തേടുകയും ചെയ്തിരുന്നു. ഇതിനുപുറമെ നാഗ്പൂരിൽ ഒരു പാചകക്കാരനായി ജോലി ചെയ്താണ് അദ്ദേഹം മകളുടെ ഫീസിനുള്ള പണം കണ്ടെത്തിയിരുന്നത്. പരീക്ഷ കഴിഞ്ഞ് മടങ്ങിയെത്തിയ ആകാൻക്ഷ 650-ലധികം മാർക്ക് ലഭിക്കുമെന്ന വലിയ ആത്മവിശ്വാസത്തിലായിരുന്നെന്നും എന്നാൽ ക്രമക്കേട് വാർത്തകൾ വന്നതോടെ കുട്ടി ആഹാരം കഴിക്കുന്നതും സംസാരിക്കുന്നതും പൂർണ്ണമായി നിർത്തി കടുത്ത വിഷാദത്തിലേക്ക് വഴുതിവീണെന്നും ബന്ധുക്കൾ കണ്ണീരോടെ ഓർക്കുന്നു.
“അമ്മേ, അച്ഛാ, നിങ്ങളുടെ മകൾ നന്നായി പഠിച്ച് ഡോക്ടറാകുമെന്ന് നിങ്ങൾ വിശ്വസിച്ചു, എന്നാൽ എനിക്ക് ഇനിയൊരു നീറ്റ് പരീക്ഷ എഴുതാനുള്ള ധൈര്യമില്ല, ആദ്യശ്രമത്തിൽ എനിക്ക് നല്ല മാർക്ക് ലഭിക്കുമായിരുന്നു, എന്നാൽ ഇനി ഞാൻ നന്നായി എഴുതുമെന്ന് ഉറപ്പില്ല, എന്നോട് ക്ഷമിക്കണം, ഞാൻ എല്ലാം നശിപ്പിച്ചു” എന്നായിരുന്നു ആകാൻക്ഷയുടെ കത്തിലെ വരികൾ. കഠിനാധ്വാനത്തിന് വിലയില്ലാതാകുമെന്ന ഭയമാണ് കുട്ടിയെ ഈ ദാരുണമായ തീരുമാനത്തിലേക്ക് നയിച്ചതെന്ന് കുടുംബം ആരോപിക്കുന്നു. ഈ സംഭവം മൗഗഞ്ചിലും രാജ്യത്തുടനീളവും വലിയ പ്രതിഷേധങ്ങൾക്ക് കാരണമായിട്ടുണ്ട്. വൻ തുക കടം വാങ്ങി വർഷങ്ങളോളം കഠിന പ്രയത്നം നടത്തുന്ന വിദ്യാർത്ഥികളുടെ ജീവിതം ഇത്തരം പരീക്ഷാ ക്രമക്കേടുകൾ വഴി എങ്ങനെ തകരുന്നു എന്നതിന്റെ വേദനാജനകമായ ഉദാഹരണമായി മാറിയിരിക്കുകയാണ് ആകാൻക്ഷയുടെ വേർപാട്.
Summary: An 18-year-old NEET aspirant named Akanksha Chaturvedi from Madhya Pradesh allegedly died by suicide in Nagpur after falling into deep depression over reports of examination irregularities and paper leaks. Her family had taken a loan of nearly Rs 3 lakh through a Kisan Credit Card and relatives to fund her coaching, and she was expecting to score over 650 marks before the controversy broke out. In her final note, she apologized to her parents, expressing that she no longer possessed the courage to face the competitive entrance exam again.
