മൊഹാലി: പഞ്ചാബിലെ മൊഹാലിയിൽ പ്രണയപ്പകയെത്തുടർന്ന് സ്വകാര്യ സ്ഥാപനത്തിലെ ജീവനക്കാരിയെ സഹപ്രവർത്തകനായ മുൻ കാമുകൻ ഓഫീസിനുള്ളിൽ വെച്ച് ക്രൂരമായി കുത്തിക്കൊന്നു (Mohali Office Stabbing Case). മൊഹാലിയിലെ പാക്കേഴ്സ് ആൻഡ് മൂവേഴ്സ് കമ്പനിയിൽ ജോലി ചെയ്തിരുന്ന ഡിംപിൾ എന്ന യുവതിയാണ് കൊല്ലപ്പെട്ടത്. ഇവരെ ആക്രമിച്ച ശേഷം സ്വന്തം തൊണ്ടയിൽ മുപ്പതിലധികം തവണ കുത്തി ജീവനൊടുക്കാൻ ശ്രമിച്ച പ്രതി ഹർവിന്ദർ മാൻ എന്ന ഹാരിയെ അതീവ ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചു. വ്യാഴാഴ്ച രാത്രി 7:40 ഓടെ നടന്ന ഈ ദാരുണമായ സംഭവം ഓഫീസിലെ സിസിടിവി ക്യാമറയിൽ പൂർണ്ണമായി പതിഞ്ഞിട്ടുണ്ട്.
കഴിഞ്ഞ മൂന്ന് വർഷമായി ഒരേ സ്ഥാപനത്തിൽ ജോലി ചെയ്തിരുന്ന ഇരുവരും ദീർഘകാലം പ്രണയത്തിലായിരുന്നു. എന്നാൽ കുറച്ചുകാലം മുൻപ് ഇവർ വേർപിരിഞ്ഞു. ബന്ധം പുതുക്കാൻ ഹാരി പലതവണ ശ്രമിച്ചെങ്കിലും ഡിംപിൾ അതിന് തയ്യാറായിരുന്നില്ല. ഇതേച്ചൊല്ലി വ്യാഴാഴ്ച ഓഫീസിൽ വെച്ച് ഇരുവർക്കുമിടയിൽ കടുത്ത തർക്കമുണ്ടായി. തുടർന്ന്, ഡിംപിൾ തന്റെ ഡെസ്കിലിരുന്ന് ജോലി ചെയ്യുന്നതിനിടെ പിന്നാലെയെത്തിയ പ്രതി കയ്യിൽ കരുതിയിരുന്ന കത്തി ഉപയോഗിച്ച് പിന്നിൽ നിന്ന് കുത്തുകയായിരുന്നു. ഭയന്നോടിയ യുവതിയെ മുടിയിൽ പിടിച്ച് വലിച്ച് നിലത്തിട്ട് ക്രൂരമായി ഇരുപതിലധികം തവണ കുത്തി. ഓഫീസിലെ മറ്റ് ജീവനക്കാർ തടയാൻ ശ്രമിച്ചെങ്കിലും പ്രതിയുടെ അക്രമസ്വഭാവം കാരണം പിന്തിരിയേണ്ടി വന്നു. ഡിംപിൾ ചലനമറ്റതോടെ ഹാരി സ്വന്തം തൊണ്ടയിൽ കുത്താൻ തുടങ്ങുകയായിരുന്നു. ഉടൻ തന്നെ ജീവനക്കാർ പോലീസിൽ വിവരമറിയിക്കുകയും ഇരുവരെയും ഫോർട്ടിസ് ആശുപത്രിയിൽ എത്തിക്കുകയും ചെയ്തെങ്കിലും യുവതി അപ്പോഴേക്കും മരണപ്പെട്ടിരുന്നു. പോലീസ് സ്ഥലത്തെത്തി ശാസ്ത്രീയ തെളിവുകൾ ശേഖരിച്ച് കേസെടുത്ത് അന്വേഷണം ആരംഭിച്ചു.
Summary: A woman working at a packers and movers company in Punjab’s Mohali was stabbed to death by her colleague and ex-boyfriend following a dispute over their relationship status. The accused, Harvinder Mann alias Harry, attacked Dimple from behind at her desk on Thursday evening, stabbing her over 20 times despite intervention attempts by other employees. He then attempted suicide by stabbing his own throat repeatedly. While the woman was declared dead at Fortis Hospital, the accused remains in critical condition.
