പിത്തോറഗഡ്: ഉത്തരാഖണ്ഡിലെ പിത്തോറഗഡിൽ 14 വയസ്സുകാരി ആൺകുഞ്ഞിന് ജന്മം നൽകി. സംഭവത്തിന് പിന്നാലെ നവജാതശിശുവിന്റെ പിതാവിനെതിരെ പോലീസ് കേസെടുത്തു. ചൊവ്വാഴ്ച ജില്ലാ ആശുപത്രിയിലായിരുന്നു പ്രസവം. (Minor Girl Gives Birth Uttarakhand)
കുട്ടികളുടെ സംരക്ഷണത്തിനായുള്ള സർക്കാർ സമിതിയായ ചൈൽഡ് വെൽഫെയർ കമ്മിറ്റി ആണ് പെൺകുട്ടിയുടെ സംരക്ഷണം ഏറ്റെടുത്തത്. പെൺകുട്ടിക്ക് കഠിനമായ പ്രസവവേദന അനുഭവപ്പെട്ടതിനെത്തുടർന്ന്, കമ്മിറ്റി ചെയർമാൻ എൽ.എസ്. ഖാതി ഗാർഡിയനായി ഒപ്പിടുകയും ശസ്ത്രക്രിയയിലൂടെ കുഞ്ഞിനെ പുറത്തെടുക്കാൻ ഡോക്ടർമാർക്ക് അനുമതി നൽകുകയും ചെയ്തു. കുഞ്ഞിന്റെ പിതാവായ യുവാവിനെതിരെ മുൻസ്യാരി പോലീസ് സ്റ്റേഷനിൽ കേസെടുത്തു. ഭാരതീയ ന്യായ സംഹിതയിലെ സെക്ഷൻ 64(1), 87, 5/6 എന്നീ വകുപ്പുകൾക്ക് പുറമെ പോക്സോ നിയമപ്രകാരവുമാണ് കേസെടുത്തിരിക്കുന്നത്. പൂനെയിൽ ജോലി ചെയ്യുന്ന യുവാവാണ് കുഞ്ഞിന്റെ പിതാവെന്ന് പെൺകുട്ടി വെളിപ്പെടുത്തി.
പെൺകുട്ടിയുടെ മാതാപിതാക്കൾ കുട്ടിക്കാലത്ത് തന്നെ വേർപിരിഞ്ഞവരാണ്. കഴിഞ്ഞ വർഷം ഈ യുവാവുമായി പരിചയത്തിലായ പെൺകുട്ടി പൂനെയിലേക്ക് മാറുകയും അവിടെ വെച്ച് ഗർഭിണിയാവുകയുമായിരുന്നുവെന്ന് ചൈൽഡ് വെൽഫെയർ കമ്മിറ്റിയെ അറിയിച്ചു. ആശുപത്രിയിൽ നിന്ന് ഡിസ്ചാർജ് ചെയ്ത ശേഷം പെൺകുട്ടിയെയും കുഞ്ഞിനെയും പ്രത്യേക ദത്തെടുക്കൽ കേന്ദ്രത്തിലേക്ക് മാറ്റും. പെൺകുട്ടിക്ക് 18 വയസ്സാകുന്നത് വരെ അവിടെ സംരക്ഷണവും സഹായവും നൽകുമെന്ന് അധികൃതർ വ്യക്തമാക്കി.
Summary: A 14-year-old girl gave birth to a son at a district hospital in Pithoragarh, Uttarakhand. Following the incident, the police registered a case against the newborn’s father under the POCSO Act and relevant sections of the Bharatiya Nyaya Sanhita. The Child Welfare Committee stepped in as the girl’s guardian to facilitate medical procedures. The minor revealed that she had moved to Pune with the man last year after her parents’ separation. Both the mother and child will be cared for by a special adoption agency until she turns 18.
