ന്യൂഡൽഹി: ഡൽഹിയിലെ രോഹിണിയിൽ പുലർച്ചെയുണ്ടായ വൻ തീപിടുത്തത്തിൽ ഒരു കുടുംബത്തിലെ മൂന്നുപേർ വെന്തുമരിച്ചു. മരിച്ചവരിൽ രണ്ട് വയസ്സുള്ള കുഞ്ഞും ഉൾപ്പെടുന്നു. രോഹിണി സെക്ടർ 16-ന് സമീപമുള്ള കുടിലുകൾക്കാണ് തീപിടിച്ചത്.(Massive fire breaks out in Delhi, 3 people including a 2-year-old child die tragically)
പുലർച്ചെ 2:00 മണിയോടെയാണ് തീപിടുത്തം ഉണ്ടായത്. പ്ലാസ്റ്റിക് അവശിഷ്ടങ്ങൾ സൂക്ഷിച്ചിരുന്ന ഏകദേശം 400 ചതുരശ്ര യാർഡ് സ്ഥലത്താണ് ആദ്യം തീപിടുത്തമുണ്ടായതെന്ന് അഗ്നിശമന സേനാ ഉദ്യോഗസ്ഥർ അറിയിച്ചു. ഇതിന് സമീപത്തായി ഉണ്ടായിരുന്ന കുടിലുകളിലേക്ക് തീ അതിവേഗം പടരുകയായിരുന്നു. ഉറക്കത്തിലായിരുന്ന കുടുംബത്തിന് രക്ഷപ്പെടാൻ സാധിക്കുന്നതിന് മുൻപ് തന്നെ തീ കുടിലുകളെ വിഴുങ്ങി.
അഗ്നിശമന സേനാംഗങ്ങൾ സ്ഥലത്തെത്തിയെങ്കിലും പ്രദേശത്തെ ഇടുങ്ങിയ പാതകൾ വലിയ തടസ്സമായി. മണിക്കൂറുകൾ നീണ്ട പരിശ്രമത്തിനൊടുവിലാണ് അഗ്നിശമന സേന തീ പൂർണ്ണമായും അണച്ചത്. മരിച്ചവരുടെ മൃതദേഹങ്ങൾ ആശുപത്രിയിലേക്ക് മാറ്റി.
