സൂറത്ത്: ഓഹരി വിപണിയിലെ വൻ നഷ്ടത്തെത്തുടർന്ന് കടക്കെണിയിലായ 30-കാരൻ സ്വന്തം തട്ടിക്കൊണ്ടുപോകൽ നാടകം നടത്തി. സൂറത്ത് മോട്ടാ വരാച്ച സ്വദേശിയായ ജിഗ്നേഷ് ലാൽജിഭായ് താലാവിയയാണ് 50 ലക്ഷം രൂപ മോചനദ്രവ്യം ആവശ്യപ്പെട്ട് പൊലീസിനെയും ബന്ധുക്കളെയും വട്ടം കറക്കിയത്.(Man Stages Own Kidnapping In Surat Over Stock Market Losses)
ജൂൺ 11-ന് വീട്ടിൽ നിന്ന് കാണാതായ ജിഗ്നേഷിനെക്കുറിച്ച് ഭാര്യ ഉത്രൻ പോലീസ് സ്റ്റേഷനിൽ പരാതി നൽകിയിരുന്നു. ഇതിനു പിന്നാലെ ജിഗ്നേഷിന്റെ ഫോണിൽ നിന്ന് കുടുംബത്തിന് ഭീഷണി സന്ദേശങ്ങൾ ലഭിച്ചു. ജിഗ്നേഷിനെ തട്ടിക്കൊണ്ടുപോയെന്നും 50 ലക്ഷം രൂപ നൽകിയില്ലെങ്കിൽ കൊല്ലുമെന്നുമായിരുന്നു സന്ദേശം. ജിഗ്നേഷിനെ തടവിലാക്കിയ നിലയിലുള്ള ഒരു വീഡിയോയും കുടുംബത്തിന് ലഭിച്ചു. ഇതോടെ പോലീസ് വൻ അന്വേഷണം ആരംഭിച്ചു.
ഗുജറാത്ത്, മധ്യപ്രദേശ് എന്നിവിടങ്ങളിലായി പോലീസ് നടത്തിയ വിപുലമായ അന്വേഷണത്തിൽ, ജിഗ്നേഷിന്റെ ഫോൺ സിഗ്നൽ ആദ്യം ഉജ്ജയിനിയിൽ കണ്ടെത്തുകയായിരുന്നു. എന്നാൽ, വീഡിയോയിലെ ചില പൊരുത്തക്കേടുകൾ പൊലീസിന് സംശയമുണ്ടാക്കി. അന്വേഷണം പുരോഗമിക്കവേ, ഈ വീഡിയോ ചിത്രീകരിച്ചത് മധ്യപ്രദേശിൽ നിന്നല്ല, ഗുജറാത്തിലെ ഗോദ്രയിൽ നിന്നാണെന്ന് പോലീസ് കണ്ടെത്തി. തുടർന്ന് ഗോദ്രയിലെ ലോഡ്ജുകളിൽ നടത്തിയ പരിശോധനയിലാണ് ജൂൺ 15-ന് ജിഗ്നേഷിനെ സുരക്ഷിതനായി കണ്ടെത്തിയത്.
ജിഗ്നേഷിനെ ചോദ്യം ചെയ്തപ്പോഴാണ് തട്ടിക്കൊണ്ടുപോകൽ നാടകമാണെന്ന് തെളിഞ്ഞത്. ഓഹരി വിപണിയിലെ ഓപ്ഷൻസ് ട്രേഡിംഗിൽ അമിതമായി നിക്ഷേപിച്ച് 50 മുതൽ 60 ലക്ഷം രൂപ വരെ ഇയാൾക്ക് നഷ്ടപ്പെട്ടിരുന്നു. നേരത്തെയും കടക്കെണിയിൽ പെട്ട ഇയാളെ കുടുംബം സഹായിച്ചിരുന്നുവെങ്കിലും വീണ്ടും വലിയ നഷ്ടമുണ്ടായതാണ് വ്യാജ തട്ടിക്കൊണ്ടുപോകൽ നാടകത്തിലേക്ക് നയിച്ചത്. സംഭവത്തിൽ ബി.എൻ.എസ് (BNS) വകുപ്പുകൾ പ്രകാരം ജിഗ്നേഷിനെതിരെ കേസെടുത്തിട്ടുണ്ട്.
Story Summary
A 30-year-old Surat resident, Jignesh Talaviya, staged his own kidnapping and demanded a Rs 50 lakh ransom from his family after suffering massive financial losses in the stock market. Surat police unraveled the elaborate drama and located him in a Godhra hotel, leading to his arrest for fabricating the crime.
