ബംഗളൂരു: കർണാടകയിലെ കലബുറഗി ജില്ലയിലുണ്ടായ അതിദാരുണമായ റോഡപകടത്തിൽ ഒരു കുടുംബത്തിലെ അഞ്ച് പേർക്ക് ജീവൻ നഷ്ടമായി (Karnataka road accident). ലാഡ്ലാപൂരിന് സമീപം ദേശീയപാത 150-ൽ ക്രൂയിസർ വാഹനവും ലോറിയും കൂട്ടിയിടിച്ചാണ് അപകടമുണ്ടായത്. ചിറ്റാപൂർ താലൂക്കിലെ ഇംഗലഗി ഗ്രാമവാസികളായ മഹ്മൂദ് ഹുസൈൻ (60), ഫാത്തിമ അബ്ദുൾ സാബ് (40), റസൂൽ ബീ (40), മഹ്ബൂബ് സംഗവി (37), ക്രൂയിസർ ഡ്രൈവർ ടോളു പാഷ (24) എന്നിവരാണ് മരണപ്പെട്ടത്.
വെള്ളിയാഴ്ച രാത്രി 11.40 ഓടെയായിരുന്നു രാജ്യത്തെ നടുക്കിയ ഈ അപകടം. ന്യുമോണിയ ബാധിച്ച ബന്ധുവിനെ യാദ്ഗിറിലെ ആശുപത്രിയിൽ പ്രവേശിപ്പിച്ച ശേഷം വീട്ടിലേക്ക് മടങ്ങുകയായിരുന്ന കുടുംബമാണ് അപകടത്തിൽപ്പെട്ടത്. എട്ടുപേരുമായാണ് ക്രൂയിസർ വാഹനം ആശുപത്രിയിലേക്ക് പോയത്. രോഗിയെയും മറ്റ് രണ്ട് സഹായികളെയും അവിടെ നിർത്തിയ ശേഷം ഡ്രൈവർ ഉൾപ്പെടെ അഞ്ച് പേർ നാട്ടിലേക്ക് മടങ്ങുന്നതിനിടെയാണ് ദുരന്തം സംഭവിച്ചത്.
തമിഴ്നാട്ടിൽ നിന്നും അമിതവേഗതയിൽ എതിർദിശയിൽ വന്ന ലോറി ഇവർ സഞ്ചരിച്ചിരുന്ന വാഹനത്തിലേക്ക് ഇടിച്ചുകയറുകയായിരുന്നു. ഇടിയുടെ ആഘാതത്തിൽ ക്രൂയിസർ വാഹനത്തിന്റെ മുൻഭാഗം പൂർണ്ണമായും തകർന്നുപോയി. അപകടം നടന്നയുടൻ ലോറി ഡ്രൈവർ വണ്ടി നിർത്തി ഓടി രക്ഷപ്പെട്ടതായി ചിറ്റാപൂർ പൊലീസ് അറിയിച്ചു. ഇയാൾക്കായുള്ള തിരച്ചിൽ പൊലീസ് ഊർജ്ജിതമാക്കിയിട്ടുണ്ട്.
Story Summary: Five members of a family, including the driver, were killed when their Cruiser vehicle collided with a lorry on NH 150 near Ladlapur in Karnataka’s Kalaburagi. The accident occurred late Friday night while they were returning home after admitting a relative to a hospital.
